ਗੁਰਦਾਸਪੁਰ: ਬੀਐਸਐਫ ਨੇ ਰਾਵੀ ਨਦੀ 'ਚ ਤੈਰ ਰਹੀ 64 ਕਿੱਲੋ ਨਸ਼ੇ ਦੀ ਖੇਪ ਕੀਤੀ ਬਰਾਮਦ

ਗੁਰਦਾਸਪੁਰ ਵਿੱਚ ਭਾਰਤ-ਪਾਕਿਸਤਾਨ ਕੌਮਾਂਤਰੀ ਸਰਹੱਦ ਨੇੜੇ ਵਗ ਰਹੀ ਰਾਵੀ ਨਦੀ ਤੋਂ ਬੀਐਸਐਫ ਨੇ ਨਸ਼ੇ ਦੀ ਖੇਪ ਬਰਾਮਦ ਕੀਤੀ। ਬੀਤੀ ਰਾਤ 2:45 'ਤੇ ਪੰਜਾਬ ਦੇ ਨਾਂਗਲੀ ਘਾਟ ਨੇੜੇ ਗਸ਼ਤ ਦੌਰਾਨ ਬੀਐਸਐਫ ਨੇ ਇਹ ਖੇਪ ਬਰਾਮਦ ਕੀਤੀ।

ਗੁਰਦਾਸਪੁਰ: ਬੀਐਸਐਫ ਨੇ ਸ਼ਨੀਵਾਰ ਰਾਤ ਨੂੰ ਗੁਰਦਾਸਪੁਰ ਵਿੱਚ ਭਾਰਤ-ਪਾਕਿਸਤਾਨ ਕੌਮਾਂਤਰੀ ਸਰਹੱਦ ਨੇੜੇ ਵਗ ਰਹੀ ਰਾਵੀ ਨਦੀ ਤੋਂ 64 ਕਿੱਲੋ ਤੋਂ ਵੱਧ ਨਸ਼ੇ ਦੀ ਖੇਪ ਬਰਾਮਦ ਕੀਤੀ। ਅਧਿਕਾਰੀਆਂ ਨੇ ਦੱਸਿਆ ਕਿ ਹੈਰੋਇਨ ਦੇ 60 ਪੈਕੇਟ ਕੱਪੜਿਆਂ ਦੀਆਂ ਲੰਬੀਆਂ ਟਿਊਬਾਂ ਵਿੱਚ ਪੈਕ ਕੀਤੇ ਹੋਏ ਸਨ। ਹੈਰੋਇਨ ਦਾ ਭਾਰ 64.33 ਕਿਲੋਗ੍ਰਾਮ ਦੱਸਿਆ ਜਾ ਰਿਹਾ ਹੈ। ਕੌਮਾਂਤਰੀ ਬਾਜ਼ਾਰ ਵਿੱਚ ਇਸ ਹੈਰੋਇਨ ਦੀ ਕੀਮਤ ਕਰੋੜਾਂ ਰੁਪਏ ਹੈ।

ਜਾਣਕਾਰੀ ਮੁਤਾਬਕ ਰਾਤ ਦੇ 2.45 'ਤੇ ਪੰਜਾਬ ਦੇ ਨਾਂਗਲੀ ਘਾਟ ਨੇੜੇ ਗਸ਼ਤ ਕਰ ਰਹੀ ਇੱਕ ਕਿਸ਼ਤੀ ਨਾਕਾ ਪਾਰਟੀ ਨੂੰ ਮਹਿਸੂਸ ਹੋਇਆ ਕਿ ਨਦੀ ਦੀਆਂ ਲਹਿਰਾਂ 'ਤੇ ਇੱਕ ਵੱਡਾ ਪੈਕੇਟ ਵਹਿ ਰਿਹਾ ਹੈ। ਇਸ ਨੂੰ ਜ਼ਬਤ ਕਰਨ ਮਗਰੋਂ ਪਤਾ ਲੱਗਿਆ ਕਿ ਇਸ ਵਿੱਚ ਨਸ਼ੇ ਦੀ ਖੇਪ ਹੈ।

ਜਾਣਕਾਰੀ ਮੁਤਾਬਕ ਪਾਕਿਸਤਾਨ ਦੇ ਨਸ਼ਾ ਤਸਕਰਾਂ ਨੇ ਨਸ਼ੇ ਦੀ ਇਸ ਖੇਪ ਨੂੰ ਚੰਗੀ ਤਰ੍ਹਾਂ ਬੰਨ੍ਹ ਕੇ ਰਾਵੀ ਨਦੀ ਵਿੱਚ ਛੱਡ ਦਿੱਤਾ ਸੀ। ਨਸ਼ੇ ਦੀ ਇਹ ਖੇਪ ਲਾਵਾਰਿਸ ਵਗਦੀ ਭਾਰਤ ਦੀ ਸਰਹੱਦ ਵਿੱਚ ਆ ਗਈ। ਕਿਆਸ ਲਗਾਏ ਜਾ ਰਹੇ ਹਨ ਕਿ ਇੱਥੇ ਭਾਰਤੀ ਤਸਕਰਾਂ ਨੇ ਇਸ ਨੂੰ ਕਬਜ਼ੇ ਵਿੱਚ ਲੈਣਾ ਸੀ ਪਰ ਉਸ ਤੋਂ ਪਹਿਲਾਂ ਹੀ ਬੀਐਸਐਫ ਨੇ ਇਸ ਨੂੰ ਜ਼ਬਤ ਕਰ ਲਿਆ।