ਫਰੀਦਕੋਟ: ਆਪਣੀਆਂ ਮੰਗਾਂ ਨੂੰ ਲੈਕੇ ਪਿਛਲੇ 70 ਦਿਨਾਂ ਤੋਂ ਵਿਧਾਨਸਭਾ ਸਪੀਕਰ ਦੇ ਘਰ ਦੇ ਬਾਹਰ ਧਰਨੇ ’ਤੇ ਬੈਠੇ ਮੀਟਰ ਰੀਡਰਾਂ ਦੀਆਂ ਮੁਸ਼ਕਿਲਾਂ ਘਟਣ ਦਾ ਨਾਮ ਨਹੀਂ ਲੈ ਰਹੀਆਂ ਜੋ ਪਹਿਲਾਂ ਸਰਕਾਰ ਦੀ ਅਣਦੇਖੀ ਦਾ ਸ਼ਿਕਾਰ ਹੋ ਰਹੇ ਸਨ ਤੇ ਹੁਣ ਕੁਦਰਤ ਦਾ ਕਹਿਰ ਝੱਲਣ ਲਈ ਮਜ਼ਬੂਰ ਹੋਏ ਹਨ। ਪਿਛਲੇ ਦੋ ਦਿਨਾਂ ਤੋਂ ਪੈ ਰਹੀ ਭਾਰੀ ਮੀਂਹ ਅਤੇ ਤੇਜ਼ ਝੱਖੜ ਕਾਰਨ ਧਰਨਾਕਾਰੀਆ ਦਾ ਟੈਂਟ ਪਾਣੀ ਅਤੇ ਚਿੱਕੜ ਨਾਲ ਭਰ ਗਿਆ। ਇੱਥੋਂ ਤੱਕ ਕੇ ਉਨ੍ਹਾਂ ਦੇ ਖਾਣ ਪੀਣ ਦਾ ਸਮਾਨ ਅਤੇ ਬਿਸਤਰੇ ਗੱਦੇ ਵਗੈਰਾ ਬੁਰੀ ਤਰਾਂ ਖਰਾਬ ਹੋ ਗਏ।
ਇਸ ਮੌਕੇ ਮੀਟਰ ਰੀਡਰ ਮੁਲਾਜ਼ਮ ਆਗੂ ਗੁਰਵਿੰਦਰ ਸਿੰਘ ਨੇ ਕਿਹਾ ਕਿ ਅਸੀਂ ਪਿਛਲੇ 70 ਦਿਨਾਂ ਤੋਂ ਆਪਣੀਆਂ ਮੰਗਾਂ ਨੂੰ ਲੈਕੇ ਵਿਧਾਨਸਭਾ ਸਪੀਕਰ ਕੁਲਤਾਰ ਸੰਧਵਾ ਦੀ ਰਿਹਾਇਸ਼ ਦੇ ਬਾਹਰ ਧਰਨਾ ਲਗਾਇਆ ਹੋਇਆ ਹੈ ਪਰ ਸਾਡੀ ਅੱਜ ਤਕ ਸਾਡੀ ਸੁਣਵਾਈ ਨਹੀਂ ਹੋਈ। ਉਨ੍ਹਾਂ ਕਿਹਾ ਕਿ ਅਸੀਂ ਭੁੱਖ ਹੜਤਾਲ ਵੀ ਕੀਤੀ ਅਤੇ ਸਾਡੇ ਕਈ ਮੁਲਾਜ਼ਮਾਂ ਦੀ ਧਰਨੇ ਦੌਰਾਨ ਸਿਹਤ ਵੀ ਵਿਗੜੀ ਅਤੇ ਹੁਣ ਮੀਂਹ ਕਾਰਨ ਸਾਡੇ ਧਰਨੇ ਵਾਲੀ ਜਗ੍ਹਾ ’ਤੇ ਪਾਣੀ ਹੀ ਪਾਣੀ ਅਤੇ ਗਾਰਾ ਭਰ ਚੁੱਕਾ ਹੈ ਜਿਸ ਨਾਲ ਇੱਥੇ ਹੁਣ ਬੈਠਣਾ ਵੀ ਮੁਸ਼ਕਿਲ ਹੈ।