ਜਨਮ ਦਿਨ ਉੱਤੇ ਖ਼ਾਸ : ਖੇਡਾਂ ਦਾ ਸਰਦਾਰ, ਬਲਬੀਰ ਸਿੰਘ ਸੀਨੀਅਰ

ਖੇਡਾਂ ਦੇ ਸਰਦਾਰ ਅਤੇ ਹਾਕੀ ਦੇ ਮਹਾਨ ਖਿਡਾਰੀ ਬਲਬੀਰ ਸਿੰਘ ਸੀਨੀਅਰ ਦੇ ਜਨਮ ਦਿਨ ਮੌਕੇ ਈਟੀਵੀ ਭਾਰਤ ਵੱਲੋਂ ਇੱਕ ਖ਼ਾਸ ਪੇਸ਼ਕਸ਼।

ਹਾਕੀ ਦੇ ਮਹਾਨ ਖਿਡਾਰੀ ਬਲਬੀਰ ਸਿੰਘ ਸੀਨੀਅਰ, ਜਿੰਨ੍ਹਾਂ ਅੱਜ ਅਸੀਂ 95ਵਾਂ ਜਨਮ ਦਿਨ ਮਨਾ ਰਹੇ ਹਾਂ। ਬਲਬੀਰ ਸਿੰਘ ਸੀਨੀਅਰ ਦਾ ਜਨਮ ਪੰਜਾਬ ਦੇ ਹਰੀਪੁਰ ਖ਼ਾਲਸਾ ਵਿਖੇ 10 ਅਕਤੂਬਰ 1924 ਨੂੰ ਹੋਇਆ ਸੀ।
ਉਨ੍ਹਾਂ ਨੇ ਆਪਣੇ ਹਾਕੀ ਕਰਿਅਰ ਦੀ ਸ਼ੁਰੂਆਤ ਸੰਨ 1942-43 ਵਿੱਚ ਕੀਤੀ ਸੀ, ਜਿਸ ਦੌਰਾਨ ਉਨ੍ਹਾਂ ਨੇ ਪੰਜਾਬ ਯੂਨੀਵਰਸਿਟੀ ਦੀ ਹਾਕੀ ਵਿੱਚ ਅਗਵਾਈ ਕੀਤੀ।

ਪੰਜਾਬ ਯੂਨੀਵਰਸਿਟੀ ਨੇ ਬਲਬੀਰ ਸਿੰਘ ਦੀ ਅਗਵਾਈ ਵਿੱਚ ਬਤੌਰ ਕਪਤਾਨ ਲਗਾਤਾਰ 1943, 1944 ਅਤੇ 1945 ਵਿੱਚ ਆਲ ਇੰਡੀਆ ਇੰਟਰ-ਯੂਨੀਵਰਸਿਟੀ ਦਾ ਖ਼ਿਤਾਬ ਵੀ ਜਿੱਤਿਆ।

1947 ਦੀ ਵੰਡ ਵੇਲੇ ਬਲਬੀਰ ਸਿੰਘ ਦਾ ਪਰਿਵਾਰ ਲੁਧਿਆਣਾ ਵੱਲ ਨੂੰ ਕੂਚ ਕਰ ਗਿਆ। ਲੁਧਿਆਣੇ ਆਉਣ ਤੋਂ ਬਲਬੀਰ ਸਿੰਘ ਪੰਜਾਬ ਪੁਲਿਸ ਵਿੱਚ ਨੌਕਰੀ ਕਰਨ ਲੱਗ ਪਏ।

ਤੁਹਾਨੂੰ ਦੱਸ ਦਈਏ ਕਿ ਬਲਬੀਰ ਸਿੰਘ ਸੀਨੀਅਰ ਇਕਲੌਤੇ ਅਜਿਹੇ ਹਾਕੀ ਖਿਡਾਰੀ ਹਨ, ਜਿੰਨ੍ਹਾਂ ਨੇ 3 ਓਲੰਪਿਕਾਂ ਵਿੱਚ ਭਾਰਤ ਦੀ ਝੋਲੀ ਵਿੱਚ 3 ਸੋਨ ਤਮਗ਼ੇ ਪਾਏ ਸਨ।

ਬਲਬੀਰ ਸਿੰਘ ਦੇ ਬਣਾਏ ਹੋਏ ਰਿਕਾਰਡ ਹਾਲੇ ਤੱਕ ਕਾਇਮ ਹਨ। ਉਨ੍ਹਾਂ ਦਾ ਓਲੰਪਿਕ ਖੇਡਾਂ ਵਿੱਚ ਸਭ ਤੋਂ ਜ਼ਿਆਦਾ ਗੋਲ ਕਰਨ ਦਾ ਰਿਕਾਰਡ ਵੀ ਹਾਲੇ ਤੱਕ ਕੋਈ ਨਹੀਂ ਤੋੜ ਸਕਿਆ।

ਸੰਨ 1957 ਵਿੱਚ ਜਿੰਨ੍ਹਾਂ ਵਿਅਕਤੀਆਂ ਨੂੰ ਪਦਮ ਸ੍ਰੀ ਨਾਲ ਨਵਾਜਿਆ ਗਿਆ, ਬਲਬੀਰ ਸਿੰਘ ਉਨ੍ਹਾਂ ਵਿੱਚੋਂ ਪਹਿਲੇ ਖਿਡਾਰੀ ਸਨ।

ਭਾਰਤ ਵਿੱਚ ਤਾਂ ਉਨ੍ਹਾਂ ਬਹੁਤ ਮਾਣ-ਸਨਮਾਨ ਮਿਲਿਆ, ਪਰ ਵਿਦੇਸ਼ਾਂ ਨੇ ਉਨ੍ਹਾਂ ਨੂੰ ਬਹੁਤ ਮਾਣ-ਸਨਮਾਨ ਬਖ਼ਸ਼ਿਆ। ਡੋਮੀਨਿਕ ਰਿਪਬਲਿਕ ਨੇ ਸੰਨ 1958 ਵਿੱਚ ਬਲਬੀਰ ਸਿੰਘ ਦੇ ਨਾਂਅ ਦੀ ਇੱਕ ਪੋਸਟਲ ਸਟੈਂਪ ਵਿੱਚ ਜਾਰੀ ਕੀਤੀ ਸੀ।

ਸੰਨ 1971 ਵਿੱਚ ਖੇਡੇ ਹਾਕੀ ਵਿਸ਼ਵ ਕੱਪ ਦੇ ਬਲਬੀਰ ਸਿੰਘ ਹਿੱਸਾ ਰਹੇ ਸਨ, ਜਿਸ ਵਿੱਚ ਭਾਰਤ ਨੇ ਤਾਂਬੇ ਦਾ ਤਮਗ਼ਾ ਆਪਣੇ ਨਾਂਅ ਕੀਤਾ।

ਬਲਬੀਰ ਸਿੰਘ ਨੂੰ ਸਾਲ 2015 ਵਿੱਚ ਹਾਕੀ ਦਾ ਲਾਈਫ਼ ਟਾਈਮ ਅਚੀਵਮੈਂਟ ਅਵਾਰਡ ਵੀ ਦਿੱਤਾ ਗਿਆ ਹੈ।

ਤੁਹਾਨੂੰ ਦੱਸ ਦਈਏ ਕਿ ਇਸੇ ਸਾਲ ਪੰਜਾਬ ਸਰਕਾਰ ਨੇ ਬਲਬੀਰ ਸਿੰਘ ਨੂੰ ਪੰਜਾਬ ਦੇ ਸਭ ਤੋਂ ਵੱਡੇ ਅਵਾਰਡ ਮਹਾਰਾਜਾ ਰਣਜੀਤ ਸਿੰਘ ਅਵਾਰਡ ਨਾਲ ਵੀ ਨਿਵਾਜਿਆ ਹੈ।

ਕੈਪਟਨ ਅਮਰਿੰਦਰ ਸਿੰਘ ਨੇ ਇਹ ਅਵਾਰਡ ਉਨ੍ਹਾਂ ਨੂੰ ਚੰਡੀਗੜ੍ਹ ਦੇ ਪੀਜੀਆਈ ਹਸਪਤਾਲ ਵਿਖੇ ਇਲਾਜ ਕਰਵਾਉਣ ਆਏ ਮੌਕੇ ਦਿੱਤਾ।

ਈਟੀਵੀ ਭਾਰਤ ਖੇਡਾਂ ਦੇ ਇਸ ਸਰਦਾਰ ਨੂੰ ਉਨ੍ਹਾਂ ਦੇ ਜਨਮ ਦਿਨ ਮੌਕੇ-ਮੌਕੇ ਵਧਾਈਆਂ ਦਿੰਦਾ ਹੈ ਅਤੇ ਉਨ੍ਹਾਂ ਦੀ ਤੰਦਰੁਸਤੀ ਦੀ ਖੈਰ ਮੰਗਦਾ ਹੈ।