ਫਿਰੋਜ਼ਪੁਰ: ਕੇਂਦਰ ਵੱਲੋਂ ਪਾਸ ਕੀਤੇ ਖੇਤੀ ਕਾਨੂੰਨਾਂ ਖ਼ਿਲਾਫ਼ ਦਿੱਲੀ ਵਿੱਚ ਚੱਲ ਰਹੇ ਕਿਸਾਨ ਅੰਦੋਲਨ ਨੂੰ ਬਲ ਦੇਣ ਲਈ ਅਤੇ ਦਿੱਲੀ ਜੇਲ੍ਹਾਂ ਵਿੱਚ ਬੰਦ ਕਿਸਾਨਾਂ ਦੇ ਹੱਕ ਵਿੱਚ ਅੱਜ ਗੁਰੂਹਰਸਹਾਏ ਦੀਆਂ ਵੱਖ ਵੱਖ ਕਿਸਾਨ ਜਥੇਬੰਦੀਆਂ ਵੱਲੋਂ ਇੱਕ ਵਿਸ਼ਾਲ ਰੋਸ ਮਾਰਚ ਕੱਢਿਆ ਗਿਆ। ਇਸ ਰੋਸ ਮਾਰਚ ਵਿੱਚ ਵੱਖ-ਵੱਖ ਪਿੰਡਾਂ ਦੇ ਕਿਸਾਨਾਂ ਵੱਲੋਂ ਮੋਟਰਸਾਈਕਲ, ਕਾਰਾਂ ਅਤੇ ਟਰੈਕਟਰਾਂ ਉਪਰ ਰੋਸ ਮਾਰਚ ਕਰ ਕੇ ਇਨ੍ਹਾਂ ਕਾਲੇ ਕਾਨੂੰਨਾਂ ਖ਼ਿਲਾਫ਼ ਮੁਜ਼ਾਹਰਾ ਕੀਤਾ ਗਿਆ।
ਖੇਤੀ ਕਾਨੂੰਨਾਂ ਖ਼ਿਲਾਫ਼ ਕਿਸਾਨਾਂ ਨੇ ਗੁਰੂਹਰਸਹਾਏ 'ਚ ਕੱਢਿਆ ਰੋਸ ਮਾਰਚ
ਇਹ ਰੋਸ ਮਾਰਚ ਪਿੰਡ ਬੋਹੜੀਆਂ ਤੋਂ ਸ਼ੁਰੂ ਹੋ ਕੇ ਗੁਰੂਹਰਸਹਾਏ, ਪਿੰਡ ਕੇਸਰ ਸਿੰਘ ਵਾਲੀ, ਨਿੱਝਰ, ਗੋਬਿੰਦਗੜ੍ਹ, ਕੇਹਰ ਸਿੰਘ ਵਾਲਾ, ਚੱਕ ਸੋਮੀਆ, ਲਾਲਚੀਆਂ, ਕੰਧੇਸ਼ਾਹ, ਅਹਿਮਦ ਢੰਡੀ, ਤਰਿੰਡੇ, ਰਾਉਕੇ ਪਠਾਣਾਂ ਵਾਲੇ, ਗਜਨੀਵਾਲਾ, ਮਾਦੀ ਕੇ, ਗੋਲੇ ਕੇ, ਪੰਜੇ ਕੇ ਉਤਾੜ, ਜੀਵਾ ਅਰਾਈ, ਸਰੂਪ ਸਿੰਘ ਵਾਲਾ ਆਦਿ ਪਿੰਡਾਂ ਤੋਂ ਹੁੰਦਾ ਹੋਇਆ ਮੋਹਨ ਕੇ ਉਤਾੜ ਸਮਾਪਤ ਹੋਇਆ।