ਕੋਰੋਨਵਾਇਰਸ ਸਕਾਰਾਤਮਕ ਪਾਏ ਗਏ 48 ਸਾਲਾ ਮਰੀਜ਼ ਦੇ ਬੁਰੀ ਤਰ੍ਹਾਂ ਨੁਕਸਾਨੇ ਗਏ ਫੇਫ਼ੜਿਆਂ ਨੂੰ ਚੇਨਈ ਦੇ ਇੱਕ ਹਸਪਤਾਲ ਦੇ ਡਾਕਟਰਾਂ ਨੇ ਸਫਲਤਾਪੂਰਵਕ ਬਦਲ ਦਿੱਤਾ ਹੈ। ਪ੍ਰਾਈਵੇਟ ਹਸਪਤਾਲ ਨੇ ਆਪਣੇ ਬਿਆਨ ਵਿੱਚ ਦਾਅਵਾ ਕੀਤਾ ਹੈ ਕਿ ਏਸ਼ਿਆ ਵਿੱਚ ਕੋਵਿਡ-19 ਸਕਾਰਾਤਮਕ ਮਰੀਜ਼ ਦੇ ਫੇਫ਼ੜਿਆਂ ਦੇ ਟ੍ਰਾਂਸਪਲਾਂਟ ਦਾ ਇਹ ਪਹਿਲਾ ਮਾਮਲਾ ਹੈ। ਉੱਥੇ ਹੀ ਇਹ ਤਾਲਾਬੰਦੀ ਤੋਂ ਬਾਅਦ ਹਸਪਤਾਲ ਵਿੱਚ ਫੇਫ਼ੜਿਆਂ ਦਾ ਦੂਜਾ ਟ੍ਰਾਂਸਪਲਾਂਟ ਹੈ।
ਹਸਪਤਾਲ ਨੇ ਕਿਹਾ ਹੈ ਕਿ ਦਿੱਲੀ ਦਾ ਕੋਵਿਡ-19 ਮਰੀਜ਼ ਫੇਫ਼ੜੇ ਦੀ ਗੰਭੀਰ ਲਾਗ ਨਾਲ ਪੀੜਤ ਸੀ। ਕੋਵਿਡ -19 ਨਾਲ ਸਬੰਧਿਤ ਫ਼ਾਈਬਰੋਸਿਸ ਦੇ ਕਾਰਨ ਉਸ ਦੇ ਫੇਫ਼ੜਿਆਂ ਦਾ ਬੁਰੀ ਤਰ੍ਹਾਂ ਨੁਕਸਾਨ ਹੋ ਗਿਆ ਸੀ।
ਐਮਜੀਐਮ ਹੈਲਥਕੇਅਰ ਦੇ ਅਨੁਸਾਰ ਮਰੀਜ਼ ਦਾ ਕੋਵਿਡ ਟੈਸਟ 8 ਜੁਲਾਈ ਨੂੰ ਸਕਾਰਾਤਮਕ ਆਇਆ ਤੇ ਉਸ ਦੇ ਫੇਫ਼ੜਿਆਂ ਦਾ ਥੋੜਾ ਜਿਹਾ ਹਿੱਸਾ ਕੰਮ ਕਰ ਰਿਹਾ ਸੀ। ਸਥਿਤੀ ਵਿਗੜਨ ਕਾਰਨ ਉਸ ਨੂੰ ਵੈਂਟੀਲੇਟਰ ਸਹਾਇਤਾ ਦਿੱਤੀ ਗਈ। ਬਾਅਦ ਵਿੱਚ ਉਸ ਨੂੰ 20 ਜੁਲਾਈ ਨੂੰ ਐਮਜੀਐਮ ਹੈਲਥਕੇਅਰ ਗਾਜ਼ੀਆਬਾਦ ਤੋਂ ਚੇਨਈ ਭੇਜਿਆ ਗਿਆ।
ਉੱਥੇ ਉਸ ਨੂੰ ਇੱਕ ਮਹੀਨੇ ਤੋਂ ਵੱਧ ਸਮੇਂ ਲਈ ਈਸੀਐਮਓ ਸਹਾਇਤਾ ਦਿੱਤੀ ਗਈ। ਬਾਅਦ ਵਿੱਚ ਡਾਕਟਰਾਂ ਨੇ ਉਸ ਦੇ ਫੇਫ਼ੜਿਆਂ ਨੂੰ ਟ੍ਰਾਂਸਪਲਾਂਟ ਕਰਨ ਦਾ ਫ਼ੈਸਲਾ ਕੀਤਾ। 27 ਅਗਸਤ ਨੂੰ ਕਰਵਾਏ ਗਏ ਇਸ ਟ੍ਰਾਂਸਪਲਾਂਟ ਦੀ ਅਗਵਾਈ ਕਾਰਡੀਅਕ ਸਾਇੰਸਜ਼ ਦੇ ਚੇਅਰਮੈਨ ਅਤੇ ਡਾਇਰੈਕਟਰ ਡਾ. ਬਾਲਾਕ੍ਰਿਸ਼ਣਨ ਨੇ ਕੀਤਾ।
ਐਮਜੀਐਮ ਹੈਲਥਕੇਅਰ ਨੇ ਕਿਹਾ ਹੈ ਕਿ ਟ੍ਰਾਂਸਪਲਾਂਟ ਤੋਂ ਬਾਅਦ ਮਰੀਜ਼ ਠੀਕ ਹੈ ਅਤੇ ਉਹ ਅਜੇ ਵੀ ਆਈਸੀਯੂ ਵਿੱਚ ਹੈ। ਉਸਦੇ ਬਦਲੇ ਗਏ ਫੇਫ਼ੜੇ ਚੰਗੀ ਤਰ੍ਹਾਂ ਕੰਮ ਕਰ ਰਹੇ ਹਨ।
