ராஜமௌலி இயக்கத்தில் ராம் சரண், ஜூனியர் என்டிஆர் உள்ளிட்டோர் முன்னணிக் கதாபாத்திரங்களில் நடித்துவரும் திரைப்படம் 'ஆர்ஆர்ஆர்'. தற்போது இதன் படப்பிடிப்பு இறுதிக்கட்டத்தை எட்டியுள்ளது.
சுதந்திரப் போராட்ட வீரர்கள் அல்லுரி சீதா ராமராஜூ, குமரம் பீம் ஆகிய இருவரின் வாழ்க்கையை மையமாக வைத்து 'ஆர்ஆர்ஆர்' திரைப்படம் உருவாகிவருகிறது. சினிமா ரசிகர்கள் இந்தப் படத்தின் டீசரை ஆவலுடன் எதிர்பார்த்துக் காத்திருந்த வேளையில், படக்குழுவினர், கிளைமேக்ஸ் படப்பிடிப்புத் தொடங்கியதை அறிவிக்கும்விதமாக புகைப்படம் ஒன்றைப் பதிவிட்டிருந்தனர்.
இது ரசிகர்களிடையே படம் குறித்தான எதிர்பார்ப்பை அதிகரித்தது. மேலும் இப்படம் தமிழ், இந்தி, தெலுங்கு, கன்னடா, மலையாளம் ஆகிய மொழிகளில் அக்டோபர் 13ஆம் தேதி வெளியாகும் எனப் படக்குழுவினர் அறிவித்தனர். இந்தப் படத்தின் தமிழ்நாடு திரையரங்கின் வெளியிடும் உரிமையை லைகா நிறுவனம் சமீபத்தில் கைப்பற்றியது.
இந்நிலையில் ஆலியாவின் பிறந்தநாளான மார்ச் 15ஆம் தேதி படக்குழுவினர் அவரது கதாபாத்திரத்தின் ஃபர்ஸ்ட் லுக் போஸ்டரை வெளியிட்டனர். இதில் சீதா கதாபாத்திரத்தில் ஆலியா பட் நடிக்கிறார்.
இதையடுத்து 'ஆர்ஆர்ஆர்' படத்தில் அல்லூரி சீதாராம ராஜு கதாபாத்திரத்தில் நடிக்கும் ராம் சரணின் போஸ்டரை அவருடைய பிறந்தநாள் பரிசாகப் படக்குழுவினர் இன்று (மார்ச் 26) வெளியிட்டுள்ளனர்.
