Amritsar News: ਨੌਸਰਬਾਜ਼ ਨੇ ਦਿਨ ਦਿਹਾੜੇ ਠੱਗਿਆ ਦੁਕਾਨਦਾਰ, LED TV ਦੀ ਝੂਠੀ ਪੇਮੈਂਟ ਦਿਖਾ ਕੇ ਠੱਗ ਹੋਇਆ ਫਰਾਰ

ਅੰਮ੍ਰਿਤਸਰ ਵਿੱਚ ਸ਼ਰੇਆਮ ਐਲ ਈ ਡੀ ਟੀਵੀ ਚੋਰੀ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਮਿਲੀ ਜਾਣਕਾਰੀ ਮੁਤਾਬਿਕ ਨੌਜਵਾਨ ਦੁਕਾਨ 'ਤੇ ਆਇਆ ਅਤੇ ਉਸ ਨੇ ਆਨਲਾਈਨ ਪੇਮੈਂਟ ਦਾ ਕਹਿ ਕੇ ਟੀਵੀ ਖਰੀਦਿਆ। ਜਾਂਦਾ ਹੋਇਆ ਦੁਕਾਨ ਮਾਲਿਕ ਨੂੰ ਝੂਠਾ ਮੈਸੇਜ ਦਿਖਾ ਕੇ ਚਲਾ ਗਿਆ।

ਅੰਮ੍ਰਿਤਸਰ : ਅੱਜ ਕੱਲ੍ਹ ਨੌਸਰਬਾਜਾਂ ਵਲੋਂ ਬਜਾਰਾਂ ਵਿੱਚ ਠੱਗੀ ਦੇ ਨਵੇਂ ਨਵੇਂ ਢੰਗ ਤਰੀਕੇ ਅਪਣਾਏ ਜਾ ਰਹੇ ਹਨ ਅਤੇ ਆਏ ਦਿਨ ਅਜਿਹੀਆਂ ਘਟਨਾਵਾਂ ਦੇਖਣ ਨੂੰ ਮਿਲਦੀਆਂ ਹਨ ਕਿ ਹਰ ਕੋਈ ਹੈਰਾਨ ਹੋ ਜਾਂਦਾ ਹੈ। ਜੇਕਰ ਤੁਸੀਂ ਵੀ ਦੁਕਾਨਦਾਰ ਹੋ ਜਾਂ ਫਿਰ ਕਿਸੇ ਅਣਜਾਣ ਵਿਅਕਤੀ ਕੋਲੋਂ ਆਨਲਾਈਨ ਪੈਸਿਆਂ ਦਾ ਲੈਣ ਦੇਣ ਕਰਦੇ ਹੋ ਤਾਂ ਇਹ ਖ਼ਬਰ ਤੁਹਾਡੇ ਲਈ ਹੈ,ਤੁਸੀਂ ਇਸ ਖਬਰ ਤੋਂ ਜਾਗਰੂਕ ਹੋ ਸਕਦੇ ਹੋ ਤਾਂ ਜੋ ਤੁਸੀਂ ਕਿਸੇ ਤਰ੍ਹਾਂ ਦੀ ਠੱਗੀ ਦਾ ਸ਼ਿਕਾਰ ਨਾ ਹੋ ਸਕੋ।

ਪੇਮੈਂਟ ਦਾ ਦਿਖਾਇਆ ਝੁਠਾ ਮੈਸੇਜ:ਅਨੋਖੀ ਠੱਗੀ ਦਾ ਮਾਮਲਾ ਅੰਮ੍ਰਿਤਸਰ ਦੇ ਜੰਡਿਆਲਾ ਦਾ ਹੈ। ਜਿੱਥੇ ਪੁਰਬਾ ਟ੍ਰੇਡਰ੍ਸ, ਸਰਾਏ ਰੋਡ 'ਤੇ ਇਲੈਕਟ੍ਰੋਨਿਕ ਦੀ ਦੁਕਾਨ 'ਤੇ ਆਏ ਇੱਕ ਸ਼ਖ਼ਸ ਵੱਲੋਂ ਐਲ ਈ ਡੀ ਖਰੀਦਣ ਤੋਂ ਬਾਅਦ ਆਨਲਾਈਨ ਪੈਮੇਂਟ ਕਰਨ ਦਾ ਕਹਿ ਕੇ ਪੈਸਿਆਂ ਦਾ ਫੇਕ ਮੈਸੇਜ ਦਿਖ ਕੇ ਕਥਿਤ ਰੂਪ ਵਿੱਚ ਠੱਗੀ ਮਾਰੀ ਗਈ ਹੈ। ਮਾਮਲੇ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਦੁਕਾਨ ਮਾਲਕ ਭੁਪਿੰਦਰ ਸਿੰਘ ਅਤੇ ਉਨ੍ਹਾਂ ਦੇ ਬੇਟੇ ਜਸਕਰਨ ਸਿੰਘ ਨੇ ਦੱਸਿਆ ਕਿ ਜਿਸ ਸ਼ਖਸ ਨੇ ਉਹਨਾਂ ਨਾਲ ਠੱਗੀ ਮਾਰੀ ਹੈ। ਉਸ ਦੀ ਵੀਡੀਓ ਵੀ ਉਹਨਾਂ ਦੇ ਕੈਮਰਿਆਂ ਵਿੱਚ ਕੈਦ ਹੋ ਗਈ।

ਉਹਨਾਂ ਦੱਸਿਆ ਕਿ ਦੁਕਾਨ 'ਤੇ ਬੀਤੀ ਦਰ ਸ਼ਾਮ ਆਏ ਇਕ ਨੌਜਵਾਨ ਵੱਲੋਂ ਪਹਿਲਾਂ 43 ਇੰਚ ਦੀ ਐਲ.ਈ.ਡੀ ਦੇਖ ਕੇ ਪਸੰਦ ਕੀਤੀ ਗਈ ਅਤੇ ਬਾਅਦ ਵਿੱਚ ਉਸ ਵਲੋਂ ਆਨ ਲਾਈਨ ਪੈਮੇਂਟ ਕਰਨ ਲਈ ਕਹਿੰਦਿਆਂ ਪਹਿਲਾਂ ਇਕ ਰੁਪਏ ਅਤੇ ਫਿਰ 13 ਹਜਾਰ 500 ਰੁਪਏ ਦਾ ਮੈਸੇਜ ਦਿਖਾਇਆ ਗਿਆ ਜੋ ਕਿ ਫ਼ੇਕ ਸੀ। ਦੁਕਾਨਦਾਰ ਜਸਕਰਨ ਸਿੰਘ ਨੇ ਦੱਸਿਆ ਕਿ ਉਕਤ ਘਟਨਾ ਦੁਕਾਨ ਵਿੱਚ ਲੱਗੇ ਸੀਸੀ ਟੀਵੀ ਵਿੱਚ ਕੈਦ ਹੋ ਗਈ ਹੈ। ਜਿਸ ਦੀ ਫੁਟੇਜ ਪੁਲਿਸ ਨੂੰ ਮੁੱਹਈਆ ਕਰਵਾ ਕੇ ਸ਼ਿਕਾਇਤ ਦਿੰਦਿਆਂ ਕਾਰਵਾਈ ਦੀ ਮੰਗ ਕੀਤੀ ਹੈ। ਬਹਿਰਹਾਲ ਦੁਕਾਨਦਾਰ ਨਾਲ ਹੋਈ ਇਸ ਠੱਗੀ ਤੋਂ ਬਾਅਦ ਇਲਾਕੇ ਦੇ ਦੁਕਾਨਦਾਰ ਵੀ ਆਏ ਦਿਨ ਵਾਪਰ ਰਹੇ ਅਜਿਹੇ ਘਟਨਾਕ੍ਰਮਾਂ ਤੋਂ ਪ੍ਰੇਸ਼ਾਨ ਹਨ ਅਤੇ ਉਨ੍ਹਾਂ ਵਲੋਂ ਅਜਿਹੇ ਸ਼ਰਾਰਤੀ ਅਨਸਰਾਂ ਨੂੰ ਜਲਦ ਕਾਬੂ ਕਰਨ ਦੀ ਮੰਗ ਕੀਤੀ ਜਾ ਰਹੀ ਹੈ।