ਫ਼ਰੀਦਕੋਟ: ਫ਼ਰੀਦਕੋਟ ਵਿੱਚ ਬੱਚਿਆਂ ਦੇ ਅਗਵਾ ਹੋਣ ਦਾ ਮਾਮਲਾ ਕੋਈ ਨਵਾਂ ਨਹੀਂ ਹੈ। ਇਸ ਨੂੰ ਲੈ ਕੇ ਲਗਾਤਾਰ 2 ਸਾਲ ਫ਼ਰੀਦਕੋਟ ਦੇ ਥਾਣਾ ਸਿਟੀ ਦੇ ਬਾਹਰ ਧਰਨਾ ਲਗਾਇਆ ਜਾਂਦਾ ਰਿਹਾ ਸੀ ਪਰ ਨਤੀਜਾ ਫਿਰ ਵੀ ਜ਼ੀਰੋ ਹੀ ਰਿਹਾ। ਇਨ੍ਹਾਂ ਸਾਰੇ ਮਾਮਲਿਆਂ ਵਿਚ ਚਰਚਿਤ ਮਾਮਲਾ ਸੀ ਮਨੋਜ ਕਪੂਰ ਦੀ ਕਿਡਨੈਪਿੰਗ ਦਾ, ਜਿਸ ਵਿੱਚ ਏਟੀਐਮ ਮਸ਼ੀਨਾਂ 'ਚ ਪੈਸੇ ਪਾਉਣ ਵਾਲੇ ਫ਼ਰੀਦਕੋਟ ਵਾਸੀ ਮਨੋਜ ਕਪੂਰ ਨੂੰ ਕਿਸੇ ਨੇ ਭੇਦਭਰੇ ਹਾਲਾਤ ਵਿਚ ਘਰ ਦੇ ਨੇੜਿਓਂ ਕਿਡਨੈਪ ਕਰ ਲਿਆ ਸੀ।
ਉਸ ਦੀ ਭਾਲ ਨੂੰ ਲੈ ਕੇ ਲਗਾਤਾਰ ਦੋ ਸਾਲ ਤੱਕ ਧਰਨਾ ਲਗਾਇਆ ਗਿਆ ਸੀ ਪਰ ਫਿਰ ਵੀ ਪਰਿਵਾਰ ਦੇ ਹੱਥ ਨਿਰਾਸ਼ਾ ਹੀ ਲੱਗੀ। ਪਰਿਵਾਰ ਨੇ ਸੀਬੀਆਈ ਤੋਂ ਜਾਂਚ ਕਰਵਾਉਣ ਲਈ ਅਦਾਲਤ ਦਾ ਦਰਵਾਜ਼ਾ ਖੜਕਾਇਆ ਤਾਂ ਜਾਂਚ ਸੀਬੀਆਈ ਕੋਲ ਆ ਗਈ ਸੀ ਪਰ ਕਰੀਬ 3 ਸਾਲ ਬੀਤ ਜਾਣ ਦੇ ਬਾਅਦ ਸੀਬੀਆਈ ਨੇ ਵੀ ਪਰਿਵਾਰ ਦੇ ਪੱਲੇ ਕੁਝ ਨਾ ਪਿਆ। ਪਰਿਵਾਰ ਵੱਲੋਂ ਮਨੋਜ ਦੇ ਲਾਪਤਾ ਹੋਏ ਨੂੰ 5 ਸਾਲ ਪੂਰੇ ਹੋ ਜਾਣ 'ਤੇ ਉਸ ਦੀ ਕੋਈ ਜਾਣਕਾਰੀ ਨਹੀਂ ਮਿਲੀ ਹੈ। ਇਸ ਨੂੰ ਲੈ ਕੇ ਪਰਿਵਾਰ ਨੇ ਪਿਛਲੇ ਦਿਨੀਂ ਇੱਕ ਪ੍ਰੈਸ ਕਾਨਫਰੰਸ ਕਰਕੇ ਰੋਸ ਜ਼ਾਹਿਰ ਕੀਤਾ ਸੀ ਕਿ ਪੰਜ ਸਾਲ ਬੀਤ ਜਾਣ ਤੋਂ ਬਾਅਦ ਵੀ ਕਿਸੇ ਨੇ ਉਨ੍ਹਾਂ ਨੂੰ ਇਨਸਾਫ਼ ਨਹੀਂ ਦਿੱਤਾ। ਪ੍ਰੈਸ ਕਾਨਫਰੰਸ ਦੌਰਾਨ ਮਨੋਜ ਦੀ ਮਾਂ ਨੇ ਭਰੇ ਮਨ ਨਾਲ ਸਰਕਾਰ ਅਤੇ ਪ੍ਰਸ਼ਾਸਨ ਨੂੰ ਇਥੋਂ ਤੱਕ ਕਹਿ ਦਿੱਤਾ ਸੀ ਕਿ ਮੈਨੂੰ ਭਾਵੇਂ ਸ਼ਹਿਰ ਵਿਚੋਂ ਕੱਢ ਦੇਵੋ ਪਰ ਮੇਰਾ ਬੱਚਾ ਮੈਨੂੰ ਜ਼ਰੂਰ ਲੱਭ ਦੇਵੋ। ਉਥੇ ਹੀ ਮਨੋਜ ਦੀ ਭੈਣ ਨੇ ਇਸ ਕਰੱਪਟ ਹੋ ਚੁੱਕੇ ਸਿਸਟਮ ਉੱਤੇ ਸਵਾਲ ਚੁੱਕੇ ਸਨ। ਇਸ ਦੇ ਨਾਲ ਹੀ ਏਟੀਐਮ ਮਸੀਨਾਂ ਵਿੱਚ ਪੈਸੇ ਪਾਉਣ ਵਾਲੀਆਂ ਕੰਪਨੀਆਂ ਵੱਲੋਂ ਪੈਸੇ ਵਿਚ ਕੀਤੇ ਜਾਂਦੇ ਕਥਿਤ ਘਪਲੇ ਦਾ ਵੀ ਪਰਦਾਫਾਸ਼ ਕੀਤਾ ਸੀ।ਇਸ ਤੋਂ ਬਾਅਦ ਹੁਣ ਫਿਰ ਤੋਂ ਸੀਬੀਆਈ ਦੀ ਟੀਮ ਨੇ ਮਨੋਜ ਕਪੂਰ ਦੇ ਪਰਿਵਾਰ ਨਾਲ ਗੱਲਬਾਤ ਕੀਤੀ। ਸੀਬੀਆਈ ਨੇ ਪੱਤਰਕਾਰਾਂ ਵਲੋਂ ਪੁੱਛਣ 'ਤੇ ਕੁਝ ਵੀ ਬੋਲਣ ਤੋਂ ਇਨਕਾਰ ਕਰ ਦਿੱਤਾ ਪਰ ਮਨੋਜ ਕਪੂਰ ਦੀ ਭੈਣ ਨੇ ਮੀਡੀਆ ਦਾ ਧੰਨਵਾਦ ਕਰਦੇ ਹੋਏ ਕਿਹਾ ਕਿ ਮੀਡੀਆ ਵੱਲੋ ਉਨ੍ਹਾਂ ਦੀ ਆਵਾਜ਼ ਉਠਾਉਣ ਕਰਕੇ ਹੀ ਫਿਰ ਤੋਂ ਸੀਬੀਆਈ ਹਰਕਤ ਵਿੱਚ ਆਈ ਹੈ।ਮਨੋਜ ਦੀ ਭੈਣ ਨੇ ਕਿਹਾ ਕਿ ਉਸ ਦੇ ਭਰਾ ਨੂੰ ਲਾਪਤਾ ਹੋਏ ਅੱਜ ਪੂਰੇ 5 ਸਾਲ ਹੋ ਗਏ ਹਨ ਪਰ ਹਾਲੇ ਤੱਕ ਫ਼ਰੀਦਕੋਟ ਪੁਲਿਸ ਜਾਂ ਸੀਬੀਆਈ ਉਸ ਦਾ ਕੋਈ ਸੁਰਾਗ ਨਹੀਂ ਲਗਾ ਸਕੀ। ਸੀਬੀਆਈ ਨੇ ਫਿਰ ਤੋਂ ਉਨ੍ਹਾਂ ਕੋਲ ਮਨੋਜ ਕਪੂਰ ਦੇ ਪਿਛੋਕੜ, ਦੋਸਤਾਂ, ਮਿੱਤਰਾਂ ਆਦਿ ਬਾਰੇ ਪੁੱਛਗਿੱਛ ਕੀਤੀ ਨਾਲ ਉਨ੍ਹਾਂ ਕੋਲ ਕੁੱਝ ਫੋਟੋਆਂ ਸਨ ਜੋ ਉਨ੍ਹਾਂ ਨੂੰ ਪਛਾਣ ਕਰਨ ਲਈ ਕਿਹਾ।
