ਹੈਦਰਾਬਾਦ: ਇੰਡੀਅਨ ਪ੍ਰੀਮੀਅਰ ਲੀਗ 2022 ਦੇ 15ਵੇਂ ਸੀਜ਼ਨ ਵਿੱਚ ਹੁਣ ਤੱਕ 64 ਮੈਚ ਖੇਡੇ ਜਾ ਚੁੱਕੇ ਹਨ। ਪਲੇਆਫ ਦੀ ਤਸਵੀਰ ਅਜੇ ਸਪੱਸ਼ਟ ਨਹੀਂ ਹੈ। ਸਿਰਫ਼ ਗੁਜਰਾਤ ਟਾਈਟਨਜ਼ ਹੀ ਆਈਪੀਐਲ 2022 ਦੇ ਪਲੇਆਫ਼ ਵਿੱਚ ਆਪਣੀ ਥਾਂ ਪੱਕੀ ਕਰਨ ਵਿੱਚ ਕਾਮਯਾਬ ਰਹੀ ਹੈ। ਬਾਕੀ ਤਿੰਨ ਸਥਾਨਾਂ ਲਈ ਅਜੇ ਵੀ ਸੱਤ ਟੀਮਾਂ ਵਿਚਾਲੇ ਸਖ਼ਤ ਮੁਕਾਬਲਾ ਹੈ।
ਦੱਸ ਦੇਈਏ ਕਿ ਸੋਮਵਾਰ (16 ਮਈ) ਨੂੰ ਪੰਜਾਬ ਕਿੰਗਜ਼ ਨੂੰ 17 ਦੌੜਾਂ ਨਾਲ ਹਰਾ ਕੇ ਦਿੱਲੀ ਹੁਣ ਟਾਪ-4 ਵਿੱਚ ਪਹੁੰਚ ਗਈ ਹੈ। ਇਸ ਕਾਰਨ ਰਾਇਲ ਚੈਲੰਜਰਜ਼ ਬੈਂਗਲੁਰੂ ਦੀਆਂ ਮੁਸ਼ਕਲਾਂ ਵਧ ਗਈਆਂ ਹਨ। ਕਿਉਂਕਿ ਟੀਮ ਹੁਣ ਪੰਜਵੇਂ ਨੰਬਰ 'ਤੇ ਖਿਸਕ ਗਈ ਹੈ। ਇਸ ਤੋਂ ਬਾਅਦ ਵੀ ਬੈਂਗਲੁਰੂ ਦੀ ਟੀਮ ਪਲੇਆਫ ਦੀ ਦੌੜ ਵਿੱਚ ਬਰਕਰਾਰ ਹੈ। ਆਉ ਹੁਣ ਸੱਤ ਟੀਮਾਂ ਅਤੇ ਉਹਨਾਂ ਦੇ ਪਲੇਆਫ ਵਿੱਚ ਪਹੁੰਚਣ ਲਈ ਸਮੀਕਰਨਾਂ ਉੱਤੇ ਇੱਕ ਨਜ਼ਰ ਮਾਰੀਏ।
ਲਖਨਊ ਸੁਪਰ ਜਾਇੰਟਸ :ਲਖਨਊ ਸੁਪਰ ਜਾਇੰਟਸ ਪਿਛਲੇ ਦੋ ਮੈਚਾਂ ਵਿੱਚ ਹਾਰ ਗਈ ਹੈ। ਇਸ ਨਾਲ ਟੀਮ ਨੂੰ ਪਲੇਆਫ 'ਚ ਜਾਣ ਤੋਂ ਰੋਕ ਦਿੱਤਾ ਗਿਆ ਹੈ। ਐਲਐਸਜੀ ਦੇ ਇਸ ਸਮੇਂ 16 ਅੰਕ ਹਨ, ਟੀਮ ਚੰਗੀ ਸਥਿਤੀ ਵਿੱਚ ਹੈ, ਪਰ ਉਸਦੀ ਪਲੇਆਫ ਟਿਕਟ ਪੱਕੀ ਨਹੀਂ ਹੈ। ਟੀਮ ਨੂੰ ਹੁਣ ਹਰ ਹਾਲਤ ਵਿੱਚ ਕੋਲਕਾਤਾ ਨਾਈਟ ਰਾਈਡਰਜ਼ ਖ਼ਿਲਾਫ਼ ਅਗਲਾ ਮੈਚ ਜਿੱਤਣਾ ਹੋਵੇਗਾ। ਹਾਲਾਂਕਿ ਚੰਗੀ ਗੱਲ ਇਹ ਹੈ ਕਿ ਟੀਮ ਦੀ ਨੈੱਟ ਰਨ ਰੇਟ ਪਲੱਸ 'ਚ ਹੈ।
ਦਿੱਲੀ ਕੈਪੀਟਲਜ਼ :ਦਿੱਲੀ ਕੈਪੀਟਲਜ਼ ਦੇ 13 ਮੈਚਾਂ ਵਿੱਚ ਸੱਤ ਜਿੱਤਾਂ ਨਾਲ 14 ਅੰਕ ਹਨ। ਦਿੱਲੀ ਨੂੰ ਹੁਣ ਮੁੰਬਈ ਇੰਡੀਅਨਜ਼ ਦੇ ਖਿਲਾਫ ਅਗਲੇ ਮੈਚ 'ਚ ਵੀ ਉਤਰਨਾ ਹੈ, ਜਿਸ ਨਾਲ ਉਸ ਦੇ 16 ਅੰਕ ਹੋ ਜਾਣਗੇ ਅਤੇ ਉਹ ਪਲੇਆਫ ਲਈ ਚੰਗੀ ਸਥਿਤੀ 'ਚ ਰਹੇਗੀ। ਦਿੱਲੀ ਦਾ ਨੈੱਟ ਰਨ ਰੇਟ ਪਲੱਸ 0.255 ਹੋ ਗਿਆ ਹੈ। ਹੁਣ ਨੈੱਟ ਰਨ ਰੇਟ ਦੇ ਹਿਸਾਬ ਨਾਲ ਟੀਮ ਦਾ ਮੁਲਾਂਕਣ ਕੀਤਾ ਜਾ ਸਕਦਾ ਹੈ ਪਰ ਆਪਣੀ ਸਥਿਤੀ ਮਜ਼ਬੂਤ ਕਰਨ ਲਈ ਟੀਮ ਨੂੰ ਅਗਲਾ ਮੈਚ ਵੀ ਜਿੱਤਣਾ ਹੋਵੇਗਾ, ਜੋ ਗਰੁੱਪ ਗੇੜ 'ਚ ਟੀਮ ਦਾ ਆਖਰੀ ਮੈਚ ਹੋਵੇਗਾ।
ਰਾਜਸਥਾਨ ਰਾਇਲਜ਼ : ਰਾਜਸਥਾਨ ਰਾਇਲਜ਼ ਦੇ 13 ਮੈਚ ਖੇਡ ਕੇ 16 ਅੰਕ ਹੋ ਗਏ ਹਨ ਪਰ ਟੀਮ ਨੂੰ ਪਲੇਆਫ 'ਚ ਜਗ੍ਹਾ ਪੱਕੀ ਕਰਨ ਲਈ ਇਕ ਮੈਚ ਜਿੱਤਣਾ ਜ਼ਰੂਰੀ ਹੈ। ਜੇਕਰ ਉਹ ਅਗਲਾ ਮੈਚ ਹਾਰ ਜਾਂਦੇ ਹਨ ਤਾਂ ਟੀਮ ਦੀ ਨੈੱਟ ਰਨ ਰੇਟ ਪਲੇਆਫ 'ਚ ਅਹਿਮ ਭੂਮਿਕਾ ਨਿਭਾਏਗੀ। ਫਿਲਹਾਲ ਟੀਮ ਦੀ ਨੈੱਟ ਰਨ ਰੇਟ ਪਲੱਸ 'ਚ ਹੈ। ਟੀਮ ਦੀ ਨੈੱਟ ਰਨ ਰੇਟ ਇਸ ਸਮੇਂ +0.304 ਹੈ। ਰਾਜਸਥਾਨ ਨੂੰ ਹੁਣ ਅਗਲੇ ਮੈਚ ਵਿੱਚ ਚੇਨਈ ਸੁਪਰ ਕਿੰਗਜ਼ ਖ਼ਿਲਾਫ਼ ਜਿੱਤ ਦਰਜ ਕਰਨੀ ਹੋਵੇਗੀ ਤਾਂ ਉਹ ਪਲੇਆਫ ਵਿੱਚ ਆਪਣੀ ਥਾਂ ਪੱਕੀ ਕਰ ਸਕੇਗਾ।
ਪੰਜਾਬ ਕਿੰਗਜ਼ : ਦਿੱਲੀ ਤੋਂ ਹਾਰਨ ਤੋਂ ਬਾਅਦ ਪੰਜਾਬ ਕਿੰਗਜ਼ ਕੋਲ ਸਿਰਫ਼ ਇੱਕ ਮੈਚ ਬਚਿਆ ਹੈ। ਟੀਮ ਦੇ 6 ਜਿੱਤਾਂ ਨਾਲ 12 ਅੰਕ ਹਨ। ਟੀਮ ਨੇ ਅਗਲੇ ਮੈਚ 'ਚ ਜਿੱਤ ਦਰਜ ਕਰਨੀ ਹੈ ਪਰ ਇਸ ਤੋਂ ਪਹਿਲਾਂ ਦੂਜੀਆਂ ਟੀਮਾਂ ਦੇ ਮੈਚ 'ਤੇ ਨਿਰਭਰ ਕਰਦੇ ਹੋਏ ਇਸ ਦੀਆਂ ਸੰਭਾਵਨਾਵਾਂ ਨੂੰ ਲੈ ਕੇ ਉਮੀਦਾਂ ਬੱਝੀਆਂ ਜਾਂ ਬੁਝੀਆਂ ਰਹਿਣਗੀਆਂ। ਪੰਜਾਬ ਨੂੰ ਘੱਟੋ-ਘੱਟ ਅਗਲਾ ਮੈਚ ਤਾਂ ਜਿੱਤਣਾ ਹੀ ਪਵੇਗਾ ਅਤੇ ਨਾਲ ਹੀ ਉਸ ਨੂੰ ਦੂਜੀਆਂ ਟੀਮਾਂ ਦੇ ਪ੍ਰਦਰਸ਼ਨ 'ਤੇ ਵੀ ਨਿਰਭਰ ਹੋਣਾ ਪਵੇਗਾ।
ਰਾਇਲ ਚੈਲੇਂਜਰਸ ਬੰਗਲੌਰ :ਪਿਛਲੇ ਕੁਝ ਮੈਚਾਂ 'ਚ ਹਾਰਾਂ ਕਾਰਨ ਬੈਂਗਲੁਰੂ ਲਈ ਪਲੇਆਫ ਦਾ ਰਾਹ ਮੁਸ਼ਕਿਲ ਜ਼ਰੂਰ ਹੋਇਆ ਹੈ ਪਰ ਅਸੰਭਵ ਨਹੀਂ। ਆਰਸੀਬੀ ਦੇ ਫਿਲਹਾਲ 13 ਮੈਚਾਂ ਤੋਂ ਬਾਅਦ 14 ਅੰਕ ਹਨ। ਟੀਮ ਹੁਣ 14 ਅੰਕਾਂ 'ਤੇ ਆਊਟ ਨਹੀਂ ਹੋਵੇਗੀ ਪਰ ਇੱਥੇ ਨੈੱਟ ਰਨ ਰੇਟ ਬਹੁਤ ਅਹਿਮ ਭੂਮਿਕਾ ਨਿਭਾਏਗਾ ਅਤੇ ਆਰਸੀਬੀ ਦੀ ਨੈੱਟ ਰਨ ਰੇਟ ਮਾਇਨਸ 'ਚ ਹੈ। ਬੰਗਲੌਰ ਨੂੰ ਹੁਣ ਗੁਜਰਾਤ ਟਾਈਟਨਸ ਖਿਲਾਫ ਅਗਲਾ ਮੈਚ ਜਿੱਤ ਕੇ 16 ਅੰਕ ਲੈਣੇ ਹੋਣਗੇ। RCB ਦੀ ਨੈੱਟ ਰਨ ਰੇਟ ਵਰਤਮਾਨ ਵਿੱਚ -0.323 ਹੈ।
ਕੋਲਕਾਤਾ ਨਾਈਟ ਰਾਈਡਰਜ਼ : ਕੋਲਕਾਤਾ ਨਾਈਟ ਰਾਈਡਰਜ਼ ਕੋਲ ਹੁਣ ਗਰੁੱਪ ਗੇੜ ਵਿੱਚ ਸਿਰਫ਼ ਇੱਕ ਮੈਚ ਖੇਡਣਾ ਹੈ ਅਤੇ ਉਸ ਨੂੰ ਪਲੇਆਫ ਵਿੱਚ ਪਹੁੰਚਣ ਦੀਆਂ ਸੰਭਾਵਨਾਵਾਂ ਨੂੰ ਬਰਕਰਾਰ ਰੱਖਣ ਲਈ ਇਹ ਮੈਚ ਜਿੱਤਣਾ ਹੋਵੇਗਾ। ਕੇਕੇਆਰ ਦੇ 12 ਅੰਕ ਹਨ ਅਤੇ ਜੇਕਰ ਉਹ ਅਗਲਾ ਮੈਚ ਜਿੱਤਦਾ ਹੈ ਤਾਂ ਉਸਦੇ 14 ਅੰਕ ਹੋ ਜਾਣਗੇ। ਕੇਕੇਆਰ ਲਈ ਚੰਗੀ ਗੱਲ ਇਹ ਹੈ ਕਿ ਟੀਮ ਦੀ ਨੈੱਟ ਰਨ ਰੇਟ ਪਲੱਸ ਵਿੱਚ ਹੈ। ਟੀਮ ਨੇ ਅਗਲਾ ਮੈਚ ਲਖਨਊ ਸੁਪਰ ਜਾਇੰਟਸ ਨਾਲ ਖੇਡਣਾ ਹੈ। ਜੋ ਕਿ ਆਸਾਨ ਨਹੀਂ ਹੋਣ ਵਾਲਾ ਹੈ। ਹਾਲਾਂਕਿ ਜਿੱਤ ਤੋਂ ਬਾਅਦ ਵੀ ਕੇਕੇਆਰ ਨੂੰ ਦੂਜੀਆਂ ਟੀਮਾਂ ਦੀ ਜਿੱਤ 'ਤੇ ਨਿਰਭਰ ਰਹਿਣਾ ਹੋਵੇਗਾ। ਟੀਮ ਦੀ ਨੈੱਟ ਰਨ ਰੇਟ +0.160 ਹੈ।
ਸਨਰਾਈਜ਼ਰਸ ਹੈਦਰਾਬਾਦ : ਸਨਰਾਈਜ਼ਰਸ ਹੈਦਰਾਬਾਦ ਨੇ ਹੁਣ ਤੱਕ 12 ਮੈਚ 5 ਜਿੱਤੇ ਹਨ ਅਤੇ 7 ਹਾਰੇ ਹਨ। ਸ਼ੁਰੂਆਤ 'ਚ ਚੰਗਾ ਪ੍ਰਦਰਸ਼ਨ ਕਰਨ ਵਾਲੀ ਟੀਮ ਲਗਾਤਾਰ ਪਿਛਲੇ ਪੰਜ ਮੈਚਾਂ 'ਚ ਹਾਰ ਗਈ ਹੈ, ਨਹੀਂ ਤਾਂ ਟੀਮ ਅੱਜ ਇਸ ਸਥਿਤੀ 'ਚ ਨਾ ਹੁੰਦੀ ਕਿ ਪਲੇਆਫ 'ਚ ਪਹੁੰਚਣਾ ਕਾਫੀ ਮੁਸ਼ਕਿਲ ਹੋ ਗਿਆ ਹੈ। ਹੈਦਰਾਬਾਦ ਦੇ ਹੁਣ 10 ਅੰਕ ਹਨ ਅਤੇ ਦੋ ਮੈਚ ਬਾਕੀ ਹਨ। ਟੀਮ ਕੁੱਲ 14 ਅੰਕਾਂ ਤੱਕ ਪਹੁੰਚ ਸਕਦੀ ਹੈ। ਅਜਿਹਾ ਹੋਣ 'ਤੇ ਵੀ ਪਲੇਆਫ 'ਚ ਜਾਣਾ ਜਾਂ ਨਾ ਜਾਣਾ ਚੰਗੀ ਨੈੱਟ ਰਨ ਰੇਟ ਅਤੇ ਹੋਰ ਟੀਮਾਂ ਦੇ ਪ੍ਰਦਰਸ਼ਨ 'ਤੇ ਨਿਰਭਰ ਕਰੇਗਾ। ਹੈਦਰਾਬਾਦ ਨੂੰ ਹੁਣ ਅਗਲੇ ਦੋ ਮੈਚ ਜਿੱਤਣੇ ਹੋਣਗੇ। ਜੇਕਰ ਟੀਮ ਇੱਕ ਵੀ ਮੈਚ ਹਾਰ ਜਾਂਦੀ ਹੈ, ਤਾਂ ਉਹ ਬਾਹਰ ਹੋ ਜਾਵੇਗੀ, ਕਿਉਂਕਿ ਉਸਦੀ ਨੈੱਟ ਰਨ ਰੇਟ -0.270 ਹੈ।
ਇਹ ਵੀ ਪੜ੍ਹੋ :IPL Match Preview: ਉਮੀਦਾਂ ਨੂੰ ਮੁੜ ਸੁਰਜੀਤ ਕਰਨ ਲਈ ਮੈਦਾਨ ’ਚ ਉੱਤਰੇਗੀ ਹੈਦਰਾਬਾਦ
