Spray Machine: B.tech ਪਾਸ ਨੌਜਵਾਨ ਦੀ ਨਵੀਂ ਕਾਢ, ਕਿਸਾਨਾਂ ਦਾ ਕੰਮ ਕੀਤਾ ਸੁਖਾਲਾ, ਜਾਣੋ ਕਿਵੇਂ

ਖੇਤ ਵਿੱਚ ਰੇਅ ਤੇ ਸਪਰੇਅ ਕਰਦੇ ਹੋਏ ਪਿਤਾ ਦੀਆਂ ਮੁਸ਼ਕਲਾਂ ਨੂੰ ਵੇਖ ਕੇ ਬੀਟੈਕ ਮੈਕੇਨੀਕਲ ਪਾਸ ਪੁੱਤ ਗੁਰਪ੍ਰੀਤ ਸਿੰਘ ਨੇ ਛਿੜਕਾਅ ਲਈ ਨਵੀਂ ਕਾਢ ਕੱਢੀ। ਉਸ ਨੇ ਅਜਿਹੀ ਮਸ਼ੀਨ ਤਿਆਰ ਕੀਤੀ, ਜੋ ਕਿ 15 ਮਿੰਟਾਂ ਵਿੱਚ ਇਕ ਏਕੜ ਵਿੱਚ ਰੇਅ ਤੇ ਸਪਰੇਅ ਕਰ ਦਿੰਦੀ ਹੈ।

ਬਠਿੰਡਾ: ਸਿਆਣੇ ਕਹਿੰਦੇ ਨੇ ਲੋੜ ਕਾਢ ਦੀ ਮਾਂ ਹੁੰਦੀ ਹੈ, ਅਜਿਹਾ ਸੱਚ ਕਰ ਦਿਖਾਇਆ ਹੈ, ਬੀਟੇਕ ਪਾਸ ਨੌਜਵਾਨ ਗੁਰਪ੍ਰੀਤ ਸਿੰਘ ਨੇ, ਜਿਸ ਨੇ ਖੇਤ ਵਿੱਚ ਕੰਮ ਕਰਦੇ ਆਪਣੇ ਪਿਤਾ ਦੀਆਂ ਮੁਸ਼ਕਲਾਂ ਨੂੰ ਦੂਰ ਕਰਨ ਲਈ ਇਕ ਅਜਿਹੀ ਮਸ਼ੀਨ ਤਿਆਰ ਕੀਤੀ ਹੈ, ਜੋ ਕਿ ਹੈ ਇਕ ਏਕੜ ਵਿੱਚ ਮਹਿਜ਼ 15 ਮਿੰਟ ਵਿੱਚ ਰੇਅ ਦਾ ਛਿੜਕਾਅ ਕਰਦੀ ਹੈ। ਉਸ ਦੀ ਇਸ ਕਾਢ ਨੂੰ ਵੇਖਦੇ ਹੋਏ ਉਸ ਨੂੰ ਜੀ 20 ਸੰਮੇਲਨ ਵਿੱਚ ਵੀ ਬੁਲਾਇਆ ਗਿਆ ਸੀ।

ਮਸ਼ੀਨ ਦੀ ਖਾਸੀਅਤ: ਗੁਰਪ੍ਰੀਤ ਸਿੰਘ ਨੇ ਗੱਲਬਾਤ ਦੌਰਾਨ ਦੱਸਿਆ ਕਿ ਜਦੋਂ ਉਹ ਬੀਟੇਕ ਦੀ ਪੜ੍ਹਾਈ ਕਰ ਰਿਹਾ ਸੀ, ਤਾਂ ਰੇਅ ਦੇ ਛਿੜਕਾਅ ਲਈ ਉਸ ਦੇ ਪਿਤਾ ਵੱਲੋਂ ਕੀਤੀ ਜਾ ਰਹੀ ਮਿਹਨਤ ਤੋਂ ਪ੍ਰਭਾਵਿਤ ਹੋ ਕੇ ਅਜਿਹੀ ਮਸ਼ੀਨ ਬਣਾਉਣ ਦਾ ਮਨ ਬਣਾਇਆ ਗਿਆ। ਜਿਸ ਨਾਲ ਸਮਾਂ ਅਤੇ ਤਾਕਤ ਦੀ ਬਹੁਤ ਘੱਟ ਲੋੜ ਪਵੇ। ਉਸ ਵੱਲੋਂ ਘਰ ਵਿੱਚ ਪਈ ਪੁਰਾਣੀ ਟੋਲੀ ਉੱਤੇ ਤਜ਼ਰਬਾ ਕੀਤਾ ਗਿਆ। ਹੌਲੀ ਹੌਲੀ ਸੋਧ ਕਰਕੇ ਇਹ ਮਸ਼ੀਨ ਤਿਆਰ ਕੀਤੀ ਗਈ, ਜੋ ਬੈਟਰੀ ਨਾਲ ਚੱਲਦੀ ਹੈ।

Spray Machine: ਜਾਣੋ, ਕਿਵੇਂ B.tech ਪਾਸ ਨੌਜਵਾਨ ਨੇ ਅਪਣੀ ਕਾਢ ਨਾਲ ਕਿਸਾਨਾਂ ਦਾ ਕੰਮ ਕੀਤਾ ਸੁਖਾਲਾ

ਇੰਝ ਕਰਦੀ ਹੈ ਮਸ਼ੀਨ ਕੰਮ:ਇਸ ਮਸ਼ੀਨ ਵਿੱਚ 25 ਕਿਲੋ ਖਾਦ ਪੈਂਦੀ ਹੈ ਅਤੇ ਡੀ ਏਰਿਆਂ ਵਿੱਚ ਰੇਅ 35 ਤੋਂ 40 ਫੁੱਟ ਦਾ ਏਰੀਆ ਕਵਰ ਕਰਦੀ ਹੈ। ਇਕ ਏਕੜ ਵਿਚ 6 ਗੇੜੀਆਂ ਰਾਹੀਂ ਮਾਤਰ 15 ਮਿੰਟ ਵਿੱਚ ਰੇਅ ਦਾ ਛਿੜਕਾਅ ਹੋ ਜਾਂਦਾ ਹੈ। ਇਸ ਮਸ਼ੀਨ ਵਿਚ ਸਰੋਂ ਤੋਂ ਲੈ ਕੇ ਮੱਕੀ ਦੇ ਦਾਣੇ ਤੱਕ ਦੇ ਸਾਈਜ਼ ਦੀ ਸੈਟਿੰਗ ਹੋ ਜਾਂਦੀ ਹੈ ਜਿਸ ਨੂੰ ਕਿਸਾਨਾਂ ਵੱਲੋਂ ਆਪਣੀ ਲੋੜ ਅਨੁਸਾਰ ਕੰਟਰੋਲ ਕੀਤਾ ਜਾ ਸਕਦਾ ਹੈ। ਇਸ ਤੋਂ ਇਲਾਵਾ ਪਤਲੇ ਤੋਂ ਮੋਟੇ ਬੀਜ ਦੀ ਸਾਈਜ਼ ਅਨੁਸਾਰ ਮਸ਼ੀਨ ਵਿਚ ਸੈਟਿੰਗ ਕੀਤੀ ਜਾ ਸਕਦੀ ਹੈ। ਉਸ ਦੀ ਇਹ ਮਸ਼ੀਨ ਦੀ ਜਦੋਂ ਪਰਖ ਕੀਤੀ ਗਈ ਤਾਂ ਇਹ ਕਿਸਾਨਾਂ ਲਈ ਬਹੁਤ ਹੀ ਕਾਰਗਰ ਸਾਬਤ ਹੋਈ।

ਕਾਢ ਨੂੰ ਜੀ-20 ਸੰਮੇਲਨ ਦਾ ਹਿੱਸਾ ਬਣਾਇਆ ਗਿਆ: ਨੌਜਵਾਨ ਦੀ ਇਕ ਮਸ਼ੀਨ ਦੇ ਕਿਸਾਨਾਂ ਨੂੰ ਮਿਲਦੇ ਫਾਇਦਿਆਂ ਨੂੰ ਦੇਖਦੇ ਹੋਏ ਇਸ ਨੂੰ ਪੇਟੈਂਟ ਕਰਵਾਇਆ ਗਿਆ। ਕਿਸਾਨਾਂ ਨੂੰ ਇਸ ਮਸ਼ੀਨ ਰਾਹੀਂ ਹੋਣ ਵਾਲੀ ਸਹੂਲਤ ਦੇ ਚੱਲਦਿਆਂ ਸਰਕਾਰ ਵੱਲੋਂ ਉਸ ਨੂੰ ਜੀ 20 ਸੰਮੇਲਨ ਵਿੱਚ ਇਹ ਮਸ਼ੀਨ ਪ੍ਰਦਰਸ਼ਤ ਕਰਨ ਦਾ ਸੱਦਾ ਦਿੱਤਾ ਗਿਆ। ਅੱਜ ਉਸ ਵੱਲੋਂ ਇਹ ਮਸ਼ੀਨਾਂ ਤਿਆਰ ਕਰਕੇ ਪੰਜਾਬ, ਹਰਿਆਣਾ, ਛੱਤੀਸਗੜ੍ਹ ਅਤੇ ਉਤਰਾਖੰਡ ਵਿੱਚ ਭੇਜੀਆਂ ਜਾ ਰਹੀਆਂ ਹਨ, ਤਾਂ ਜੋ ਕਿਸਾਨਾਂ ਨੂੰ ਇਸ ਦਾ ਲਾਭ ਮਿਲ ਸਕੇ।

ਪੰਜਾਬ ਸਰਕਾਰ ਕੋਲੋਂ ਆਰਥਿਕ ਮਦਦ ਦੀ ਮੰਗ:ਗੁਰਪ੍ਰੀਤ ਸਿੰਘ ਨੇ ਕਿਹਾ ਕਿ ਸਰਕਾਰ ਜੇਕਰ ਮੇਰੀ ਆਰਥਿਕ ਤੌਰ ਉੱਤੇ ਮਦਦ ਕਰੇ, ਤਾਂ ਉਹ ਵੱਡੀ ਪੱਧਰ ਉੱਤੇ ਅਜਿਹੀਆਂ ਮਸ਼ੀਨਾਂ ਤਿਆਰ ਕਰ ਸਕਦਾ ਹੈ। ਇਸ ਨਾਲ ਕਿਸਾਨਾਂ ਨੂੰ ਘੱਟ ਮਿਹਨਤ ਅਤੇ ਬਹੁਤ ਘੱਟ ਸਮੇਂ ਵਿਚ ਕਾਰਜ ਨੇਪਰੇ ਚਾੜ੍ਹਨ ਵਿੱਚ ਸਹੂਲਤ ਮਿਲੇਗੀ। ਉਸ ਨੇ ਸਰਕਾਰ ਤੋਂ ਮੰਗ ਕੀਤੀ ਹੈ ਕਿ ਅਸੀਂ ਆਰਥਿਕ ਮੱਦਦ ਕੀਤੀ ਜਾਵੇ, ਤਾਂ ਜੋ ਉਹ ਕਿਸਾਨਾਂ ਲਈ ਹੋਰ ਵੀ ਅਜਿਹੀਆਂ ਮਸ਼ੀਨਾਂ ਤਿਆਰ ਕਰ ਸਕੇ।