World Cup 2023 AUS vs NED Highlights: ਆਸਟਰੇਲੀਆ ਨੇ ਨੀਦਰਲੈਂਡ ਨੂੰ 309 ਦੌੜਾਂ ਨਾਲ ਹਰਾ ਕੇ ਵਿਸ਼ਵ ਕੱਪ ਦੇ ਇਤਿਹਾਸ ਵਿੱਚ ਸਭ ਤੋਂ ਵੱਡੀ ਜਿੱਤ ਕੀਤੀ ਹਾਸਿਲ

ਆਸਟ੍ਰੇਲੀਆ ਕ੍ਰਿਕਟ ਟੀਮ ਨੇ ਨੀਦਰਲੈਂਡ ਨੂੰ ਵਨਡੇ ਵਿਸ਼ਵ ਕੱਪ ਦੀ ਸਭ ਤੋਂ ਵੱਡੀ ਹਾਰ ਦਿੱਤੀ ਹੈ। ਆਸਟ੍ਰੇਲੀਆ ਦੇ ਵੱਡੇ ਸਕੋਰ ਦਾ ਪਿੱਛਾ ਕਰਦੇ ਹੋਏ ਨੀਦਰਲੈਂਡ ਦੀ ਟੀਮ ਟੁੱਟ ਗਈ। ਇਸ ਹਾਰ ਦੇ ਨਾਲ ਹੀ ਆਈਸੀਸੀ ਵਿਸ਼ਵ ਕੱਪ 2023 ਵਿੱਚ ਇੱਕ ਹੋਰ ਵੱਡਾ ਰਿਕਾਰਡ ਬਣ ਗਿਆ ਹੈ। World Cup 2023 AUS vs NED Highlights.

ਨਵੀਂ ਦਿੱਲੀ:ICC World Cup 2023 ਦਾ 24ਵਾਂ ਮੈਚ ਦਿੱਲੀ ਦੇ ਅਰੁਣ ਜੇਤਲੀ ਸਟੇਡੀਅਮ ਵਿੱਚ ਆਸਟਰੇਲੀਆ ਅਤੇ ਨੀਦਰਲੈਂਡ ਵਿਚਾਲੇ ਖੇਡਿਆ ਗਿਆ। ਇਸ ਮੈਚ ਵਿੱਚ ਆਸਟਰੇਲੀਆ ਨੇ ਨੀਦਰਲੈਂਡ ਨੂੰ 309 ਦੌੜਾਂ ਨਾਲ ਹਰਾਇਆ। ਇਸ ਮੈਚ 'ਚ ਆਸਟ੍ਰੇਲੀਆ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ 50 ਓਵਰਾਂ 'ਚ 8 ਵਿਕਟਾਂ ਗੁਆ ਕੇ 399 ਦੌੜਾਂ ਬਣਾਈਆਂ। 400 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦਿਆਂ ਨੀਦਰਲੈਂਡ ਦੀ ਟੀਮ 21 ਓਵਰਾਂ 'ਚ 90 ਦੌੜਾਂ 'ਤੇ ਆਲ ਆਊਟ ਹੋ ਗਈ ਅਤੇ 309 ਦੌੜਾਂ ਨਾਲ ਹਾਰ ਗਈ। ਵਨਡੇ ਵਿਸ਼ਵ ਕੱਪ ਦੇ ਇਤਿਹਾਸ ਵਿੱਚ ਇਹ ਹੁਣ ਤੱਕ ਦੀ ਸਭ ਤੋਂ ਵੱਡੀ ਜਿੱਤ ਹੈ। ਆਸਟ੍ਰੇਲੀਆ ਦੀ 5 ਮੈਚਾਂ 'ਚ ਇਹ ਤੀਜੀ ਜਿੱਤ ਹੈ ਜਦਕਿ ਨੀਦਰਲੈਂਡ ਦੀ 5 ਮੈਚਾਂ 'ਚ ਚੌਥੀ ਹਾਰ ਹੈ।

ਆਸਟ੍ਰੇਲੀਆ ਦੀ ਪਾਰੀ - 399/8

ਆਸਟ੍ਰੇਲੀਆ ਲਈ ਇਸ ਮੈਚ 'ਚ ਗਲੇਨ ਮੈਕਸਵੈੱਲ ਨੇ ਤਬਾਹੀ ਮਚਾਈ ਅਤੇ ਤੂਫਾਨੀ ਸੈਂਕੜਾ ਲਗਾਇਆ। ਮੈਕਸਵੈੱਲ ਨੇ 27 ਗੇਂਦਾਂ 'ਤੇ 6 ਚੌਕਿਆਂ ਅਤੇ 2 ਛੱਕਿਆਂ ਦੀ ਮਦਦ ਨਾਲ ਆਪਣਾ ਅਰਧ ਸੈਂਕੜਾ ਪੂਰਾ ਕੀਤਾ ਅਤੇ 248.78 ਦੇ ਧਮਾਕੇਦਾਰ ਸਟ੍ਰਾਈਕ ਰੇਟ 'ਤੇ 8 ਚੌਕਿਆਂ ਅਤੇ 8 ਛੱਕਿਆਂ ਦੀ ਮਦਦ ਨਾਲ 40 ਗੇਂਦਾਂ 'ਚ ਆਪਣਾ ਸੈਂਕੜਾ ਪੂਰਾ ਕੀਤਾ। ਇਸ ਮੈਚ 'ਚ ਉਸ ਨੇ 44 ਗੇਂਦਾਂ 'ਚ 9 ਚੌਕਿਆਂ ਅਤੇ 8 ਛੱਕਿਆਂ ਦੀ ਮਦਦ ਨਾਲ 106 ਦੌੜਾਂ ਬਣਾਈਆਂ।

ਮੈਕਸਵੈੱਲ ਤੋਂ ਇਲਾਵਾ ਡੇਵਿਡ ਵਾਰਨਰ ਨੇ ਵੀ ਸੈਂਕੜਾ ਲਗਾਇਆ। ਵਾਰਨਰ ਨੇ 93 ਗੇਂਦਾਂ 'ਚ 11 ਚੌਕਿਆਂ ਅਤੇ 3 ਛੱਕਿਆਂ ਦੀ ਮਦਦ ਨਾਲ 104 ਦੌੜਾਂ ਦੀ ਪਾਰੀ ਖੇਡੀ। ਇਸ ਤੋਂ ਇਲਾਵਾ ਆਸਟ੍ਰੇਲੀਆ ਲਈ ਮਾਰਨਸ ਲੈਬੁਸ਼ਗਨ ਨੇ 47 ਗੇਂਦਾਂ 'ਚ 7 ਚੌਕਿਆਂ ਅਤੇ 2 ਛੱਕਿਆਂ ਦੀ ਮਦਦ ਨਾਲ 62 ਦੌੜਾਂ, ਸਟੀਵ ਸਮਿਥ ਨੇ 68 ਗੇਂਦਾਂ 'ਚ 9 ਚੌਕਿਆਂ ਅਤੇ 1 ਛੱਕੇ ਦੀ ਮਦਦ ਨਾਲ 71 ਦੌੜਾਂ ਬਣਾਈਆਂ। ਨੀਦਰਲੈਂਡ ਲਈ ਪਾਲ ਵੈਨ ਮੀਕਰੇਨ ਨੇ 4 ਵਿਕਟਾਂ ਲਈਆਂ।

ਨੀਦਰਲੈਂਡ ਦੀ ਪਾਰੀ - 90/10

ਆਸਟ੍ਰੇਲੀਆ ਵੱਲੋਂ ਦਿੱਤੀਆਂ 400 ਦੌੜਾਂ ਦਾ ਪਿੱਛਾ ਕਰਦੇ ਹੋਏ ਨੀਦਰਲੈਂਡ ਦੀ ਪਾਰੀ ਕਦੋਂ ਖਤਮ ਹੋ ਗਈ, ਪਤਾ ਹੀ ਨਹੀਂ ਲੱਗਾ। ਨੀਦਰਲੈਂਡ ਦੀ ਟੀਮ ਇਕ ਤੋਂ ਬਾਅਦ ਇਕ ਵਿਕਟਾਂ ਗੁਆਉਂਦੀ ਰਹੀ। ਨੀਦਰਲੈਂਡ ਲਈ ਵਿਕਰਮਜੀਤ ਸਿੰਘ ਨੇ 25 ਦੌੜਾਂ, ਮੈਕਸ ਓਡੌਡ ਨੇ 6 ਦੌੜਾਂ, ਕੋਲਿਨ ਐਕਰਮੈਨ ਨੇ 10 ਦੌੜਾਂ, ਬਾਸ ਡੀ ਲੀਡੇ ਨੇ 4 ਦੌੜਾਂ, ਤੇਜਾ ਨਿਦਾਮਨੁਰੂ ਨੇ 14 ਦੌੜਾਂ, ਕਪਤਾਨ ਸਕਾਟ ਐਡਵਰਡਜ਼ ਨੇ ਨਾਬਾਦ 12 ਦੌੜਾਂ, ਸਿਬਰੈਂਡ ਐਂਗਲਬ੍ਰੈਚਟ ਨੇ 11 ਦੌੜਾਂ ਬਣਾਈਆਂ। ਲੋਗਨ ਵੈਨ ਬੀਕ ਜ਼ੀਰੋ 'ਤੇ, ਰੋਇਲੋਫ ਵੈਨ ਡੇਰ ਮੇਰਵੇ ਜ਼ੀਰੋ 'ਤੇ, ਆਰੀਅਨ ਦੱਤ 1 ਦੌੜਾਂ 'ਤੇ, ਪਾਲ ਵੈਨ ਮੀਕਰੇਨ ਜ਼ੀਰੋ 'ਤੇ ਆਊਟ ਹੋਏ।