வடகிழக்கு பருவமழை குறித்து புதுச்சேரி முதலமைச்சர் ஆலோசனை

வடகிழக்கு பருவமழை மற்றும் புயலில் இருந்து மக்களை காப்பாற்ற அனைத்து நடவடிக்கைகளும் எடுக்கப்பட்டுள்ளது என முதலமைச்சர் நாராயணசாமி தெரிவித்துள்ளார்.

புதுச்சேரி தலைமைச் செயலகத்தின் 3ஆவது மாடியில் உள்ள கூட்ட அரங்கத்தில் முதலமைச்சர் நாராயணசாமி தலைமையில் வடகிழக்கு பருவமழை எதிர்கொள்வது சம்பந்தமாக கலந்தாலோசனை கூட்டம் நடைபெற்றது.

அதன் பின்னர் செய்தியாளர்களைச் சந்தித்த முதலமைச்சர் நாராயணசாமி கூறும்போது, " வரக்கூடிய பருவ மழை புயலாக மாற வாய்ப்புகள் உள்ளன. மிகப்பெரிய மழை, வெள்ளம் வந்தால் தடையில்லாமல் மின்சாரம் வழங்கவும், தாழ்வான பகுதிகளில் மழை நீரை வெளியேற்றவும், பாதுகாப்பான பகுதிகளில் தங்க வைக்கப்பட்டுள்ளவர்களுக்கு தேவையான உணவு வழங்கவும் கூட்டத்தில் ஆலோசிக்கப்பட்டது. மேலும் மருத்துவத்துறை சார்பாக டெங்கு, மலேரியா போன்ற நோய் பரவாமல் இருக்க கிருமிநாசினி தெளிக்க உத்தரவிடப்பட்டுள்ளது.

தாழ்வான பகுதிகளில் மழை நீர் தேங்கினால் மோட்டார் மூலம் நீரை வெளியேற்ற நடவடிக்கை எடுக்கப்பட்டு வருகின்றது. அனைத்து துறைகளும் தயார் நிலையில் இருக்க வேண்டும் என்றும், பாதிக்கப்பட்ட மக்களுக்கு தேவையான மருந்துகளை தயார் நிலையில் இருக்க அறிவுறுத்தப்பட்டுள்ளது. நோய் பாதிப்பு ஏற்படும் மக்களுக்கு தடுப்பு ஊசி போட நடவடிக்கை எடுக்கப்பட்டு வருகின்றது” என்றார்.

பொதுப்பணித்துறை சார்பில் உப்பனாறு உள்ளிட்ட பல வாய்க்கால்கள் தூர்வாரப்பட்டு, தாழ்வான பகுதிகளில் மழை நீர் தேங்காமல் உடனடியாக கடலில் கலக்க நடவடிக்கை எடுக்கப்பட்டுள்ளதாகவும் அவர் தெரிவித்தார்.

இக்கூட்டத்தில் பொதுப்பணித்துறை அமைச்சர் நமச்சிவாயம், சுகாதாரத்துறை அமைச்சர் மல்லாடி கிருஷ்ணாராவ், சமூக நலத்துறை அமைச்சர் கந்தசாமி, வருவாய்த்துறை அமைச்சர் ஷாஜகான், தலைமைச் செயலர் அஸ்வனி குமார் மற்றும் அனைத்து துறை செயலர்கள் இயக்குநர்கள் மற்றும் வருவாய் பேரிடர் துறை, கடலோர காவல்படை அலுவலர்கள் கலந்து கொண்டனர்.

இதையும் படிங்க:வடகிழக்குப் பருவமழை: முதலமைச்சர் ஆலோசனை