FIH ਸਲਾਨਾ ਪੁਰਸਕਾਰਾਂ ਵਿੱਚ ਭਾਰਤੀਆਂ ਦਾ ਦਬਦਬਾ, ਹਰਮਨਪ੍ਰੀਤ ਅਤੇ ਗੁਰਜੀਤ ਨੂੰ ਵੱਡੇ ਇਨਾਮ

ਟੋਕੀਓ ਓਲੰਪਿਕ ਖੇਡਾਂ ਵਿੱਚ ਭਾਰਤੀ ਪੁਰਸ਼ ਟੀਮ ਦੇ ਇਤਿਹਾਸਕ ਕਾਂਸੀ ਦੇ ਤਗਮੇ ਅਤੇ ਮਹਿਲਾ ਟੀਮ ਦੇ ਬੇਮਿਸਾਲ ਪ੍ਰਦਰਸ਼ਨ ਦੇ ਕਾਰਨ ਭਾਰਤੀ ਖਿਡਾਰੀਆਂ ਅਤੇ ਕੋਚਾਂ ਨੇ ਐਫਆਈਐਚ ਹਾਕੀ ਸਟਾਰਸ ਐਵਾਰਡ 2020-21 ਵਿੱਚ ਦਬਦਬਾ ਬਣਾਇਆ।

ਲੁਸਾਨੇ: ਭਾਰਤ ਨੇ ਅੰਤਰਰਾਸ਼ਟਰੀ ਹਾਕੀ ਫੈਡਰੇਸ਼ਨ (FIH) ਦੇ ਸਾਲਾਨਾ ਪੁਰਸਕਾਰਾਂ ਵਿੱਚ ਬੁੱਧਵਾਰ ਨੂੰ ਆਪਣਾ ਦਬਦਬਾ ਅਤੇ ਪੰਜ ਖਿਡਾਰੀਆਂ ਤੇ ਪੁਰਸ਼ਾਂ ਅਤੇ ਮਹਿਲਾ ਟੀਮਾਂ ਦੇ ਮੁੱਖ ਕੋਚਾਂ ਦੇ ਨਾਲ ਵੱਖ-ਵੱਖ ਸ਼੍ਰੇਣੀਆਂ ਵਿੱਚ ਚੋਟੀ ਦੇ ਪੁਰਸਕਾਰ ਹਾਸਲ ਕੀਤੇ।

ਟੋਕੀਓ ਓਲੰਪਿਕ ਖੇਡਾਂ ਵਿੱਚ ਭਾਰਤੀ ਪੁਰਸ਼ ਟੀਮ ਦੇ ਇਤਿਹਾਸਕ ਕਾਂਸੀ ਦੇ ਤਗਮੇ ਅਤੇ ਮਹਿਲਾ ਟੀਮ ਦੇ ਬੇਮਿਸਾਲ ਪ੍ਰਦਰਸ਼ਨ ਦੇ ਕਾਰਨ ਭਾਰਤੀ ਖਿਡਾਰੀਆਂ ਅਤੇ ਕੋਚਾਂ ਨੇ ਐਫਆਈਐਚ ਹਾਕੀ ਸਟਾਰਸ ਐਵਾਰਡ 2020-21 ਵਿੱਚ ਦਬਦਬਾ ਬਣਾਇਆ।

ਗੁਰਜੀਤ ਕੌਰ (ਮਹਿਲਾ) ਅਤੇ ਹਰਮਨਪ੍ਰੀਤ ਸਿੰਘ (ਪੁਰਸ਼) ਨੇ ਆਪੋ-ਆਪਣੀਆਂ ਸ਼੍ਰੇਣੀਆਂ ਵਿੱਚ ਸਰਬੋਤਮ ਖਿਡਾਰੀ (ਪਲੇਅਰ ਆਫ ਦਾ ਈਅਰ) ਪੁਰਸਕਾਰ ਜਿੱਤਿਆ।

ਸਵਿਤਾ ਪੂਨੀਆ (ਸਰਬੋਤਮ ਗੋਲਕੀਪਰ, ਮਹਿਲਾ), ਪੀਆਰ ਸ੍ਰੀਜੇਸ਼ (ਸਰਬੋਤਮ ਗੋਲਕੀਪਰ, ਪੁਰਸ਼), ਸ਼ਰਮੀਲਾ ਦੇਵੀ (ਸਰਬੋਤਮ ਰਾਈਜ਼ਿੰਗ ਸਟਾਰ, ਮਹਿਲਾ) ਅਤੇ ਵਿਵੇਕ ਪ੍ਰਸਾਦ (ਸਰਬੋਤਮ ਰਾਈਜ਼ਿੰਗ ਸਟਾਰ, ਪੁਰਸ਼) ਦੇ ਨਾਲ-ਨਾਲ ਭਾਰਤੀ ਮਹਿਲਾ ਟੀਮ ਦੇ ਕੋਚ ਸੋਡ ਮਾਰਿਨ ਅਤੇ ਪੁਰਸ਼ ਟੀਮ ਦੇ ਮੁਖ ਕੋਚ ਗ੍ਰਾਹਮ ਰੀਡ ਨੇ ਵੀ ਸਭ ਤੋਂ ਵੱਧ ਵੋਟਾਂ ਹਾਸਲ ਕੀਤੀਆਂ।

ਰੀਡ ਹੁਣ ਵੀ ਟੀਮ ਦੇ ਨਾਲ ਬਣੇ ਹੋਏ ਹਨ, ਜਦੋਂ ਕਿ ਮਾਰਿਨ ਦਾ ਕਾਰਜਕਾਲ ਟੋਕੀਓ ਖੇਡਾਂ ਦੇ ਨਾਲ ਹੀ ਸਮਾਪਤ ਹੋ ਗਿਆ ਸੀ।

ਰਾਸ਼ਟਰੀ ਸੰਘਾਂ ਦੀਆਂ ਵੋਟਾਂ ਨੂੰ ਕੁੱਲ ਨਤੀਜਿਆਂ ਦਾ 50 ਪ੍ਰਤੀਸ਼ਤ ਮੰਨਿਆ ਗਿਆ। ਰਾਸ਼ਟਰੀ ਸੰਘਾਂ ਦੀ ਨੁਮਾਇੰਦਗੀ ਉਨ੍ਹਾਂ ਦੇ ਸਬੰਧਤ ਰਾਸ਼ਟਰੀ ਕਪਤਾਨਾਂ ਅਤੇ ਕੋਚਾਂ ਦੁਆਰਾ ਕੀਤੀ ਗਈ। ਇਸ ਤੋਂ ਇਲਾਵਾ ਅੰਤਮ ਫੈਸਲਾ ਪ੍ਰਸ਼ੰਸਕਾਂ ਅਤੇ ਖਿਡਾਰੀਆਂ (25 ਪ੍ਰਤੀਸ਼ਤ) ਅਤੇ ਮੀਡੀਆ (25 ਪ੍ਰਤੀਸ਼ਤ) ਦੀਆਂ ਵੋਟਾਂ ਦੇ ਅਧਾਰ 'ਤੇ ਲਿਆ ਗਿਆ।

ਐਫਆਈਐਚ ਦੇ ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਕੁੱਲ 79 ਰਾਸ਼ਟਰੀ ਐਸੋਸੀਏਸ਼ਨਾਂ ਨੇ ਵੋਟਿੰਗ ਵਿੱਚ ਹਿੱਸਾ ਲਿਆ। ਇਨ੍ਹਾਂ ਵਿੱਚ ਅਫਰੀਕਾ ਵਿੱਚ 25 ਵਿੱਚੋਂ 11, ਏਸ਼ੀਆ ਵਿੱਚ 33 ਵਿੱਚੋਂ 29, ਯੂਰਪ ਵਿੱਚ 42 ਵਿੱਚੋਂ 19, ਓਸ਼ੇਨੀਆ ਵਿੱਚ ਅੱਠ ਵਿੱਚੋਂ ਤਿੰਨ ਅਤੇ ਪੈਨ ਅਮਰੀਕਾ ਵਿੱਚ 30 ਵਿੱਚੋਂ 17 ਮੈਂਬਰ ਸ਼ਾਮਲ ਹਨ।

ਇਸ 'ਚ ਕਿਹਾ ਗਿਆ ਹੈ, “ਰਿਕਾਰਡ 300,000 ਪ੍ਰਸ਼ੰਸਕਾਂ ਨੇ ਵੋਟ ਦਿੱਤੀ। ਐਫਆਈਐਚ ਹਾਕੀ ਸਟਾਰਸ ਪੁਰਸਕਾਰਾਂ ਵਿੱਚ ਪ੍ਰਸ਼ੰਸਕਾਂ ਦੀ ਸ਼ਮੂਲੀਅਤ ਬੇਮਿਸਾਲ ਸੀ। ”