ਗਲਾਸਗੋ— ਦੇਸ਼ 'ਚ ਚੱਲ ਰਹੀ ਜੰਗ ਵਿਚਾਲੇ ਆਪਣੇ ਦੇਸ਼ ਵਾਸੀਆਂ ਨੂੰ ਖੁਸ਼ੀ ਦਾ ਮੌਕਾ ਦੇਣ ਲਈ ਵਿਸ਼ਵ ਕੱਪ ਲਈ ਕੁਆਲੀਫਾਈ ਕਰਨ ਗਈ ਯੂਕਰੇਨ ਦੀ ਫੁੱਟਬਾਲ ਟੀਮ ਨੇ ਪਲੇਆਫ ਸੈਮੀਫਾਈਨਲ 'ਚ ਸਕਾਟਲੈਂਡ ਨੂੰ 3-1 ਨਾਲ ਹਰਾ ਦਿੱਤਾ।
ਹੁਣ ਯੂਕਰੇਨ ਨੂੰ ਕਤਰ ਵਿੱਚ ਹੋਣ ਵਾਲੇ ਵਿਸ਼ਵ ਕੱਪ ਵਿੱਚ ਥਾਂ ਬਣਾਉਣ ਲਈ ਸਿਰਫ਼ ਇੱਕ ਮੈਚ ਜਿੱਤਣਾ ਹੋਵੇਗਾ। ਤਜਰਬੇਕਾਰ ਕਪਤਾਨ ਐਂਡਰੀ ਯਾਰਮੋਲੈਂਕੋ ਨੇ 33ਵੇਂ ਮਿੰਟ 'ਚ ਪਹਿਲਾ ਗੋਲ ਕੀਤਾ ਅਤੇ 49ਵੇਂ ਮਿੰਟ 'ਚ ਰੋਮਨ ਯਾਰੇਮਚੁਕ ਦੀ ਮਦਦ ਕੀਤੀ।
ਸਕਾਟਲੈਂਡ ਲਈ ਕੈਲਮ ਮੈਕਗ੍ਰੇਗਰ ਨੇ 79ਵੇਂ ਮਿੰਟ ਵਿੱਚ ਗੋਲ ਕੀਤਾ। ਯੂਕਰੇਨ ਲਈ ਆਰਟੇਮ ਡੋਬਿਕ ਨੇ ਆਖਰੀ ਮਿੰਟ ਵਿੱਚ ਗੋਲ ਕੀਤਾ। ਮੈਦਾਨ ਵਿੱਚ ਇਕੱਠੇ ਹੋਏ 51000 ਦਰਸ਼ਕਾਂ ਵਿੱਚੋਂ ਕਰੀਬ 3000 ਯੂਕਰੇਨ ਦੇ ਸਨ, ਜਿਨ੍ਹਾਂ ਨੇ ਜਿੱਤ ਦਾ ਜਸ਼ਨ ਮਨਾਇਆ।
ਯੂਕਰੇਨ ਦੇ ਕੋਚ ਓਲੇਕਸੈਂਡਰ ਪੈਟਰਾਕੋਵ ਨੇ ਕਿਹਾ ਕਿ ਜਿੱਤ ਸਰਹੱਦ 'ਤੇ ਅਤੇ ਹਸਪਤਾਲਾਂ ਵਿੱਚ ਉਨ੍ਹਾਂ ਦੇ ਸੈਨਿਕਾਂ ਦੀ ਸੀ, ਜਿਨ੍ਹਾਂ ਨੇ ਆਪਣੇ ਖੂਨ ਦੀ ਆਖਰੀ ਬੂੰਦ ਦਿੱਤੀ ਅਤੇ ਜੋ ਯੂਕਰੇਨ ਵਿੱਚ ਰੋਜ਼ਾਨਾ ਲੜ ਰਹੇ ਹਨ। ਹੁਣ ਯੂਕਰੇਨ ਦਾ ਸਾਹਮਣਾ ਐਤਵਾਰ ਨੂੰ ਵੇਲਜ਼ ਨਾਲ ਹੋਵੇਗਾ ਜਿਸ ਵਿੱਚ ਜੇਤੂ ਟੀਮ ਨਵੰਬਰ ਵਿੱਚ ਹੋਣ ਵਾਲੇ ਵਿਸ਼ਵ ਕੱਪ ਵਿੱਚ ਥਾਂ ਬਣਾ ਲਵੇਗੀ।
ਇਹ ਵੀ ਪੜ੍ਹੋ:French Open: 4 ਘੰਟੇ ਦੀ ਰੋਮਾਂਚਕ ਲੜਾਈ...ਫਿਰ ਐਂਵੇ ਹੀ ਮੈਦਾਨ ਮਾਰ ਲੈ ਗਿਆ, 'ਲਾਲ ਬੱਜਰੀ ਦਾ ਰਾਜਾ'
