ராஜீவ் கொலை வழக்கில் ஏழு பேரை விடுவிக்க கோரிய நளினி வழக்கு தள்ளுபடி

சென்னை: முன்னாள் பிரதமர் ராஜிவ் கொலை வழக்கில் ஆயுள் தண்டனை கைதிகள் 7 பேரை விடுதலை செய்யக்கோரி நளினி தொடர்ந்த வழக்கை தள்ளுபடி செய்து சென்னை உயர்நீதிமன்றம் உத்தரவிட்டுள்ளது.

முன்னாள் பிரதமர் ராஜிவ் காந்தி கொலை வழக்கில் ஆயுள் தண்டனை கைதிகளாக உள்ள 7 பேரை விடுவிக்கக் கோரி கடந்த பிப்ரவரியில் தமிழ்நாடு அரசுக்கு நளினி மனு அனுப்பினார். இதையடுத்து அந்த மனுவை பரிசீலித்து, தங்களை முன்கூட்டி விடுதலை செய்யக்கோரி சென்னை உயர்நீதிமன்றத்தில் வழக்கு தொடர்ந்தார்.

இந்த வழக்கு நீதிபதிகள் சுப்பையா, சரவணன் அமர்வில் விசாரணைக்கு வந்தபோது, 7 பேர் விடுதலை தொடர்பாக அமைச்சரவை அனுப்பிய தீர்மானத்தின் நிலை குறித்து ஆளுநரிடம் தமிழ்நாடு அரசு கேட்டறிய வேண்டும் என நளினி தரப்பில் வாதிடப்பட்டது.

தமிழ்நாடு அரசு தரப்பில், முன் கூட்டியே விடுதலை செய்ய வேண்டும் என நளினி உரிமையாக கேட்க முடியாது எனவும், அது அரசின் தனிப்பட்ட அதிகாரத்துக்கு உட்பட்டது என தெரிவித்திருந்தது.

மேலும், இந்திய அரசியலமைப்பு சட்டம் 361-இன் படி, தமிழ்நாடு அரசு அனுப்பிய தீர்மானத்தின் மீதான நடவடிக்கை குறித்து ஆளுநரிடம் விளக்கம் கேட்க முடியாது. ஆளுநருக்கு சட்ட பாதுகாப்பு உள்ளது. 7 பேர் விடுதலை விவகாரம் ஆளுநரின் பரீசிலனையில் உள்ளது எனத் தெரிவிக்கப்பட்டது.

இரு தரப்பு வாதங்களும் நிறைவடைந்த நிலையில், வழக்கின் தீர்ப்பை ஒத்திவைத்த நீதிபதிகள் இன்று தீர்ப்பு வழங்கினர்.

அதில், தமிழ்நாடு அரசு பரிந்துரை செய்த ஆளுநரிடம் உள்ள தீர்மானத்தின் மீது பரிசீலனைக்கு உத்தரவிட முடியாது எனக்கூறி நளினியின் மனுவை தள்ளுபடி செய்தனர்.