மரணம் விளைவித்தல் இல்லை! கொலைக்கு நிகரான மரணத்தை ஏற்படுத்துதல்!

கோயம்பத்தூர்: மேட்டுப்பாளையத்தில் 17 பேர் உயிரிழக்க காரணமான தடுப்புச்சுவரை கட்டிய தொழிலதிபர் சிவசுப்பிரமணியன் மீது போடப்பட்ட வழக்கு வேறு பிரிவுக்கு மாற்றப்பட்டுள்ளது.

கோவை மாவட்டம் மேட்டுப்பாளையத்தில் தொழிலதிபர் சிவசுப்பிரமணியம் வீட்டின் தடுப்புச் சுவர் இடிந்து விழுந்ததில், குழந்தைகள் உள்பட 17 பேர் உயிரிழந்தனர். இந்த வீட்டின் உரிமையாளரான சிவசுப்பிரமணியத்தை கைது செய்ய வலியுறுத்தி உயிரிழந்தவர்களின் உறவினர்களும், பொதுமக்களும் போராட்டம் மேற்கொண்டு வந்தனர்.

இதனையடுத்து நேற்று காலை சிவ சுப்பிரமணியத்தை மேட்டுப்பாளையம் காவல் துறையினர் கைது செய்தனர். அவர் மீது கவனக்குறைவாக கையாண்டு மரணம் விளைவித்தல் (304 ஏ) என்ற பிரிவின் கீழ் வழக்குப்பதிவு செய்யப்பட்டது. இத்தருணத்தில் அப்பிரிவை மாற்றி கொலைக்கு இணையான மரணத்தை ஏற்படுத்துதல் (304_2) என்ற பிரிவு தற்போது பதிவு செய்யப்பட்டுள்ளது.

கைது செய்யப்பட்ட சிவசுப்பிரமணியம் கோவை மத்திய சிறையில் அடைக்கப்பட்டுள்ள நிலையில், வழக்குப் பிரிவை மேட்டுப்பாளையம் காவல் துறையினர் மாற்றியுள்ளனர். இவ்வேளையில் அங்கு ஆபத்தான நிலையில் கட்டப்பட்ட தடுப்புச் சுவர் முழுமையாக அகற்றப்பட வேண்டும் எனவும் அகற்றாவிட்டால் போராட்டம் வெடிக்கும் என அப்பகுதி மக்கள் எச்சரித்துள்ளனர்.