ਪਠਾਨਕੋਟ ਦੇ ਆਰਮੀ ਪ੍ਰਤੀਬੰਧਿਤ ਖ਼ੇਤਰ ਅੰਦਰ ਬਣੀਆਂ ਨਜ਼ਾਇਜ ਇਮਾਰਤਾਂ ਕੀਤੀਆਂ ਗਈਆਂ ਸੀਲ

ਪਠਾਨਕੋਟ ਨਗਰ ਨਿਗਮ ਵੱਲੋਂ ਸ਼ਹਿਰ ਦੇ ਆਰਮੀ ਇਲਾਕੇ 'ਚ ਨਜ਼ਾਇਜ ਤਰੀਕੇ ਨਾਲ ਤਿਆਰ ਕੀਤੀਆਂ ਜਾ ਰਹੀਆਂ ਇਮਾਰਤਾਂ ਨੂੰ ਸੀਲ ਕਰ ਦਿੱਤਾ ਗਿਆ ਹੈ। ਆਰਮੀ ਦੇ ਐਮੂਨੇਸ਼ਨ ਡੀਪੂ ਨੇੜੇ ਇੱਕ ਕਿੱਲੋਮੀਟਰ ਦਾਇਰੇ ਅੰਦਰ ਕੋਈ ਨਵੀਂ ਇਮਾਰਤ ਤਿਆਰ ਨਹੀਂ ਕੀਤੀ ਜਾ ਸਕਦੀ।

ਪਠਾਨਕੋਟ: ਨਗਰ ਨਿਗਮ ਨੇ ਆਰਮੀ ਦੇ ਪ੍ਰਤੀਬੰਧਿਤ ਖ਼ੇਤਰ 'ਚ ਤਿਆਰ ਕੀਤੀਆਂ ਜਾ ਰਹੀਆਂ ਨਜ਼ਾਇਜ ਇਮਾਰਤਾਂ ਉੱਤੇ ਵੱਡੀ ਕਾਰਵਾਈ ਕੀਤੀ ਹੈ। ਨਗਰ ਨਿਗਮ ਵੱਲੋਂ ਸ਼ਹਿਰ ਦੇ ਆਰਮੀ ਇਲਾਕੇ ਦੇ ਐਮੂਨੇਸ਼ਨ ਡੀਪੂ ਨੇੜੇ ਇੱਕ ਕਿੱਲੋਮੀਟਰ ਦਾਇਰੇ 'ਚ ਬਣ ਰਹੀਆਂ ਇਮਾਰਤਾਂ ਨੂੰ ਸੀਲ ਕਰ ਦਿੱਤਾ ਹੈ।

ਇਹ ਕਾਰਵਾਈ ਕੁਝ ਸਾਲ ਪਹਿਲਾਂ ਪਠਾਨਕੋਟ ਦੇ ਐਮੂਨੇਸ਼ਨ ਡਿਪੂ 'ਚ ਹੋ ਚੁੱਕੇ ਧਮਾਕੇ ਅਤੇ ਲੋਕਾਂ ਦੀ ਸੁਰੱਖਿਆ ਦੇ ਮੱਦੇਨਜ਼ਰ ਕੀਤੀ ਗਈ ਹੈ। ਫੌਜ ਨੇ ਡਿਪੂ ਦੇ ਨੇੜੇ ਇੱਕ ਕਿੱਲੋਮੀਟਰ ਦਾਇਰੇ ਨੂੰ ਪ੍ਰਤੀਬੰਧਿਤ ਖ਼ੇਤਰ ਐਲਾਨ ਕੀਤਾ ਸੀ। ਇਸ ਪ੍ਰਤੀਬੰਧਿਤ ਖ਼ੇਤਰ ਵਿੱਚ ਕਿਸੇ ਤਰ੍ਹਾਂ ਦੀ ਇਮਾਰਤ ਉਸਾਰੀ ਦੀ ਆਗਿਆ ਨਹੀਂ ਹੈ, ਪਰ ਫਿਰ ਵੀ ਕੁੱਝ ਲੋਕ ਆਪਣੇ ਨਿੱਜੀ ਫਾਇਦੇ ਲਈ ਆਪਣੀ ਜਾਨ ਜੋਖ਼ਿਮ 'ਚ ਪਾ ਕੇ ਪ੍ਰਤੀਬੰਧਿਤ ਖ਼ੇਤਰ 'ਚ ਇਮਾਰਤਾਂ ਦੀ ਉਸਾਰੀ ਕਰ ਰਹੇ ਹਨ।

ਇਸ ਬਾਰੇ ਦੱਸਦੇ ਹੋਏ ਨਗਰ ਨਿਗਮ ਦੇ ਸਹਾਇਕ ਕਮਿਸ਼ਨਰ ਅਜੇ ਸੂਦ ਨੇ ਦੱਸਿਆ ਕਿ ਨਗਰ ਨਿਗਮ ਵੱਲੋਂ ਵੱਡੀ ਕਾਰਵਾਈ ਕਰਦੇ ਹੋਏ ਐਮੂਨੇਸ਼ਨ ਡਿੱਪੂ ਦੇ 1000 ਮੀਟਰ ਦਾਇਰੇ 'ਚ ਬਣ ਰਹੀਆਂ ਇਮਾਰਤਾਂ ਨੂੰ ਪੂਰੀ ਤਰ੍ਹਾਂ ਸੀਲ ਕਰ ਦਿੱਤਾ ਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਇਸ ਤੋਂ ਪਹਿਲਾਂ ਨਵੀਂ ਬਣਿਆਂ ਇਮਾਰਤਾਂ ਦੇ ਮਾਲਿਕਾਂ ਨੂੰ ਨੋਟਿਸ ਜਾਰੀ ਕੀਤੇ ਗਏ ਸਨ ਪਰ ਨਿਯਮਾਂ ਦੀ ਉਲੰਘਣਾ ਦੇ ਕਾਰਨ ਇਨ੍ਹਾਂ ਇਮਾਰਤਾਂ ਨੂੰ ਸੀਲ ਕੀਤਾ ਗਿਆ ਹੈ।