பொருளாதாரத்தை மீட்டெடுக்க மோடி அரசு உறுதியாக உள்ளது - அமித் ஷா

டெல்லி: வேலைவாய்ப்பை உருவாக்கி சிறு தொழில் நிறுவனங்களுக்கு உதவி செய்து பொருளாதாரத்தை மீட்டெடுப்பதில் மோடி அரசு உறுதியாக உள்ளது என மத்திய உள்துறை அமைச்சர் அமித் ஷா தெரிவித்துள்ளார்.

கரோனா வைரஸ் பாதிப்பு காரணமாக பொருளாதாரம் பெரும் நெருக்கடியை சந்தித்துள்ளது. இதனை மீட்டெடுக்கும் வகையில் 20 லட்சம் கோடி ரூபாய் மதிப்பிலான ஊக்குவிப்பு திட்டம் குறித்து மத்திய நிதியமைச்சர் நிர்மலா சீதாராமன் நேற்று விவரித்தார். சிறு, குறு மற்றும் நடுத்தர தொழில் நிறுவனங்கள் கடன் பெறுவதற்கான உத்தரவாதத்தை அரசே வழங்கும் என்பன போன்ற பல்வேறு திட்டங்களை அவர் அறிவித்தார்.

பொருளாதார ஊக்குவிப்பு திட்டம் குறித்து பேசிய அமித் ஷா, வேலைவாய்ப்பை உருவாக்கி சிறு தொழில் நிறுவனங்களுக்கு உதவி செய்து பொருளாதாரத்தை மீட்டெடுப்பதில் மோடி அரசு உறுதியாக உள்ளது என தெரிவித்தார்.

இதுகுறித்து அவர் தனது ட்விட்டர் பக்கத்தில், "கரோனாவால் ஏற்பட்டுள்ள சவால்களை சமாளிக்கும் வகையில், சிறு, குறு மற்றும் நடுத்தர தொழில் நிறுவனங்களுக்கு உதவும் நோக்கில் நடவடிக்கைகளை எடுத்த பிரதமர் மோடி, மத்திய நிதியமைச்சர் நிர்மலா சீதாராமன் ஆகியோருக்கு நன்றி. வேலை வாய்ப்பை உருவாக்கி சிறு தொழில் நிறுவனங்களுக்கு உதவி செய்து பொருளாதாரத்தை மீட்டெடுப்பதில் மோடி அரசு உறுதியாக உள்ளது என்பது இதன்மூலம் தெரியவருகிறது.

சிறு, குறு மற்றும் நடுத்தர தொழில் நிறுவனங்கள் உள்ளிட்ட வணிகர்களுக்கு 3 லட்சம் கோடி ரூபாய் மதிப்பில் உத்தரவாதம் இல்லாத வங்கிக் கடனை வழங்க மோடி அரசு திட்டமிட்டுள்ளது. கரோனாவால் ஏற்பட்டுள்ள சவால்களை சமாளித்து கடனை அடைத்து வணிகத்தை மீண்டும் தொடங்க இது உதவும். இதனால், 45 லட்சம் தொழிலாளர்கள் பயனடைவர். பெருந்தொற்றால் சிறு குறு மற்றும் நடுத்தர தொழில் நிறுவனங்கள் சந்தித்த பிரச்னைகள், விவகாரங்கள் குறித்து மோடி அரசு புரிந்து கொண்டுள்ளது.

இம்மாதிரியான இக்கட்டான சூழ்நிலையில் 20,000 கோடி ரூபாய் மதிப்பிலான துணை கடனை அரசு வழங்க உள்ளது. இதன்மூலம் 2 லட்சம் சிறு குறு மற்றும் நடுத்தர தொழில் நிறுவனங்கள் பயன்பெறவுள்ளன. நிதியை திரட்ட சிரமப்படும் வங்கி சாரா நிதி நிறுவனங்களுக்கு உதவும் நோக்கில் 30,000 கோடி மதிப்பிலான சிறப்பு பணப்புழக்க திட்டத்தை அரசு அமல்படுத்தவுள்ளது. இதன்மூலம் பணப்புழக்கம் அதிகரிக்கப்படும். சந்தையில் நம்பிக்கை ஏற்படும்" என பதிவிட்டுள்ளார்.

இதையும் படிங்க: 'மீதமுள்ள 16.4 லட்சம் கோடி எங்கே?' - ப.சி. கேள்வி! சிதம்பர ரகசியத்தை இன்று உடைக்குமா அரசு?