அண்ணா பிறந்தநாள் விழாவிற்கு ஸ்டாலினுக்கு அழைப்பு!

சென்னை: அறிஞர் அண்ணா பிறந்தநாள் விழாவிற்காக திமுக தலைவர் ஸ்டாலினை சந்தித்து மதிமுக உயர்நிலைக் குழு உறுப்பினர் செங்குட்டுவன் அழைப்பிதழை வழங்கினார்.

சென்னை ஒய்.எம்.சி.ஏ. மைதானத்தில் வரும் செப்டம்பர் 15ஆம் தேதி பேரறிஞர் அண்ணாவின் 111ஆவது பிறந்தநாள் விழா நடைபெற உள்ளது. இதில் திமுக தலைவர் மு.க. ஸ்டாலின் கலந்துகொள்ள உள்ளதாக ஏற்கனவே முடிவு செய்யப்பட்டிருந்தது. இந்நிலையில் இன்று சென்னை அண்ணா அறிவாலயத்தில் ஸ்டாலினை நேரில் சந்தித்து விழாவிற்கான அழைப்பிதழை மதிமுக உயர்நிலைக் குழு உறுப்பினர் டி.ஆர்.ஆர். செங்குட்டுவன் வழங்கினார்.

அதன்பின் அவர் செய்தியாளர்களிடம் பேசுகையில், "மதிமுக பொதுச்செயலாளர் வைகோ அறிவுறுத்தலின்படி திமுக தலைவர் ஸ்டாலினை சந்தித்து மாநாட்டிற்கான அழைப்பிதழை வழங்கியுள்ளோம். இந்த மாநாடு மிகவும் முக்கியமான நேரத்தில் நடக்க உள்ளது. பொருளாதார மந்தநிலை, காஷ்மீர் சிறப்புத் தகுதி ரத்து செய்தபின் தென்னிந்தியாவில் நடக்கும் முதல் மாநாடு ஆகும்" எனத் தெரிவித்தார்.