78 கூடுதல் வழித்தடங்களுக்கு அனுமதி: விமான போக்குவரத்துத் துறை அமைச்சர்

உடான் 4.0 திட்டத்தின்கீழ் புதிய விமான வழித்தடங்களுக்கு மத்திய அரசு அனுமதி அளித்துள்ளது.

78 கூடுதல் வழித்தடங்களுக்கு அனுமதி அளிக்கப்பட்டுள்ளதாக விமான போக்குவரத்துத் துறை அமைச்சர் ஹர்தீப் சிங் புரி தெரிவித்துள்ளார். நாடு முழுவதும் விமான போக்குவரத்துத் துறையை மேம்படுத்தும்விதமாக மத்திய அரசு 2016ஆம் ஆண்டு உடான் திட்டத்தை அறிமுகப்படுத்தியது. அதன்படி, புதிய விமான நிலையங்கள், வழித்தடங்கள் ஆகியவை உருவாக்கப்பட்டுவருகின்றன.

இந்தத் திட்டம் தொடர்பாக மத்திய விமான போக்குவரத்துத் துறை அமைச்சர் ஹர்தீப் சிங் புரி முக்கிய அறிவிப்பை வெளியிட்டுள்ளார். அதில், உடான் நான்காம் கட்ட திட்டம் தற்போது தயாராகியுள்ளது. அதன்படி புதிதாக 78 வழித்தடங்களுக்கு அரசு ஒப்புதல் அளித்துள்ளது. இதையடுத்து நாட்டின் மொத்த வழித்தடம் 766ஆக அதிகரித்துள்ளது.

மேலும், இந்தப் புதிய திட்டத்தின் மூலம் நாட்டின் சுற்றுலாத் துறை மேம்பட்டு, தற்சார்பு இந்தியா உருவாக வழிவகுக்கும் எனக் கூறியுள்ளார்.

இந்தத் திட்டத்தைச் செயல்படுத்த மாநில அரசுகள், விமான நிலையங்களுக்கு உரிய நிதித் தேவை விரைவில் ஒதுக்கீடு செய்யப்படும் எனவும் அவர் கூறியுள்ளார்.

இதையும் படிங்க:பங்குச் சந்தை நிலவரம்: ஜிஎஸ்டி சலுகையை எதிர்நோக்கும் ஆட்டோமொபைல் துறை!