விழிப்புணர்வை ஏற்படுத்தும் காவல்துறையினரின் அணிவகுப்பு

புதுக்கோட்டை: மக்களவைத் தேர்தலில் மக்களை வாக்களிக்க அறிவுறுத்தும் விதமாக காவல் துறையினர் அணிவகுப்பில் பங்கேற்றது வியப்பை ஏற்படுத்தியுள்ளது.

மக்களவைத் தேர்தலில் 100 விழுக்காடு வாக்குப்பதிவை அடைவதற்கு அரசு தரப்பில் பல விழிப்புணர்வு நிகழ்ச்சிகள் நடத்தப்பட்டுவருகிறது. அந்த வகையில், புதுக்கோட்டை மாவட்டத்தில் இன்று தேர்தலை முன்னிட்டு மக்களிடையே விழிப்புணர்வை ஏற்படுத்தும் விதமாகவும் அனைவரும் வாக்களிக்க வேண்டும் என்று சொல்லும் விதமாகவும் காவல் துறையினர் அணிவகுப்பு நடத்தினர்.

சுமார் 600-க்கும் மேற்பட்ட காவல் துறையினர் பங்கேற்ற இந்த அணிவகுப்பு சுமார் மூன்று கிலோமீட்டர் வரை நீண்டது. மாவட்ட காவல் ஆய்வாளர் செல்வராஜ் தலைமையில் இந்த அணிவகுப்பு நடைபெற்றது. இந்த அணிவகுப்பு மக்களிடையே பெரும் வரவேற்பை பெற்றுள்ளது.