பள்ளி மாணவர்களை தத்தெடுத்த முன்னாள் மாணவர்கள்!

சென்னை: அரசுப் பள்ளி மாணவர்களை, அப்பள்ளியின் முன்னாள் மாணவர்கள் தத்தெடுத்து உதவி செய்த சம்பவம் ஆசிரியர்களை நெகிழச் செய்துள்ளது.

சென்னை அடுத்த திருவேற்காடு பகுதியில் தேவி கருமாரியம்மன் அரசுப் பள்ளி செயல்பட்டு வருகிறது. இப்பள்ளியில் 1991 முதல் 1993-ஆம் ஆண்டு வரையில் பயின்ற மாணவர்கள் தற்போது அரசு, தனியார் துறைகளில் உயர்பதவியில் இருக்கின்றனர்.

தாய், தந்தை இல்லாத மாணவர்களை தத்தெடுத்த முன்னாள் மாணவர்கள்

இந்நிலையில் அவர்கள் அனைவரும் தாங்கள் பயின்ற பள்ளிக்கு தங்களால் முடிந்த உதவிகளை செய்ய வேண்டும் என்ற நோக்கதோடு தற்போது ஒன்றிணைந்துள்ளனர்.

அதன்படி பள்ளிக்கு வந்த முன்னாள் மாணவர்கள், தலைமையாசிரியர் அறிவுறுத்தலின்படி தாய், தந்தையை இழந்த 13 மாணவ, மாணவிகளை கண்டறிந்து அவர்களுக்கு உதவ முன்வந்தனர். குறிப்பாக, அந்த மாணவர்களுக்கு ரூ.40ஆயிரம் நிதியுதவி, நோட்டு மற்றும் புத்தகங்கள் உள்ளிட்டவற்றையும் வழங்கினர்.

மேலும் இது குறித்து அவர்கள் கூறுகையில், இதுபோல் இனிவரும் காலங்களிலும் தொடர்ந்து உதவி செய்ய உள்ளதாக தெரிவித்தனர்.