ਜੇ ਖੇਤੀ ਨੂੰ ਬਣਾਉਣਾ ਹੈ ਲਾਹੇਵੰਦ ਧੰਦਾ ਤਾਂ ਸੁਣੋਂ ਇਸ ਕਿਸਾਨ ਦੀਆਂ ਲਾਜਵਾਬ ਗੱਲਾਂ

ਪੰਜਾਬ ਦੀ ਖੇਤੀ ਲਗਾਤਾਰ ਘਾਟੇ ਦਾ ਸੌਦਾ ਬਣ ਰਹੀ ਹੈ। ਖੇਤੀ ਮਾਹਰ ਲਗਾਤਾਰ ਪੰਜਾਬ ਦੇ ਕਿਸਾਨਾਂ ਨੂੰ ਖੇਤੀ ਦੇ ਨਾਲ-ਨਾਲ ਵਪਾਰੀ ਬਣਨ ਦੀ ਸਲਾਹ ਦੇ ਰਹੇ ਹਨ। ਭਾਵੇਂ ਬਹੁਗਿਣਤੀ ਕਿਸਾਨ ਇਸ ਸਲਾਹ ‘ਤੇ ਕੰਮ ਨਹੀਂ ਕਰਨਗੇ ਜਦਕਿ ਕੁਝ ਕਿਸਾਨ ਖੇਤੀ ਕਰਨ ਦੇ ਨਾਲ-ਨਾਲ ਵਪਾਰੀ ਬਣ ਕੇ ਇਸ ਦਾ ਲਾਹਾ ਲੈ ਰਹੇ ਹਨ। ਜਿਨ੍ਹਾਂ ਵਿੱਚੋਂ ਇੱਕ ਕਿਸਾਨ ਗੁਰਵਿੰਦਰ ਸਿੰਘ ਬਰਨਾਲੇ ਜ਼ਿਲ੍ਹੇ ਦਾ ਹੈ। ਜੋ ਪਿਆਜ਼ ਦੀ ਖੇਤੀ (Onion cultivation) ਕਰਨ ਦੇ ਨਾਲ ਨਾਲ ਖੁਦ ਸੜਕ ਕਿਨਾਰੇ ਟਰੈਕਟਰ ਟਰਾਲੀ 'ਤੇ ਆਪਣੀ ਫਸਲ ਵੇਚ ਰਿਹਾ ਹੈ।

ਬਰਨਾਲਾ: ਪਿਛਲੇ ਕਰੀਬ ਤਿੰਨ ਮਹੀਨਿਆਂ ਤੋਂ ਗੁਰਵਿੰਦਰ ਸਿੰਘ ਰੋਜ਼ਾਨਾ ਇੱਕ ਟਰਾਲੀ ਭਰਕੇ ਪਿਆਜ਼ ਦੀ ਬਰਨਾਲਾ ਸ਼ਹਿਰ ਵੇਚਣ ਆਉਂਦਾ ਹੈ ਅਤੇ ਇਸ ਖੇਤੀ ਤੋਂ ਦੁੱਗਣੀ ਕਮਾਈ ਕਰ ਰਿਹਾ ਹੈ। ਇਸ ਸੰਬੰਧ ਵਿਚ ਗੱਲਬਾਤ ਕਰਦਿਆਂ ਕਿਸਾਨ ਗੁਰਵਿੰਦਰ ਸਿੰਘ ਨੇ ਦੱਸਿਆ ਕਿ ਉਹ ਪਿੰਡ ਉੱਪਲੀ ਨਾਲ ਸਬੰਧਿਤ ਹੈ ਜਦਕਿ ਰਿਹਾਇਸ਼ ਬਰਨਾਲਾ ਵਿਚ ਹੈ। ਉਨ੍ਹਾਂ ਦੱਸਿਆ ਕਿ ਪਿੰਡ ਮਹਿਲ ਖੁਰਦ ਆਪਣੇ ਰਿਸ਼ਤੇਦਾਰ ਨਾਲ ਮਿਲ ਕੇ ਪਿਆਜ਼ ਦੀ ਖੇਤੀ ਕਰ ਰਿਹਾ ਹੈ। ਉਨ੍ਹਾਂ ਵੱਲੋਂ ਪਹਿਲੀ ਵਾਰ ਸਾਢੇ ਤਿੰਨ ਏਕੜ ਵਿੱਚ ਪਿਆਜ਼ ਦੀ ਖੇਤੀ ਕੀਤੀ ਗਈ ਹੈ ਅਤੇ ਪੈਦਾ ਕੀਤੇ ਪਿਆਜ਼ ਵਪਾਰੀਆਂ ਨੂੰ ਵੇਚਣ ਦੀ ਥਾਂ 'ਤੇ ਉਹ ਖੁਦ ਵੇਚ ਰਹੇ ਹਨ।

ਉਨ੍ਹਾਂ ਦੱਸਿਆ ਕਿ ਪ੍ਰਤੀ ਏਕੜ ਉਨ੍ਹਾਂ ਨੂੰ 90 ਹਜ਼ਾਰ ਰੁਪਏ ਸਾਰੇ ਖਰਚੇ ਕੱਢ ਕੇ ਕਮਾਈ ਹੋ ਰਹੀ ਹੈ। ਜਦਕਿ ਜੇਕਰ ਇਹ ਪਿਆਜ਼ ਵਪਾਰੀ ਨੂੰ ਵੇਚਦੇ ਤਾਂ ਉਹ ਉਨ੍ਹਾਂ ਨੂੰ ਸਿਰਫ਼ 45 ਹਜ਼ਾਰ ਕਮਾਈ ਹੋਣੀ ਸੀ। ਜਿਸ ਕਰਕੇ ਉਨ੍ਹਾਂ ਨੂੰ ਦੁੱਗਣੀ ਕਮਾਈ ਹੋ ਰਹੀ ਹੈ।

ਉਨ੍ਹਾਂ ਕਿਹਾ ਕਿ ਸਾਡੇ ਬਹੁਗਿਣਤੀ ਕਿਸਾਨ ਆਪਣੀ ਫਸਲ ਖੁਦ ਵੇਚਣ ਵਿੱਚ ਸ਼ਰਮ ਮਹਿਸੂਸ ਕਰਦੇ ਹਨ, ਜਦਕਿ ਇਸ ਤਰੀਕੇ ਨਾਲ ਕਿਸਾਨ ਦੁੱਗਣੀ ਕਮਾਈ ਕਰ ਸਕਦੇ ਹਨ। ਗੁਰਵਿੰਦਰ ਸਿੰਘ ਦੱਸਿਆ ਕਿ ਉਹ ਅਗਲੇ ਵਰ੍ਹੇ ਇਸ ਤੋਂ ਵਧੇਰੇ ਰਕਬੇ ਵਿੱਚ ਪਿਆਜ਼ ਦੀ ਖੇਤੀ ਕਰਨਗੇ।

ਉੱਧਰ ਕਿਸਾਨ ਗੁਰਵਿੰਦਰ ਸਿੰਘ ਦੇ ਇਸ ਉਪਰਾਲੇ ਦੀ ਖਰੀਦਦਾਰ ਵੀ ਤਾਰੀਫ਼ ਕਰ ਰਹੇ ਹਨ। ਇਕ ਖਰੀਦਦਾਰ ਨੇ ਕਿਹਾ ਕਿ ਜਿਸ ਤਰੀਕੇ ਗੁਰਵਿੰਦਰ ਸਿੰਘ ਖੁਦ ਪਿਆਜ਼ ਦੀ ਖੇਤੀ ਕਰਕੇ ਖੁਦ ਸੜਕ ਕਿਨਾਰੇ ਖੜ੍ਹ ਕੇ ਫ਼ਸਲ ਵੇਚ ਰਿਹਾ ਹੈ ਇਸ ਤਰੀਕੇ ਨਾਲ ਕਿਸਾਨ ਦੁੱਗਣੀ ਕਮਾਈ ਕਰ ਸਕਦੇ ਹਨ।