ਚੰਡੀਗੜ੍ਹ: ਚੰਡੀਗੜ੍ਹ ਪ੍ਰੈੱਸ ਕਲੱਬ ਦੇ ਵਿੱਚ ਲੁਧਿਆਣਾ ਦੇ ਪ੍ਰਵਾਸੀ ਮਜ਼ਦੂਰਾਂ ਨੇ ਇੱਕ ਫਾਈਨੈਂਸਰ ਤੇ ਪੁਲਿਸ ਦੀ ਮਿਲੀ ਭੁਗਤ ਨਾਲ ਉਨ੍ਹਾਂ ਦੀਆਂ ਜਵਾਨ ਧੀਆਂ ਨੂੰ ਗਹਿਣੇ ਰੱਖਣ ਬਾਰੇ ਖੁਲਾਸਾ ਕੀਤਾ। ਪੀੜਤ ਪਰਿਵਾਰ ਦਾ ਕਹਿਣਾ ਹੈ ਕਿ 50 ਸਾਲਾ ਫਾਈਨੈਂਸਰ ਜਸਵਿੰਦਰ ਸਿੰਘ ਵੜੈਚ ਨੇ ਬਿਊਟੀ ਪਾਰਲਰ ਦਾ ਕੰਮ ਕਰਨ ਵਾਲੀ ਮਹਿਲਾ ਮਿੱਤਰ ਅਤੇ ਇੱਕ ਮਹਿਲਾ ਪੁਲਿਸ ਅਧਿਕਾਰੀ ਨਾਲ ਮਿਲ ਕੇ ਉਨ੍ਹਾਂ ਦੀਆਂ ਜਵਾਨ ਧੀਆਂ ਨੂੰ ਗਹਿਣੇ ਰੱਖਣ ਲਈ ਤੰਗ ਕਰ ਰਿਹਾ ਹੈ।
ਆਪਣੀ ਹੱਡ ਬੀਤੀ ਸੁਣਾਉਂਦਿਆਂ ਪੀੜਤ ਲੜਕੀ ਦੀ ਮਾਤਾ ਨੇ ਫਾਈਨੈਂਸਰ ਜੱਸੀ 'ਤੇ ਇਲਜ਼ਾਮ ਲਗਾਉਂਦਿਆਂ ਕਿਹਾ ਕਿ ਪਹਿਲਾਂ ਉਸ ਦੀ ਲੜਕੀ ਨੂੰ 10 ਹਜ਼ਾਰ ਤਨਖ਼ਾਹ 'ਤੇ ਕੰਮ ਕਰਵਾਉਣ ਦਾ ਦਬਾਅ ਬਣਾਇਆ ਗਿਆ। ਉਸ ਦੇ ਜੇਠ ਨੇ ਜੱਸੀ ਤੋਂ 25 ਹਜ਼ਾਰ ਰੁਪਏ ਉਧਾਰ ਲਏ ਹੋਏ ਸਨ। ਜਿਸ ਦੇ ਬਦਲੇ ਜੱਸੀ ਉਨ੍ਹਾਂ ਕੋਲੋਂ ਸਵਾ ਲੱਖ ਰੁਪਈਆ ਲੈ ਚੁੱਕਿਆ ਹੈ ਅਤੇ ਲਗਾਤਾਰ ਉਸ ਦੀ ਲੜਕੀ ਨੂੰ ਉਨ੍ਹਾਂ ਕੋਲ ਵੇਚਣ ਲਈ ਮਜਬੂਰ ਕਰ ਰਿਹੈ ਹੈ।
ਉਨ੍ਹਾਂ ਕਿਹਾ ਕਿ ਜੱਸੀ ਨੇ ਧੋਖੇ ਨਾਲ ਇੱਕ ਐਫੀਡੈਵਿਟ 'ਤੇ ਵੀ ਉਨ੍ਹਾਂ ਕੋਲੋਂ ਹਸਤਾਖ਼ਰ ਕਰ ਕਰਵਾਏ ਸਨ ਜਿਸ ਵਿੱਚ ਲਿਖਿਆ ਹੋਇਆ ਹੈ ਕਿ ਲੜਕੀ ਦੇ ਪਿਤਾ ਦੀ ਮੌਤ ਤੋਂ ਬਾਅਦ ਇਹ ਲੜਕੀਆਂ ਫਾਈਨੈਂਸਰ ਕੋਲ ਕੰਮ ਕਰਨਗੀਆਂ। ਪੀੜਿਤਾ ਮੁਤਾਬਕ ਪਾਰਲਰ ਦਾ ਕੰਮ ਕਰਨ ਵਾਲੀ ਸ਼ਿਵਾਨੀ ਧੰਦੇ ਦਾ ਕੰਮ ਕਰਦੀ ਹੈ ਅਤੇ ਉਨ੍ਹਾਂ ਨੂੰ ਕਈ ਵਾਰ ਧਮਕੀ ਵੀ ਦਿੱਤੀ ਗਈ ਪਰ ਪੁਲਿਸ ਨੂੰ ਸ਼ਿਕਾਇਤ ਦੇਣ ਦੇ ਬਾਅਦ ਵੀ ਕੋਈ ਕਾਰਵਾਈ ਨਹੀਂ ਹੋ ਰਹੀ।
ਪੀੜਿਤਾ ਦੇ ਪਿਤਾ ਨੇ ਦੱਸਿਆ ਕਿ ਉਹ 12 ਸਾਲ ਤੋਂ ਲੁਧਿਆਣਾ 'ਚ ਰਹਿ ਰਹੇ ਹਨ ਅਤੇ ਉਨ੍ਹਾਂ ਦੀ ਲੜਕੀ ਨੂੰ ਜਾਲ 'ਚ ਫਸਾਉਣ ਲਈ ਮੇਰੇ 'ਤੇ ਵੀ ਝੂਠਾ ਪਰਚਾ ਕਰਵਾ ਕੇ ਮੈਨੂੰ 2 ਮਹੀਨੇ ਲਈ ਜੇਲ੍ਹ ਭਿਜਵਾ ਦਿੱਤਾ ਗਿਆ। ਪੀੜਤ ਪਰਿਵਾਰ ਮੁਤਾਬਕ ਇਸ ਮਾਮਲੇ ਦੀ ਸਹੀ ਜਾਂਚ ਹੋਣ 'ਤੇ ਕਈ ਵੱਡੇ ਖੁਲਾਸੇ ਹੋ ਸਕਦੇ ਹਨ।
ਸਾਬਕਾ ਵਿਧਾਇਕ ਕਾਮਰੇਡ ਤਰਸੇਮ ਨੇ ਸ਼ੰਕਾ ਜਤਾਉਂਦਿਆਂ ਕਿਹਾ ਕਿ ਇਸ ਧੰਦੇ ਵਿੱਚ ਕਈ ਵੱਡੇ ਪੁਲਿਸ ਅਫ਼ਸਰ ਵੀ ਸ਼ਾਮਿਲ ਹੋ ਸਕਦੇ ਹਨ। ਲੁਧਿਆਣਾ ਪੁਲਿਸ ਕੋਲੋਂ ਜਾਂਚ ਨਾ ਕਰਵਾਕੇ ਫਾਈਨੈਂਸਰ ਜੱਸੀ ਚੰਡੀਗੜ੍ਹ ਅਤੇ ਜਲੰਧਰ ਵਰਗੇ ਸ਼ਹਿਰਾਂ 'ਚ ਮਾਮਲੇ ਦੀ ਜਾਂਚ ਕਰਵਾਉਂਦਾ ਹੈ। ਪੁਲਿਸ ਦੀ ਕਾਰਗੁਜ਼ਾਰੀ ਤੋਂ ਨਾਖੁਸ਼ ਉਹ ਹੁਣ ਹਾਈਕੋਰਟ ਜਾਣਗੇ ਅਤੇ ਵੂਮੈਨ ਕਮਿਸ਼ਨ ਸਣੇ ਡੀਜੀਪੀ ਨਾਲ ਵੀ ਮੁਲਾਕਾਤ ਕਰਨਗੇ। ਇੰਨਾ ਹੀ ਨਹੀਂ ਜੱਸੀ ਦੇ ਸ਼ਿਕਾਰ ਲੋਕ ਗ਼ਰੀਬ ਹੀ ਨਹੀਂ ਕਈ ਵੱਡੇ ਡਾਕਟਰ 'ਤੇ ਹੋਰ ਲੋਕ ਵੀ ਹਨ।
ਫਾਇਨੈਂਸਰ ਜੱਸੀ ਨੇ ਵੀ ਆਪਣਾ ਪੱਖ ਰੱਖਦਿਆਂ ਦੱਸਿਆ ਕਿ ਰੋਹਿਤ ਨਾਂ ਦੇ ਇੱਕ ਸ਼ਖਸ ਦੇ ਨਾਲ ਇਲਜ਼ਾਮ ਲਾਉਣ ਵਾਲੇ ਪਰਿਵਾਰ ਦਾ ਕੁੱਝ ਪੈਸਿਆਂ ਦਾ ਲੈਣ ਦੇਣ ਸੀ। ਇਸ ਤੋਂ ਬਾਅਦ ਪਰਿਵਾਰ ਨੇ ਹੀ ਉਨ੍ਹਾਂ ਨੂੰ ਰੋਹਿਤ ਨਾਲ ਪੈਸਿਆਂ ਦੇ ਲੈਣ ਦੇਣ ਦੇ ਮਾਮਲੇ ਵਿੱਚ ਸਮਝੌਤਾ ਕਰਵਾਉਣ ਦੀ ਮੰਗ ਕੀਤੀ ਅਤੇ ਜਿਸ ਮਗਰੋਂ ਉਸ ਨੇ ਰੋਹਿਤ ਨਾਲ ਪਰਿਵਾਰ ਦਾ ਸਮਝੌਤਾ ਕਰਵਾਇਆ। ਪਰ ਪੈਸੇ ਦੇਣ ਦੀ ਮਿਆਦ ਲੰਘਣ 'ਤੇ ਵੀ ਜਦ ਪਰਿਵਾਰ ਨੇ ਪੈਸੇ ਨਹੀਂ ਦਿੱਤੇ ਤਾਂ ਮਜਬੂਰਨ ਰੋਹਿਤ ਨੂੰ ਪਰਿਵਾਰ 'ਤੇ ਮਾਮਲਾ ਦਰਜ ਕਰਵਾਉਣਾ ਪਿਆ। ਪਰ ਉਲਟਾ ਪ੍ਰਵਾਸੀ ਪਰਿਵਾਰ ਨੇ ਉਸ 'ਤੇ ਹੀ ਉਨ੍ਹਾਂ ਦੀ ਕੁੜੀ ਨਾਲ ਛੇੜਛਾੜ ਦੇ ਇਲਜ਼ਾਮ ਲਗਾ ਦਿੱਤੇ ਤਾਂ ਜੋ ਇਨ੍ਹਾਂ ਨੂੰ ਪੈਸੇ ਨਾ ਦੇਣੇ ਪੈਣ।
ਫਾਈਨੈਂਸਰ ਜੱਸੀ ਨੇ ਦੱਸਿਆ ਕਿ ਇਲਜ਼ਾਮ ਲਾਉਣ ਵਾਲਿਆਂ 'ਤੇ ਪਹਿਲਾਂ ਹੀ ਲੁਧਿਆਣੇ ਦੇ ਵਿੱਚ ਦੋ ਮਾਮਲੇ ਦਰਜ ਹਨ ਅਤੇ ਕੁੱਝ ਸਿਆਸੀ ਆਗੂ ਵੀ ਆਪਣੀ ਕਿੜ ਕੱਢਣ ਲਈ ਪਰਿਵਾਰ ਦੇ ਨਾਲ ਮਿਲ ਕੇ ਉਸ 'ਤੇ ਅਜਿਹੇ ਇਲਜ਼ਾਮ ਲਗਾ ਰਹੇ ਹਨ। ਜਦ ਕਿ ਇਹ ਪੂਰਾ ਮਾਮਲਾ ਪੰਜਾਬ ਹਰਿਆਣਾ ਹਾਈਕੋਰਟ ਦੇ ਵਿਚਾਰ ਅਧੀਨ ਹੈ ਅਤੇ ਹਾਈਕੋਰਟ ਵੱਲੋਂ ਹੀ ਇਸ ਸਬੰਧੀ ਡੀਜੀਪੀ ਨੂੰ ਇਨਕੁਆਰੀ ਦੇ ਹੁਕਮ ਜ਼ਾਰੀ ਕੀਤੇ ਗਏ ਹਨ।
