கோவை மாவட்டம், பொள்ளாச்சி ஆனைமலைப் புலிகள் காப்பகத்துக்குட்பட்ட பொள்ளாச்சி, உலர்ந்தி, வால்பாறை, மானாம்பள்ளி ஆகிய நான்கு வனச்சரகங்கள் உள்ளன. இங்கு ஆண்டுதோறும் இருமுறை வனவிலங்குகள் கணக்கெடுக்கும் பணி நடைபெறும்.
அதன்படி இந்த ஆண்டு, குளிர்கால கணக்கெடுக்கும் பணி இன்று (டிச. 15) தொடங்கியது. கூடுதல் முதன்மைத் தலைமை வனப் பாதுகாவலர், ஆனைமலை புலிகள் காப்பக கள இயக்குநர் தலைமையில் தேசியப் புலிகள் காப்பக ஆணையத்தின் விதிமுறைகள்படி, முதற்கட்டமாக மூன்று நாள்கள் மாமிச உண்ணிகள், வனவிலங்குகளை நேரடியாகப் பார்ப்பது, எச்சங்கள், கால் தடங்கள், நகக் கீறல்கள் ஆகியவற்றைக் கொண்டு கணக்கெடுக்கும் பணியில், நவீன கருவி ஜிபிஎஸ், தூர அளவீட்டுக் கருவி கொண்டு நடைபெறுகிறது.
அடுத்த மூன்று நாள்கள் பறவைகள், சைவ உண்ணிகள் கணக்கெடுக்கும் பணியும் நடைபெறும். மேலும், வன விலங்குகளுக்குத் தேவையான உணவு, தண்ணீர் போன்றவை பற்றியும், பறவைகள், அரியவகை தாவரங்கள் குறித்தும் கணக்கிடப்படுகிறது.