ਮਾਨਸਾ: ਬਰੇਟਾ ਦੇ ਪੀਐਨਬੀ ਬੈਂਕ ਵੱਲੋਂ ਪਿੰਡ ਸ਼ੇਖੂਪੁਰ ਖੁਡਾਲ ਦੇ ਇੱਕ ਕਿਸਾਨ ਦੇ ਬੱਚਤ ਖਾਤੇ ਵਿੱਚ ਆਏ ਪੈਨਸ਼ਨ ਦੇ ਪੈਸੇ ਲਿਮਟ ਦੀ ਆੜ ਵਿੱਚ ਕੱਟ ਲੈਣ ਤੋਂ ਬਾਅਦ ਬੀਕੇਯੂ ਉਗਰਾਹਾਂ ਦੇ ਅਗਵਾਈ ਵਿੱਚ ਕਿਸਾਨਾਂ ਵੱਲੋਂ ਪੀਐਨਬੀ ਬੈਂਕ ਦਾ ਘਿਰਾਓ ਕੀਤਾ ਗਿਆ। ਜਦਕਿ ਬੈਂਕ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਕਿਸਾਨ ਦੇ ਖਾਤੇ ਵਿੱਚ ਇੱਕ ਮਹੀਨੇ ਦੀ ਪੈਨਸ਼ਨ ਹੀ ਆਈ ਹੈ।
ਮਾਨਸਾ ਵਿਖੇ ਕਿਸਾਨਾਂ ਵੱਲੋਂ PNB ਬੈਂਕ ਦਾ ਘਿਰਾਓ
ਕਿਸਾਨ ਮਿੱਠੂ ਸਿੰਘ ਨੇ ਕਿਹਾ ਕਿ ਜਦੋਂ ਉਹ ਆਪਣੇ ਖਾਤੇ ਵਿੱਚੋਂ ਪੈਂਨਸ਼ਨ ਦੇ ਪੈਸੇ ਕਢਵਾਉਣ ਗਿਆ ਤਾਂ ਬੈਂਕ ਵਾਲਿਆਂ ਨੇ ਪੈਸੇ ਦੇਣ ਤੋਂ ਇਨਕਾਰ ਕਰ ਦਿੱਤਾ ਅਤੇ ਕਿਹਾ ਕਿ ਲਿਮਟ ਨਾ ਭਰਨ ਕਰਕੇ ਇਹ ਪੈਸੇ ਕੱਟ ਲਏ ਹਨ। ਇਸਦੇ ਚੱਲਦੇ ਕਿਸਾਨਾਂ ਨੇ ਬੈਂਕ ਦਾ ਘਿਰਾਓ ਕੀਤਾ ਹੈ। ਕਿਸਾਨ ਆਗੂ ਜੋਗਿੰਦਰ ਸਿੰਘ ਦਿਆਲਪੁਰਾ ਨੇ ਕਿਹਾ ਕਿ ਕਿਸਾਨ ਮਿੱਠੂ ਸਿੰਘ ਦੀ ਦੋ ਮਹੀਨਿਆਂ ਦੀ ਪੈਨਸ਼ਨ ਬੈਂਕ ਵਿੱਚ ਜਮ੍ਹਾਂ ਪਈ ਸੀ ਅਤੇ ਜਦੋਂ ਕਿਸਾਨ ਪੈਸੇ ਲੈਣ ਗਿਆ ਤਾਂ ਬੈਂਕ ਵਾਲਿਆਂ ਨੇ ਲਿਮਟ ਨਾ ਭਰਨ ਦੇ ਕਾਰਨ ਪੈਨਸ਼ਨ ਦੇ ਪੈਸੇ ਉਸਦੇ ਖਾਤੇ ਵਿੱਚੋਂ ਕੱਟ ਲਏ।