'வாக்குகளால் வாழ்த்திய மக்களுக்கு நன்றி' - எடியூரப்பா

பெங்களூரு: வாக்குகளால் வாழ்த்தி பாஜகவை வெற்றி பெறச் செய்த மக்களுக்கு, கர்நாடக முன்னாள் முதலமைச்சரும், அம்மாநில பாஜக தலைவருமான எடியூரப்பா நன்றி தெரிவித்துள்ளார்.

17ஆவது மக்களவைத் தேர்தலுக்கான வாக்குப்பதிவு ஏழு கட்டங்களாக கடந்த ஏப்ரல் 11ஆம் தேதி முதல் மே 19ஆம் தேதி வரை விறுவிறுப்பாக நடந்து முடிந்தது. இதில் பதிவான வாக்குகள் இன்று எண்ணப்பட்டு வருகின்றன.

இதில் பாஜக 118 தொகுதிகளில் முன்னிலையிலும், 229 இடங்களில் வெற்றியையும் பெற்றுள்ளது. கர்நாடகா மாநிலத்தைப் பொறுத்தவரை மொத்தமுள்ள 28 தொகுதிகளில் பாஜக 23 இடங்களில் வெற்றி பெற்றுள்ளது. இரண்டு தொகுதிகளில் முன்னிலையில் உள்ளது.

இந்நிலையில், இது தொடர்பாக ட்வீட் செய்த பாஜக மாநிலத் தலைவர் எடியூரப்பா, "மக்களவைத் தேர்தலில் வெற்றிபெற்ற அனைவருக்கும் வாழ்த்துகள். வாக்குகளால் வாழ்த்தி பாஜக வெற்றி பெறச் செய்த மக்களுக்கு நன்றி", எனக் குறிப்பிட்டுள்ளார்.