ஜாம்பவான் ஃபெடரரின் மகுடத்தில் ஏறிய மற்றொரு வைரக்கல்!

சர்வதேச டென்னிஸ் போட்டிகளில் ஆயிரத்து 200 வெற்றிகளை பதிவு செய்த இரண்டாவது வீரர் என்ற சாதனையை சுவிட்சர்லாந்தின் நட்சத்திர வீரர் ரோஜர் ஃபெடரர் படைத்துள்ளார்.

மாட்ரிட் ஓபன் டென்னிஸ் தொடர், ஸ்பெயின் நாட்டின் மாட்ரிட் நகரில் நடைபெற்றுவருகிறது. இதில், ஆடவர் ஒற்றையர் பிரிவு மூன்றாம் சுற்று ஆட்டத்தில் சுவிட்சர்லாந்தின் நட்சத்திர வீரர் ரோஜர் ஃபெடரர், ஃபிரான்ஸ் நாட்டைச் சேர்ந்த கெயல் மான்ஃபில்ஸ் உடன் பலப்பரீட்சை நடத்தினார்.

ஆட்டத்தின் முதல் செட்டை 6-0 என்ற கணக்கில் லாவகமாக கைப்பற்றிய ஃபெடரர், இரண்டாவது செட்டை 4-6 என்ற கணக்கில் பறிகொடுத்தார். இதனால், ஆட்டத்தின் வெற்றியாளரை தீர்மானிக்கும் மூன்றாவது செட் போட்டியில் 7-6 என்ற கணக்கில் டை பிரக்கர் முறையில் வென்றார். இறுதியில், ஃபெடரர் 6-0, 4-6, 7-6 என்ற செட் கணக்கில் வெற்றிபெற்று காலிறுதிச் சுற்றுக்கு முன்னேறினார்.

இந்த வெற்றியின் மூலம், ஃபெடரர், சர்வதேச டென்னிஸ் போட்டிகளில் ஆயிரத்து 200 போட்டிகளில் வெற்றிபெற்ற இரண்டாவது வீரர் என்ற சாதனையை படைத்தார். ஜாம்பவான் வீரராக திகழ்ந்து வரும் ஃபெடரரின் மகுடத்திற்கு இந்த வெற்றி மற்றொரு வைரக்கல்லாக பதிந்துள்ளது. முன்னதாக இச்சாதனையை அமெரிக்க வீரர் ஜம்மி கான்னர்ஸ் (1274 வெற்றி) படைத்திருந்தார் என்பது குறிப்பிடத்தக்கது.