மருத்துவமனைகளுக்கு புதிய வழிகாட்டுதல்கள் - மத்திய சுகாதாரத் துறை அமைச்சகம்

டெல்லி: கரோனா நோயாளிகளுக்கு சிகிச்சை அளிக்காத மருத்துவமனைகளுக்கான புதிய வழிகாட்டுதல்களை மத்திய சுகாதாரத் துறை அமைச்சகம் வெளியிட்டுள்ளது.

கரோனா வைரஸ் நோய் இந்தியாவில் வேகமாக பரவிவருகிறது. கரோனா நோயாளிகளுக்கு சிகிச்சை அளிக்காத மருத்துவமனைகளில் வைரஸ் பரவலை கட்டுப்படுத்தும் விதமாக புதிய வழிகாட்டுதல்களை மத்திய சுகாதாரத் துறை அமைச்சகம் வெளியிட்டுள்ளது.

அதன்படி, நோய் பரவலை பொறுத்து மருத்துவமனை நான்கு பகுதிகளாக பிரிக்கப்பட்டுள்ளது. பதிவு மையம், மருத்துவர்களின் அறை, மருந்தகம், அவசர பிரவு நோயாளிகளுக்கு சிகிச்சை அளிக்கும் வார்டு, சமையலறை, வாகனம் நிறுத்துமிடம் ஆகியவை மிக குறைந்த அபாயம் உள்ள பகுதியாக வகைப்படுத்தப்பட்டுள்ளது.

ரத்த வங்கி, பரிசோதனை மையம் ஆகியவை குறைந்த அபாயம் உள்ள பகுதியாகவும் சுவாச கோளாறு பிரச்னைகளுக்கான மாதிரிகளை சேகரிக்கும் ஆய்வகத்தை மிதமான அபாயம் உள்ள பகுதியாகவும் வகைப்படுத்தப்பட்டுள்ளது. கடும் காய்ச்சலால் பாதிக்கப்பட்ட நோயாளிகளுக்கு சிகச்சை அளிக்கும் பகுதியை அதிக அபாயம் உள்ள பகுதியாக சுகாதாரத் துறை அமைச்சகம் பிரித்துள்ளது.

மேலும், அதிக அபாயம் உள்ள பகுதிகளில் அனைத்து விதமான நோய் தடுப்பு மருத்துவ உபகரணங்களையும் பயன்படுத்த வேண்டும் என அமைச்சகம் வெளியிட்டுள்ள அறிக்கையில் தெரிவிக்கப்பட்டுள்ளது.

அதுமட்டுமின்றி, தகுந்த இடைவெளியை கடைப்பிடிப்பது மட்டுமல்லாமல் மூன்றடுக்கு முகக்கவசம், கையுறை, கிருமி நாசினி ஆகியவற்றை மிகக்குறைந்த அபாயம் உள்ள பகுதிகளில் பயன்படுத்த வேண்டும்.

N - 95 முகக்கவசம், மருத்துவ கண்ணாடி, கையுறை ஆகியவற்றை மிதமான அபாயம் உள்ள பகுதிகளில் பயன்படுத்த வேண்டும். அனைத்து நேரத்திலும் முன்னெச்சரிக்கை நடவடிக்கைகளை பின்பற்ற வேண்டும். நோய் தடுப்பு மருத்துவ உபகரணங்களுக்கு அடிப்படை மருத்துவ நடவடிக்கைகள் மாற்று அல்ல என குறிப்பிடப்பட்டுள்ளது.

இதையும் படிங்க: மனிதர்களுக்கு பூட்டு... விலங்குகளுக்கு சுதந்திரம்!