சென்னை:கிழக்கு கடற்கரை சாலை பனையூரில் உள்ள நடிகர் விஜய்யின் அலுவலகத்தின் உட்பகுதிகள் புதுமைபடுத்தும் பணியானது நடைபெற்று வருகிறது. இங்கு வேலை செய்து வந்த பழைய வண்ணாரப்பேட்டையைச் சேர்ந்த பெயிண்டரான பிரபாகரன்(34), நடிகர் விஜய்யின் அலுவலகத்தில் தங்கி பெயிண்ட் அடிக்கும் வேலையை செய்து வருகிறார்.
கடந்த சனிக்கிழமையன்று சம்பளத்தைப் பெற்று கொண்டு தன்னுடைய குடும்பத்தினரைக் காண பழைய வண்ணாரப்பேட்டைக்குச் சென்ற பிரபாகரன் நேற்று(ஜூன் 15) இரவு 8 மணியளவில் குடிபோதையில் நடிகர் விஜய்யின் அலுவலகத்திற்க்கு வந்துள்ளார்.
அங்கிருந்த மேஸ்திரியிடம் தனக்கு பசிப்பதாகவும், பரோட்டா வாங்க ரூ.100 தரும் படி கேட்டுப் பெற்று கொண்டு சென்றதாகக் கூறப்படுகிறது. இந்நிலையில், அவருடன் வேலை பார்க்கும் சக வேலையாட்கள் பார்த்த போது, அலுவலகத்தின் உட்புறமாக கையிலும் வாயிலும் பரோட்டாவுடன் பிரபாகரன் இறந்து கிடந்ததைப் பார்த்து அதிர்ச்சி அடைந்துள்ளனர்.
தகவலறிந்து வந்த கானத்தூர் காவல்துறையினர் உடற்கூராய்விற்காக பிரபாகரின் உடலை மருத்துவமனைக்கு அனுப்பி வைத்து விசாரணை மேற்கொண்டு வருகின்றனர். குடிபோதையில் பரோட்டா சாப்பிட்டதில் உணவுக்குழாயில் அடைப்பு ஏற்பட்டு இறந்திருக்கலாம் என்றும், உடற்கூராய்வின் அறிக்கை வந்த பிறகே இறப்பிற்கான முழுமையான காரணம் தெரிய வரும் என காவல்துறையினர் தெரிவித்துள்ளனர்.
இதையும் படிங்க: ’தொழிலாளி தற்கொலை; கந்து வட்டி சட்டத்தின்கீழ் 2 பேர் கைது
