Pinky Cat Passed Away: ਪੰਜਾਬ ਦੇ ਚਰਚਿਤ ਸਾਬਕਾ ਪੁਲਿਸ ਮੁਲਾਜ਼ਮ ਗੁਰਮੀਤ ਸਿੰਘ ਪਿੰਕੀ ਕੈਟ ਦੀ ਮੌਤ

Pinky Cat Death News: ਸਾਬਕਾ ਪੁਲਿਸ ਮੁਲਾਜ਼ਮ ਗੁਰਮੀਤ ਸਿੰਘ ਪਿੰਕੀ ਕੈਟ ਦੀ ਮੌਤ ਹੋ ਜਾਣ ਖਬਰ ਸਾਹਮਣੇ ਆਈ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਪਿੰਕੀ ਦੀ ਡੇਂਗੂ ਕਾਰਨ ਇਲਾਜ ਦੌਰਾਨ ਮੌਤ ਹੋਈ ਹੈ।

ਚੰਡੀਗੜ੍ਹ:ਸਾਬਕਾ ਪੁਲਿਸ ਮੁਲਾਜ਼ਮ ਗੁਰਮੀਤ ਸਿੰਘ ਪਿੰਕੀ ਕੈਟ ਦੀ ਡੇਂਗੂ ਕਾਰਨ ਮੌਤ ਹੋ ਗਈ ਹੈ। ਮੀਡੀਆ ਰਿਪੋਰਟਾਂ ਮੁਤਾਬਕਾਂ ਗੁਰਮੀਤ ਦਾ ਚੰਡੀਗੜ੍ਹ ਦੇ ਇੱਕ ਪ੍ਰਾਈਵੇਟ ਹਸਪਤਾਲ ਵਿੱਚ ਇਲਾਜ ਚੱਲ ਰਿਹਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਗੁਰਮੀਤ ਉਰਫ਼ ਪਿੰਕੀ ਕੈਟ ਦੀ ਧੀ ਵਿਦੇਸ਼ ਵਿੱਚ ਰਹਿੰਦੀ ਹੈ ਜਿਸ ਦੇ ਵਾਪਸ ਆਉਣ ਤੋਂ ਬਾਅਦ ਉਸ ਦਾ ਅੰਤਿਮ ਸਸਕਾਰ ਕੀਤਾ ਜਾਵੇਗਾ।

ਰਸਤਾ ਪੁੱਛਣ ਉੱਤੇ ਪਿੰਕੀ ਨੇ ਨੌਜਵਾਨ ਨੂੰ ਮਾਰੀ ਸੀ ਗੋਲੀ: ਗੁਰਮੀਤ ਸਿੰਘ ਪਿੰਕੀ ਪੰਜਾਬ ਪੁਲਿਸ ਵਿੱਚ ਇੰਸਪੈਕਟਰ ਰਿਹਾ ਹੈ। 2001 ਵਿੱਚ ਪਿੰਕੀ ਨੇ ਲੁਧਿਆਣਾ ਦੇ ਇਕ ਨੌਜਵਾਨ ਅਵਤਾਰ ਸਿੰਘ ਗੋਲਾ ਨੂੰ ਰਾਸਤਾ ਮੰਗਣ ਉੱਤੇ ਗੋਲੀ ਮਾਰ ਦਿੱਤੀ ਸੀ। ਇਸ ਦੋਸ਼ ਵਿੱਚ ਪਿੰਕੀ ਨੂੰ ਉਮਰ ਕੈਦ ਦੀ ਸਜ਼ਾ ਹੋਈ ਸੀ, ਪਰ ਸਰਕਾਰੀ ਮਿਹਰ ਸਦਕਾ ਉਸ ਨੂੰ ਸੱਤ ਸਾਲ ਬਾਅਦ ਪੈਰੋਲ ਗ੍ਰਾਂਟ ਮਿਲੀ। ਇਸ ਤੋਂ ਬਾਅਦ ਪਿੰਕੀ 486 ਦਿਨ ਜੇਲ ਤੋਂ ਬਾਹਰ ਰਿਹਾ, ਫਿਰ ਪਹਿਲੀ ਵਾਰ 2008 ਵਿੱਚ 2 ਹਫ਼ਤਿਆਂ ਲਈ ਪੈਰੋਲ ਉੱਤੇ ਆਇਆ ਜਿਸ ਵਿੱਚ 52 ਦਿਨ ਹੋਰ ਵਧੇ ਅਤੇ ਫਿਰ ਮੁੜ ਜੇਲ੍ਹ ਵਿੱਚ ਵਾਪਸ ਆ ਗਿਆ। ਇਸ ਮਾਮਲੇ ਵਿੱਚ 2012 ਤੱਕ ਪਿੰਕੀ ਨੂੰ ਤਿਨ ਵਾਰ ਜ਼ਮਾਨਤ ਮਿਲੀ ਤੇ 112 ਦਿਨ ਜੇਲ੍ਹ ਚੋਂ ਬਾਹਰ ਰਿਹਾ।

52 ਫ਼ਰਜ਼ੀ ਮੁਠਭੇੜ ਦੇ ਸਬੂਤ ਦੇਣ ਦਾ ਮਾਮਲਾ: ਇਸ ਮਾਮਲੇ ਨੂੰ ਲੈ ਕੇ ਸਿਆਸਤ ਗਰਮਾਈ ਸੀ, ਜਦੋਂ ਪਿੰਕੀ ਨੇ ਦਾਅਵਾ ਕੀਤਾ ਸੀ ਕਿ ਉਨ੍ਹਾਂ ਕੋਲ 52 ਫਰਜ਼ੀ ਐਨਕਾਊਂਟਰਾਂ ਦੇ ਸਬੂਤ ਹਨ।

ਸਾਬਕਾ ਡੀਜੀਪੀ ਸੈਣੀ ਦਾ ਕਰੀਬੀ:ਇਸ ਤੋਂ ਪਹਿਲਾਂ ਪਿੰਕੀ ਕੈਟ ਨੇ ਸਾਬਕਾ ਮੁੱਖ ਮੰਤਰੀ ਬੇਅੰਤ ਸਿੰਘ ਕਤਲਕਾਂਡ ਦੇ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰਨ ਵਿੱਚ ਅਹਿਮ ਭੂਮਿਕਾ ਨਿਭਾਈ ਸੀ ਜਿਸ ਲਈ ਉਸ ਨੂੰ ਸਨਮਾਨਿਤ ਕੀਤਾ ਗਿਆ ਸੀ। ਪਿੰਕੀ ਪੰਜਾਬ ਦੇ ਸਾਬਕਾ ਡੀਜੀਪੀ ਸੁਮੇਧ ਸੈਣੀ ਦਾ ਵੀ ਕਰੀਬੀ ਰਹਿ ਚੁੱਕਾ ਹੈ। ਲੁਧਿਆਣਾ ਰੇਂਜ ਆਈਜੀ ਰਹੇ ਗੁਰਿੰਦਰ ਸਿੰਘ ਢਿੱਲੋਂ ਨੇ ਪਿੰਕੀ ਨੂੰ ਪੁਲਿਸ ਦੀ ਨੌਕਰੀ ਵਿੱਚ ਬਹਾਲ ਕਰ ਦਿੱਤਾ ਸੀ। ਫਿਰ, ਮੀਡੀਆ ਵਿੱਚ ਖ਼ਬਰਾਂ ਫੈਲਣ ਤੋਂ ਬਾਅਦ ਰਾਤੋਂ-ਰਾਤ ਮੁੜ ਬਰਖਾਸਤ ਕੀਤਾ ਗਿਆ ਸੀ। ਪਿੰਕੀ ਨੇ ਪੁਲਿਸ ਵਿੱਚ ਬਹਾਦਰੀ ਦਾ ਤਗ਼ਮਾ ਵੀ ਜਿੱਤਿਆ ਸੀ।