ਜਲੰਧਰ: ਟੋਕੀਓ ਓਲੰਪਿਕ (Tokyo Olympics) ਲਈ ਚੁਣੀ ਗਈ ਭਾਰਤੀ ਹਾਕੀ ਟੀਮ ਦੇ ਕਪਤਾਨ ਮਨਪ੍ਰੀਤ ਸਿੰਘ (Manpreet Singh) ਜਲੰਧਰ ਦੇ ਮਿੱਠਾਪੁਰ ਪਿੰਡ ਦੇ ਰਹਿਣ ਵਾਲੇ ਹਨ।ਜਿਨ੍ਹਾਂ ਦਾ ਜਨਮ ਇਕ ਸਾਧਾਰਨ ਪਰਿਵਾਰ ਵਿੱਚ 26 ਜੂਨ 1992 ਨੂੰ ਹੋਇਆ।
ਮਨਪ੍ਰੀਤ ਸਿੰਘ ਦੇ ਸਧਾਰਨ ਪਰਿਵਾਰ ਤੋਂ ਭਾਰਤੀ ਟੀਮ ਦੇ ਕਪਤਾਨ ਬਣਨ ਤੱਕ ਦੀ ਕਹਾਣੀ
ਪਿਤਾ ਬਲਜੀਤ ਸਿੰਘ ਜੋ ਕਿ ਮਿਲਕ ਪਲਾਂਟ ਵਿਖੇ ਕੰਮ ਕਰਦੇ ਸੀ ਬਤੌਰ ਤਨਖਾਹ ਮਨਪ੍ਰੀਤ ਦੀ ਮਾਤਾ ਜੀ ਨੂੰ ਹਰ ਮਹੀਨੇ 440 ਰੁਪਏ ਦਿੰਦੇ ਸੀ ਜਿਸ ਵਿੱਚ ਮਨਪ੍ਰੀਤ ਦੀ ਮਾਤਾ ਮਨਜੀਤ ਕੌਰ ਤਿੰਨਾਂ ਪੁੱਤਰਾਂ ਦੇ ਪਾਲਣ ਪੋਸ਼ਣ ਸਮੇਤ ਪੂਰੇ ਘਰ ਦਾ ਖਰਚ ਚਲਾਉਂਦੀ ਸੀ। ਮਨਪ੍ਰੀਤ ਦੇ ਵੱਡੇ ਭਰਾ ਅਮਨਦੀਪ ਸਿੰਘ ਅਤੇ ਸੁਖਰਾਜ ਸਿੰਘ ਹਾਕੀ ਖੇਡਣ ਮਿੱਠਾਪੁਰ ਦੇ ਸਟੇਡੀਅਮ ਵਿਖੇ ਜਾਂਦੇ ਸੀ । ਹੌਲੀ ਹੌਲੀ ਇਹ ਖੇਡਣ ਦੀ ਚੇਟਕ ਮਨਪ੍ਰੀਤ ਨੂੰ ਵੀ ਲੱਗ ਗਈ। ਪਰ ਮਨਪ੍ਰੀਤ ਦੀ ਮਾਤਾ ਮਨਜੀਤ ਕੌਰ ਨਹੀਂ ਚਾਹੁੰਦੇ ਸੀ ਕਿ ਉਨ੍ਹਾਂ ਦਾ ਇਹ ਬੇਟਾ ਵੀ ਹਾਕੀ ਖੇਡੇ ਕਿਉਂਕਿ ਇਸ ਨੂੰ ਹਾਕੀ ਖਿਡਾਉਣ ਅਤੇ ਇਸ ਖੇਡ ਤੇ ਆਉਣ ਵਾਲੇ ਖਰਚੇ ਲਈ ਉਨ੍ਹਾਂ ਕੋਲ ਪੈਸੇ ਨਹੀਂ ਹੁੰਦੇ ਸੀ।