திணறடிக்கும் காற்று மாசுபாடு; நாசா புகைப்படத்தை சுட்டிக்காட்டிய டெல்லி அரசு

டெல்லி: தலைநகர் டெல்லியில் காற்று மாசுபாடு நாளுக்கு நாள் அதி தீவிரமடைந்துவரும் நிலையில், இதன் தற்போதைய நிலை குறித்த நாசாவின் புகைப்படத்தை டெல்லி அரசு பகிர்ந்துள்ளது.

தலைநகர் டெல்லியைத் தொடர்ந்து அச்சுறுத்தும் ஒன்றாக காற்று மாசு இருந்துவருகிறது. வாகனங்களிலிருந்து வரும் புகை ஒரு பக்கமிருக்க அதிகளவிலான குப்பை எரியூட்டுதல், அண்டை மாநிலங்களில் விளைச்சலுக்கு பின் எரியூட்டும் பயிர்கள் உள்ளிட்டவை காற்று மாசுபாட்டை மென்மேலும் அதிகரிக்கச் செய்துள்ளது.

அண்டை மாநிலங்களான உத்தரப் பிரதேசம், ஹரியானா ஆகிய மாநிலங்களில் எரிக்கப்படும் பயிர்களால் ஏற்படும் புகை மண்டலம் டெல்லியை சூழ்ந்து பாதிப்பை ஏற்படுத்துவதாக மாசுக்கட்டுப்பாட்டு வாரியம் தெரிவிக்கிறது.

டெல்லியில் ஒட்டுமொத்த காற்றின் தரக் குறியீடு (AQI) செவ்வாய்க்கிழமை மாலை 6.30 மணியளவில் 275 புள்ளியைத் தொட்டுள்ளது. மேலும், அண்டை நகரங்களான காசியாபாத், நொய்டா, லோனி தெகட் உள்ளிட்ட பகுதிகள் 300 புள்ளிகளைத் தொட்டுள்ளன. காற்றின் தரக் குறியீடு அளவீட்டின்படி 201 முதல் 300 புள்ளிகள் மிக மோசமான நிலையில் உள்ளதைக் குறிக்கிறது.

மேலும், எரியூட்டும் பயிர்கள் உள்ளிட்டவை காற்றை எந்த அளவில் பாதித்துள்ளது என்பது பற்றிய புகைப்படத்தை நாசா வெளியிட்டுள்ளது. இதே நிலை தொடர்ந்தால் காற்றின் தரம் குறைந்து பல்வேறு இடர்பாடுகளை சந்திக்க நேரிடும் என்று டெல்லி அரசு எச்சரித்து அந்தப் புகைப்படத்தையும் பகிர்ந்துள்ளது.