ਮਿੱਟੀ ਦੀ ਢਿੱਗ ਡਿੱਗਣ ਕਾਰਨ ਮਜ਼ਦੂਰ ਦੀ ਮੌਤ

ਮਾਨਸਾ ਦੇ ਪਿੰਡ ਰਿਉਂਦ ਕਲਾਂ ਵਿਖੇ ਇੱਕ ਘਰ ਵਿੱਚ ਨਵੀਂ ਖੂਹੀ ਪੱਟਦੇ ਸਮੇਂ ਮਜ਼ਦੂਰ ਉੱਤੇ ਮਿੱਟੀ ਦੀ ਢਿੱਗ ਡਿੱਗਣ ਕਾਰਨ ਉਸ ਦੀ ਮੌਤ ਹੋ ਗਈ ਹੈ। ਜ਼ਿਲ੍ਹਾ ਪੁਲਿਸ ਅਤੇ ਸਿਵਲ ਪ੍ਰਸ਼ਾਸਨ ਦੇ ਨਾਲ-ਨਾਲ ਪਿੰਡ ਦੇ ਲੋਕਾਂ ਨੇ ਮਜ਼ਦੂਰ ਨੂੰ ਬਚਾਉਣ ਦੇ ਲਈ ਯਤਨ ਕੀਤੇ ਪਰ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ।

ਮਾਨਸਾ: ਬੁਢਲਾਡਾ ਤਹਿਸੀਲ ਦੇ ਪਿੰਡ ਰਿਉਂਦ ਕਲਾਂ ਵਿਖੇ ਇੱਕ ਘਰ ਵਿੱਚ ਟਾਇਲਟ ਦੀ ਖੂਹੀ ਭਰ ਜਾਣ ਕਾਰਨ ਮਜ਼ਦੂਰ ਗੁਰਚਰਨ ਸਿੰਘ ਇੱਕ ਹੋਰ ਨਵੀਂ ਖੂਹੀ ਪੁੱਟਣ ਲੱਗਿਆ ਤਾਂ ਉਸ ਉੱਤੇ ਮਿੱਟੀ ਦੀ ਢਿੱਗ ਡਿੱਗਣ ਕਾਰਨ ਉਹ ਮਿੱਟੀ ਹੇਠ ਦੱਬ ਗਿਆ।

ਘਟਨਾ ਦੀ ਜਾਣਕਾਰੀ ਮਿਲਦੇ ਹੀ ਮਾਨਸਾ ਦੇ ਐੱਸਐੱਸਪੀ ਡਾ. ਨਰਿੰਦਰ ਭਾਰਗਵ ਬੁਢਲਾਡਾ ਦੇ ਐਸਡੀਐਮ ਅਦਿੱਤਿਆ ਡਾਚੀ ਵਾਲ ਅਤੇ ਬੁਢਲਾਡਾ ਦੇ ਡੀਐੱਸਪੀ ਜਸਵਿੰਦਰ ਸਿੰਘ ਪੁਲਿਸ ਪਾਰਟੀ ਅਤੇ ਕਰਮਚਾਰੀਆਂ ਦੇ ਨਾਲ ਘਟਨਾ ਵਾਲੀ ਥਾਂ ਉੱਤੇ ਪਹੁੰਚ ਗਏ ਅਤੇ ਮਜ਼ਦੂਰ ਨੂੰ ਮਿੱਟੀ ਵਿੱਚੋਂ ਕੱਢਣ ਲਈ ਯਤਨ ਕੀਤੇ।

ਮਾਮਲਾ ਗੰਭੀਰ ਦੇਖ ਕੇ ਐਨਡੀਆਰਐਫ ਦੀ ਟੀਮ ਬੁਲਾਈ ਗਈ। ਪਿੰਡ ਦੇ ਸਰਪੰਚ ਸੁਖਦੇਵ ਸਿੰਘ ਨੇ ਦੱਸਿਆ ਕਿ ਗੁਰਚਰਨ ਸਿੰਘ ਆਪਣੇ ਘਰ ਵਿੱਚ ਟਾਇਲਟ ਲਈ ਨਵੀਂ ਖੂਹੀ ਪੁੱਟ ਰਿਹਾ ਸੀ ਜਿਸ ਉੱਤੇ ਮਿੱਟੀ ਦੀ ਢਿੱਗ ਡਿੱਗ ਗਈ। ਉਸ ਨੂੰ ਬਚਾਉਣ ਦੇ ਲਈ ਕਈ ਯਤਨ ਕੀਤੇ ਗਏ ਪਰ ਉਸ ਨੂੰ ਬਚਾਇਆ ਨਹੀਂ ਜਾ ਸਕਿਆ।

ਬੁਢਲਾਡਾ ਦੇ ਐਸਡੀਐਮ ਅਦਿੱਤਿਆ ਦੱਸਿਆ ਕਿ ਮਜ਼ਦੂਰ ਆਪਣੇ ਘਰ ਵਿੱਚ ਟਾਇਲਟ ਦੀ ਨਵੀਂ ਖੂਹੀ ਪੁੱਟ ਰਿਹਾ ਸੀ ਜਿਸ ਤੇ ਮਿੱਟੀ ਦੀ ਢਿੱਗ ਡਿੱਗਣ ਕਾਰਨ ਉਸ ਦੀ ਮੌਤ ਹੋ ਗਈ।