'கைதி' படத்தின் வரவேற்பு எப்படியிருக்கிறது?
நான் எதிர்பார்த்ததைவிட மிகப்பெரிய வெற்றி கிடைத்திருக்கிறது. மக்கள் எல்லாம் கொண்டடுறாங்க. ரொம்ப சந்தோஷமா இருக்கு.
இதுவரை காமெடி வேடங்களில் நடித்த நீங்கள், 'கைதி' படத்தில் ஹீரோ மாதிரி மாஸ் காட்சிகளில் நடித்திருப்பது பற்றி...
இயக்குநர் லோகேஷ் கனகராஜ் கதை சொல்லும்போதே இந்தப் படத்துல உங்களுக்கு முக்கியமான ரோல், நல்லா வரும் பாருங்கன்னு சொன்னார். எல்லாப்படத்திலையும் இப்படித்தான் சொல்லுவாங்க. அதில் வேலை பார்த்தது போல்தான் இந்தப் படத்திலும் வேலை பார்த்தேன். ஆனா இப்ப பெரிய வெற்றிப்படமா எனக்கு அமைஞ்சிடுச்சு.
இப்படி ஒரு படத்தில் நானும் ஒரு அங்கமா இருக்கிறது ரொம்ப மகிழ்ச்சி. இணையம் முழுக்கப் பாராட்டுறாங்க. நெப்போலியன் கேரக்டர் பத்தி எல்லோரும் பேசுறாங்க. சொந்தக்காரங்க எல்லாரும் சூப்பரா பண்ணிருக்கீங்கனு சொன்னாங்க. ரொம்ப சந்தோஷமா இருந்தது.
காமெடி போலீஸாக பல படங்களில் நடித்திருந்தாலும், 'கைதி'யில் மாஸ் கேரக்டரில் நடித்திருந்ததை எப்படி உணர்கிறீர்கள்?
ஆமா இதுவரைக்கும் காமெடியாதான் நடிச்சிருக்கேன். இயக்குநர் சுந்தர் சி படங்கள்ல காமெடி போலீஸா நடிச்சிருக்கேன். எல்லோரும் கொண்டாடுவாங்க. நம்மள பார்த்து சிரிப்பாங்க. தடம் படத்தில்தான் முதல் முறையாக இயக்குநர் மகிழ் திருமேனி கொஞ்சம் சீரியஸான ரோல் தந்தாரு. ஆனா கைதில ரொம்பவும் கனமான கதாபாத்திரம். எனக்கே கொஞ்சம் சந்தேகம் இருந்தது. என்னடா மக்கள் இதுவரைக்கும் நம்மள காமெடியனதான் பார்த்திருக்காங்க. இதுல இவ்வளவு சீரியஸான பாத்திரத்தில எப்படி ஏத்துப்பாங்கன்னு தோணுச்சு. அவங்க சிரிச்சிட்டா தப்பாயிடுமேனு யோசிச்சேன். ஆனா இயக்குநர் லோகேஷ் தைரியம் தந்து, என்னை நடிக்கவைத்தார். அவருக்கு கதை மேல பயங்கர நம்பிக்கை. அவர் கொடுத்த தைரியத்தால்தான் பண்ணினேன். காமெடில இருந்து நம்மள இப்படிப்பட்ட பாத்திரத்தில மக்கள் ஏத்துகிட்டதே பெரிய சந்தோஷம்தான்.
கார்த்தியோட நடித்த அனுபவம் பற்றி...
கார்த்திக்கிற்கும் எனக்கும் படத்தில் கடைசிலதான் சீன் வரும். அதுவும் பயங்கரமா வந்திருக்கு. அதுவரைக்கும் அவர் கதை தனியா நடக்கும். கார்த்தி நடிப்பில பிரமாதப்படுத்தியிருக்கார். லாரி ஓட்டுறது எல்லாம் அவ்வளவு ஈஸி கிடையாது. ஆனா அவரேதான் படம் முழுக்க லாரி ஓட்டியிருக்கார். அவர் தன்னோட வேலையில சரியா இருப்பார்.
என்னுடைய காட்சி முழுக்க கமிஷனர் ஆபிஸிலதான். நல்லா பண்ணிருக்கேன்னு நினைக்கிறேன்.
எல்லோருமே அருமையா வேலை பார்த்திருக்காங்க. கேமராமேன் சத்யன் செய்திருப்பது எல்லாம் பிரமிப்பான வேலை. இரவுல ஷீட் பண்ணுறது மிகப்பெரிய கஷ்டம். அதுவும் அவுட்டோர்ல எவ்வளவு லைட்ட வைக்க முடியும் சொல்லுங்க. ஆனா படம் பார்க்கும்போது அற்புதமா ஒரு ஆங்கில படம் மாதிரி வந்திருக்கு.
அதே மாதிரி ரீ ரிக்கார்டிங் சாம் சி எஸ் பின்னிட்டார். ஒரு பாட்டில எரிஞ்சா அது எங்க விழுது, எது மேல விழுதுங்கிற மாதிரி சவுண்ட் கரெக்டா வந்திருக்கு. மக்கள் எல்லாத்தையும் உன்னிப்பா பார்த்து பாராட்டுறாங்க. படம் பார்த்து கார்த்தி என்னை கூப்பிட்டு பாராட்டுனாரு. அவருக்கு பெரிய மனசு.
கூத்துப்பட்டறை மூலமா சினிமாவுக்கு வந்தவர் நீங்கள். அந்த அனுபவம் பத்தி சொல்லுங்கள்?
1990களிலேயே நான் கூத்துப்பட்டறைல சேர்ந்துட்டேன். நான், பசுபதி, ஜெயக்குமார், கலைராணி, இப்படி நிறைய பேர். பசுபதி, கலைராணி சீக்கிரமே சினிமாவுக்குள் வந்துட்டாங்க. நான் பத்து வருஷமா அங்கதான் நாடகங்கள்ல நடிச்சிட்டு இருந்தேன். நாசர்தான் அவரோட 'மாயன்' படத்தில அறிமுகப்படுத்தினார். அவர் மூலம்தான் சினிமாவுக்கு வந்தேன். பசுபதியும் அவர் மூலமாதான் கமல்ஹாசனுக்கு அறிமுகமாகி வில்லனாக நடிக்க ஆரம்பிச்சார். எனக்கு இப்போதுதான் ஒரு அங்கீகாரம் கிடைச்சிருக்கு.
'காஞ்சீவரம்' திரைப்படம் உங்களுக்கு ஒரு அடையாளமாக இருந்ததே, அதைப்பற்றி?
அந்தப் படத்தில் என்னைப் பலரும் அடையாளம் கண்டு சொன்னார்கள். படத்தில் பிரியதர்ஷனிடம் அஸிஸ்டென்டாக இயக்குநர் ஏ.எல். விஜய் வேலை பார்த்தார். அவர்தான் என்னை அந்தக் கதாபாத்திரத்துக்கு தேர்ந்தெடுத்தார். அப்போது ஏற்பட்ட பழக்கம், அவர் படங்களில் தொடர்ந்து எனக்கு வாய்ப்பு தருவார்.