சென்னை: ஜெய் பீம் (Jai Bhim) திரைப்படம் தொடர்பாக அப்படத்தில் உள்ள பெயர், குறியீடு தங்கள் சமுதாயத்தை எதிர்மறையாகக் காட்டுவதாக உள்ளதாகக் கூறி வன்னியர் இன மக்கள், பாமக கட்சியினர் உள்ளிட்டோர் நடிகர் சூர்யாவிற்கு எதிராகத் தங்களது கண்டனங்களை விடுத்துவருகின்றனர்.
இப்படம் தொடர்பாக சிலர் அவருக்கு மிரட்டலும் விடுத்துவருகின்றனர். குறிப்பாக மயிலாடுதுறை பாமக மாவட்ட செயலாளர் பழனிச்சாமி என்பவர் நடிகர் சூர்யாவை எட்டி உதைக்கும் இளைஞருக்கு ஒரு லட்சம் ரூபாய் தருவதாகவும், தரை வழியாக எங்கும் பயணம் செய்ய முடியாது வான் வழியாகத்தான் செல்ல முடியும் என்றும் மிரட்டியுள்ளார்.
இந்நிலையில், பழனிச்சாமி மீது திராவிடர் விடுதலைக் கழகம் சார்பில் காவல் ஆணையர் அலுவலகத்தில் புகார் அளிக்கப்பட்டது. பின்னர் செய்தியாளரைச் சந்தித்த மயிலாடுதுறை மாவட்டச் செயலாளர் உமாபதி, நடிகர் சூர்யா பற்றி பழனிச்சாமி கூறிய கருத்து சாதி வன்மத்தோடு நடந்துகொள்ளும் வகையில் அமைந்துள்ளதாகவும், தமிழ் சினிமாவில் கர்ணன், பரியேறும் பெருமாள் போன்ற ஒடுக்கப்பட்ட மக்களின் வாழ்வாதாரம் தொடர்பான படங்கள் வெளிவந்து தேசிய விருதுகளைக் குவித்துவருவதாகவும் தெரிவித்துள்ளார்.