ਟੋਕਿਓ : ਜਾਪਾਨ ਆਪਣੀ ਆਧੁਨਿਕਤਾ ਅਤੇ ਰਚਨਾਤਮਕਤਾ ਲਈ ਕਾਫ਼ੀ ਪ੍ਰਸਿੱਧ ਹੈ। ਅਗਲੇ ਸਾਲ ਜਾਪਾਨ ਵਿੱਚ ਹੀ ਖੇਡਾਂ ਦੇ ਮਹਾਂਕੁੰਭ ਓਲੰਪਿਕ ਅਤੇ ਪੈਰਾਓਲੰਪਿਕ ਖੇਡਾਂ ਹੋਣ ਜਾ ਰਹੀਆਂ ਹਨ। ਇੰਨ੍ਹਾਂ ਖੇਡਾਂ ਵਿੱਚ ਤਮਗ਼ਾ ਜਿੱਤਣਾ ਹਰ ਖਿਡਾਰੀ ਦਾ ਸੁਪਨਾ ਹੁੰਦਾ ਹੈ। ਇਹ ਤਮਗ਼ਾ ਹਰ ਖਿਡਾਰੀ ਆਪਣੇ ਦੇਸ਼ ਵਿੱਚ ਜਾ ਕੇ ਮਾਣ ਨਾਲ ਗਲੇ ਵਿੱਚ ਪਾਉਂਦਾ ਹੈ, ਪਰ ਇਸ ਵਾਰ ਤਮਗ਼ੇ ਕੁੱਝ ਅਲੱਗ ਹੀ ਹਨ। ਇਸ ਵਾਰ ਤਮਗ਼ਾ ਕਿਸੇ ਵੀ ਦੇਸ਼ ਦਾ ਖਿਡਾਰੀ ਜਿੱਤੇ ਉਸ ਉੱਤੇ ਜਾਪਾਨ ਦੇ ਵਾਸੀਆਂ ਦੀ ਮੋਹਰ ਰਹੇਗੀ।
ਮੀਡਿਆ ਰਿਪੋਰਟਾਂ ਮੁਤਾਬਕ, ਜਾਪਾਨ ਨੇ ਓਲੰਪਿਕ ਅਤੇ ਪੈਰਾਓਲੰਪਿਕ ਖੇਡਾਂ ਲਈ ਜੋ ਤਮਗ਼ੇ ਤਿਆਰ ਕੀਤੇ ਹਨ ਉਹ ਦੇਸ਼ ਵਿੱਚ ਚਲਾਏ ਗਈ ਇੱਕ ਵਿਸ਼ੇਸ਼ ਮੁਹਿੰਮ ਦਾ ਹਿੱਸਾ ਹੈ। ਇਸ ਮੁਹਿੰਮ ਵਿੱਚ ਜਾਪਾਨ ਦੇ 90 ਫ਼ੀਸਦੀ ਸ਼ਹਿਰ, ਪਿੰਡ ਅਤੇ ਕਸਬਿਆਂ ਦਾ ਯੋਗਦਾਨ ਰਿਹਾ ਹੈ।
ਜਾਪਾਨ ਨੇ 1 ਅਪ੍ਰੈਲ 2017 ਤੋਂ ਲੈ ਕੇ 31 ਮਾਰਡ 2019 ਤੱਕ ਇੱਕ ਵਿਸ਼ੇਸ਼ ਮੁਹਿੰਮ ਚਲਾਈ ਸੀ ਜਿਸ ਦੇ ਤਹਿਤ ਜਾਪਾਨ ਦੇ ਲੋਕਾਂ ਨੇ ਆਪਣੇ ਘਰ ਤੋਂ ਛੋਟੇ-ਛੋਟੇ ਇਲੈਕਟ੍ਰੋਨਿਕ ਉਪਕਰਨ ਵਰਗੇ ਮੋਬਾਈਲ ਫ਼ੋਨ ਆਦਿ ਦਾਨ ਕੀਤੇ ਸੀ। ਓਲੰਪਿਕ ਪ੍ਰਬੰਧਕ ਕਮੇਟੀ ਨੇ ਉਨ੍ਹਾਂ ਇਲੈਕਟ੍ਰੋਨਿਕ ਉਪਕਰਨਾਂ ਨੂੰ ਰਿਸਾਇਕਲ ਕਰ ਕੇ ਖੇਡਾਂ ਦੇ ਤਮਗ਼ੇ ਤਿਆਰ ਕੀਤੇ ਹਨ। ਇਸ ਮੁਹਿੰਮ ਨੂੰ 'ਟੋਕਿਓ 2020 ਮੈਡਲ ਪ੍ਰੋਜੈਕਟ' ਨਾਂਅ ਦਿੱਤਾ ਗਿਆ ਸੀ।