ஓ.பி.சி. வகுப்பினருக்கு 50% இட ஒதுக்கீடு வழக்கு, தீர்ப்பு ஒத்திவைப்பு

சென்னை: மருத்துவ படிப்பில் அகில இந்திய ஒதுக்கீட்டில் இதர பிற்படுத்தப்பட்ட வகுப்பினருக்கு 50% இட ஒதுக்கீடு வழங்க உத்தரவிடக் கோரிய வழக்கின் தீர்ப்பு ஜூலை 27ஆம் தேதி வெளியாகிறது.

மருத்துவப் படிப்புகளில் அகில இந்திய ஒதுக்கீட்டு இடங்களில், இதர பிற்படுத்தப்பட்ட பிரிவினருக்கு 50% இடஒதுக்கீடு வழங்கக் கோரி திமுக, அதிமுக, மதிமுக, இந்திய கம்யூனிஸ்ட் கட்சி, மார்க்சிஸ்ட் கம்யூனிஸ்ட் கட்சி, விடுதலைச் சிறுத்தைகள் உள்ளிட்ட கட்சிகள் சார்பாக சென்னை உயர் நீதிமன்றத்தில் தனித்தனியாக வழக்குகள் தொடரப்பட்டிருந்தன.

இந்த வழக்குகள் தலைமை நீதிபதி ஏ.பி.சாஹி, செந்தில்குமார் ராமமூர்த்தி ஆகியோர் அடங்கிய அமர்வுக்கு முன்பு விசாரணைக்கு வந்தது.

அப்போது, திமுக சார்பில் ஆஜரான மூத்த வழக்குரைஞர் வில்சன், உச்சநீதிமன்ற தீர்ப்பு மற்றும் இந்திய மருத்துவ கவுன்சில் விதிப்படி, இட ஒதுக்கீடு தொடர்பாக மாநில அரசு சட்டம் இயற்றாமல் இருந்தால் மட்டுமே மத்திய அரசு முடிவெடுக்க முடியும்.

மத்திய அரசு கவுன்சிலிங் நடத்தும் ஒரு அமைப்பு மட்டுமே, இட ஒதுக்கீடு தொடர்பாக முடிவெடுக்க மாநில அரசுகளுக்கே முழு அதிகாரம் உள்ளது. கடந்த நான்கு ஆண்டுகளில் மூன்று ஆயிரத்து 580 இடங்கள் மத்திய அரசுக்கு வழங்கப்பட்டது.

இடஒதுக்கீடு வழங்காததால் இரண்டு ஆயிரத்து ஏழு நூறுக்கும் மேற்பட்ட இதர பிற்படுத்தப்பட்ட வகுப்பை சேர்ந்த தமிழ்நாடு மாணவர்களின் மருத்துவ படிப்பிற்கான இடம் பறிபோகியுள்ளது.

இட ஒதுக்கீடு விவகாரத்தில் மாநில அரசின் உரிமைகளை மத்திய அரசு திருடி கொண்டிருக்கிறது" என தெரிவித்தார்.

தமிழ்நாடு அரசு சார்பில் ஆஜரான வழக்குரைஞர், "தமிழ்நாட்டில் 69 சதவீத இடஒதுக்கீடு முறை இருக்கும் போது, மத்திய அரசு 27 சதவீத இடஒதுக்கீடு வழங்குவது தவறான நடைமுறையாகும். தமிழ்நாட்டில் தான் அதிகளவில் பிற்படுத்தப்பட்ட மற்றும் மிகவும் பிற்படுத்தப்பட்ட பிரிவை சேர்ந்த மக்கள் உள்ளனர்.

ஒவ்வொரு மாநிலத்திலும் சாதி வாரியான மக்கள் தொகையின் அடிப்படையில் 50 சதவீதம் என்ற கணக்கில் இடஒதுக்கீடை அதிகரிக்கலாம் என உச்சநீதிமன்றமே தெரிவித்துள்ளது. பட்டியலின சாதிகள் மற்றும் பழங்குடியினருக்கு இட ஒதுக்கீடு வழங்கும் போது இதர பிற்படுத்தப்பட்டோருக்கு இட ஒதுக்கீடு மறுப்பது சட்ட விரோதமானது.

தமிழ்நாடு வரலாற்றிலேயே முதல் முறையாக ஆளும் கட்சி, எதிர்க்கட்சி என அனைத்து அரசியல் கட்சிகளும் மத்திய அரசுக்கு எதிராக உள்ளது" என தெரிவித்தார்.

இதனையடுத்து, மத்திய அரசு சார்பில் ஆஜரான வழக்குரைஞர், "மருத்துவ மேற் படிப்புகளில் இட ஒதுக்கீடு முறை பின்பற்ற கூடாது என இந்திய மருத்துவ கவுன்சில் விதி உள்ளது. தகுதியின் (merit) அடிப்படையில் மட்டுமே மாணவர்களுக்கு இடம் ஒதுக்கப்படும்அதே நேரத்தில், உச்சநீதிமன்ற உத்தரவுப் படியே எஸ்.சி/எஸ்.டி மாணவர்களுக்கு இட ஒதுக்கீடு வழங்கப்படுறது.

மருத்துவ மேற்படிப்புகளில் ஒ.பி.சி. மாணவர்களுக்கு இட ஒதுக்கீடு வழங்க அவசியமில்லை என்பதற்கான பல உயர் நீதிமன்ற மற்றும் உச்ச நீதிமன்ற தீர்ப்புகள் ஆதாரமாக உள்ளன. அகில இந்திய ஒதுக்கீடு இடங்கள் நிரம்பாமல் இருந்தால், அது தமிழ்நாடு அரசுக்கு வழங்கப்படும்" என தெரிவித்தார்.

இதையடுத்து நீதிபதிகள், மாநில அரசுகளின் ஒதுக்கீடு முறையை பின்பற்ற வேண்டும் என்ற முந்தைய உச்சநீதிமன்ற உத்தரவுகளுக்கு ஏன் மத்திய அரசு கட்டுப்படவில்லை? என கேள்வி எழுப்பினர்.

மேலும், இது தொடர்பாக மத்திய அரசு உடனடியாக பதில் அளிக்க வேண்டுமென உத்தரவிட்டு, தீர்ப்பு தேதியை வருகிற 27ஆம் தேதிக்கு ஒத்திவைத்தனர்.