கரோனா தடுப்புப் பணிகளுக்கு கைதிகளை ஈடுபடுத்த உயர் நீதிமன்றம் மறுப்பு!

சென்னை: கரோனா தடுப்பு நடவடிக்கைகளுக்கும், பாதுகாப்புக்கும் தமிழ்நாடு முழுவதும் சிறைகளில் அடைக்கப்பட்டுள்ள தண்டனைக் கைதிகளைப் பயன்படுத்தக் கோரிய வழக்கை சென்னை உயர் நீதிமன்றம் தள்ளுபடி செய்துள்ளது.

கைதிகளை சமூக சேவைகளில் ஈடுபடுத்தி சீர்திருத்த வழிவகை செய்யப்பட்டுள்ளதால், தமிழ்நாடு முழுவதும் உள்ள மத்திய சிறை மற்றும் மாவட்ட சிறைகளில் அடைக்கப்பட்டுள்ள தண்டனைக் கைதிகளை, கரோனா தடுப்பு நடவடிக்கைகளிலும், பாதுகாப்புப் பணிகளிலும் ஈடுபடுத்தக் கோரி வழக்கறிஞர் ஸ்ரீதர் என்பவர் சென்னை உயர் நீதிமன்றத்தில் வழக்கு தொடர்ந்திருந்தார்.

இந்த வழக்கு நீதிபதிகள் வினீத் கோத்தாரி, புஷ்பா சத்திய நாராயணா ஆகியோர் அடங்கிய அமர்வில், காணொலிக் காட்சி மூலம் விசாரணைக்கு வந்தது. அப்போது, அரசுத் தரப்பில் ஆஜரான வழக்கறிஞர், கைதிகளைச் சிறைக்கு வெளியில் பணியில் அமர்த்துவது என்பது அபாயகரமானது எனவும், அவர்கள் தப்பியோட வாய்ப்புள்ளதாகவும் தெரிவித்தார்.

மேலும், கரோனா தடுப்பு நடவடிக்கைகளில் 40 ஆயிரத்திற்கும் மேற்பட்ட தன்னார்வலர்கள் ஈடுபட்டுள்ளதால், சிறைக் கைதிகளை ஈடுபடுத்த வேண்டும் என்ற கோரிக்கையை ஏற்கக் கூடாது எனவும் வாதிட்டார். அரசுத் தரப்பு வாதத்தை ஏற்றுக்கொண்ட நீதிபதிகள், சிறைகளில் கைதிகளுக்கு ஏற்கனவே சீர்திருத்த நடவடிக்கைகள் எடுக்கப்பட்டுள்ளதாகவும், தற்போதைய நிலையில் அவர்களைச் சிறைக்கு வெளியில் அழைத்து வந்து பணி அமர்த்த வேண்டிய அவசியம் எழவில்லை எனவும் தெரிவித்து, மனுவைத் தள்ளுபடி செய்தனர்.

இதையும் படிங்க: இளைஞர்களின் வேலைவாய்ப்பை பறிக்கும் செயல்!