IND vs PAK : ਭਾਰਤ ਲਈ ਪਲੇਇੰਗ-11 ਦਾ ਫੈਸਲਾ ਕਰਨਾ ਆਸਾਨ ਨਹੀਂ, ਸ਼ੁਭਮਨ ਗਿੱਲ ਦਾ ਖੇਡਣਾ ਲਗਭਗ ਤੈਅ, ਇਸ਼ਾਨ-ਸ਼੍ਰੇਅਸ 'ਚੋਂ ਕੌਣ ਹੋਵੇਗਾ ਬਾਹਰ?

ਟੀਮ ਇੰਡੀਆ ਦੇ ਮਜ਼ਬੂਤ ​​ਓਪਨਰ ਬੱਲੇਬਾਜ਼ ਸ਼ੁਭਮਨ ਗਿੱਲ ਦਾ ਪਾਕਿਸਤਾਨ ਖਿਲਾਫ ਵੱਡੇ ਮੈਚ 'ਚ ਖੇਡਣਾ ਲਗਭਗ ਤੈਅ ਹੈ। ਗਿੱਲ ਦੀ ਵਾਪਸੀ ਨਾਲ ਭਾਰਤੀ ਕਪਤਾਨ ਰੋਹਿਤ ਸ਼ਰਮਾ ਅਤੇ ਮੁੱਖ ਕੋਚ ਰਾਹੁਲ ਦ੍ਰਾਵਿੜ ਨੂੰ ਪਲੇਇੰਗ 11 ਦੀ ਚੋਣ ਕਰਨ ਲਈ ਕਾਫੀ ਸੰਘਰਸ਼ ਕਰਨਾ ਪਵੇਗਾ।

ਅਹਿਮਦਾਬਾਦ:ਕ੍ਰਿਕਟ ਵਿਸ਼ਵ ਕੱਪ 2023 ਦਾ ਅੱਜ ਸਭ ਤੋਂ ਵੱਡਾ ਮੈਚ ਖੇਡਿਆ ਜਾਣਾ ਹੈ। ਅੱਜ ਭਾਰਤ ਦਾ ਸਾਹਮਣਾ ਕੱਟੜ ਵਿਰੋਧੀ ਪਾਕਿਸਤਾਨ ਨਾਲ ਹੈ। ਹੁਣ ਇਸ ਮੈਚ ਦੇ ਸ਼ੁਰੂ ਹੋਣ 'ਚ ਕੁਝ ਹੀ ਘੰਟੇ ਬਾਕੀ ਹਨ। ਦੋਵਾਂ ਟੀਮਾਂ ਵਿਚਾਲੇ ਬਹੁਤ ਉਡੀਕਿਆ ਜਾਣ ਵਾਲਾ ਇਹ ਮੈਚ 1,32,000 ਸਮਰੱਥਾ ਵਾਲੇ ਨਰਿੰਦਰ ਮੋਦੀ ਸਟੇਡੀਅਮ, ਅਹਿਮਦਾਬਾਦ ਵਿੱਚ ਦੁਪਹਿਰ 2 ਵਜੇ ਤੋਂ ਖੇਡਿਆ ਜਾਵੇਗਾ। ਇਸ ਮੈਚ 'ਚ ਦੋਵਾਂ ਟੀਮਾਂ ਦੇ ਖਿਡਾਰੀਆਂ 'ਤੇ ਸਭ ਤੋਂ ਵੱਧ ਦਬਾਅ ਹੈ। ਮੈਚ ਵਿੱਚ ਜਿੱਤ ਉਸ ਟੀਮ ਦੀ ਹੋਵੇਗੀ ਜੋ ਦਬਾਅ ਦਾ ਬਿਹਤਰ ਢੰਗ ਨਾਲ ਸਾਹਮਣਾ ਕਰ ਸਕੇਗੀ। ਭਾਰਤ ਨੂੰ ਪਲੇਇੰਗ 11 ਦਾ ਫੈਸਲਾ ਕਰਨ ਲਈ ਸਖਤ ਸੰਘਰਸ਼ ਕਰਨਾ ਹੋਵੇਗਾ।

ਸ਼ੁਭਮਨ ਗਿੱਲ ਦਾ ਖੇਡਣਾ ਲਗਭੱਗ ਤੈਅ: ਇਹ ਲਗਭਗ ਤੈਅ ਹੈ ਕਿ ਭਾਰਤ ਦੇ ਸੱਜੇ ਹੱਥ ਦੇ ਸਲਾਮੀ ਬੱਲੇਬਾਜ਼ ਸ਼ੁਭਮਨ ਗਿੱਲ, ਜੋ ਕਿ ਵਿਸ਼ਵ ਕੱਪ 2023 ਦੇ ਹੁਣ ਤੱਕ ਦੇ ਮੈਚਾਂ ਤੋਂ ਬਾਹਰ ਹਨ, ਪਾਕਿਸਤਾਨ ਖਿਲਾਫ ਨਹੀਂ ਖੇਡਣਗੇ। ਡੇਂਗੂ ਕਾਰਨ ਆਸਟਰੇਲੀਆ ਅਤੇ ਅਫਗਾਨਿਸਤਾਨ ਖਿਲਾਫ ਮੈਚਾਂ ਤੋਂ ਬਾਹਰ ਰਹੇ ਗਿੱਲ ਠੀਕ ਹੋ ਗਏ ਹਨ ਅਤੇ ਪਿਛਲੇ ਦੋ ਦਿਨ੍ਹਾਂ ਤੋਂ ਅਹਿਮਦਾਬਾਦ ਵਿੱਚ ਹਨ ਅਤੇ ਬਾਕੀ ਖਿਡਾਰੀਆਂ ਨਾਲ ਅਭਿਆਸ ਸੈਸ਼ਨ ਵਿੱਚ ਹਿੱਸਾ ਲੈ ਰਹੇ ਹਨ। ਗਿੱਲ ਨੈੱਟ 'ਤੇ ਬੱਲੇਬਾਜ਼ੀ ਕਰਦੇ ਹੋਏ ਵੀ ਕਾਫੀ ਪਸੀਨਾ ਵਹਾ ਰਿਹਾ ਹੈ। ਗਿੱਲ ਦੀ ਵਾਪਸੀ ਨਾਲ ਟੀਮ ਇੰਡੀਆ ਮਜ਼ਬੂਤ ​​ਹੋਵੇਗੀ। ਨਰਿੰਦਰ ਮੋਦੀ ਸਟੇਡੀਅਮ ਵਿੱਚ ਗਿੱਲ ਦਾ ਬੱਲਾ ਵੀ ਵਧੀਆ ਚੱਲਦਾ ਹੈ।

ਈਸ਼ਾਨ ਤੇ ਸ਼੍ਰੇਅਸ ਵਿਚਾਲੇ ਕੌਣ ਹੋਵੇਗਾ ਬਾਹਰ?:ਪਾਕਿਸਤਾਨ ਦੇ ਖਿਲਾਫ ਵੱਡੇ ਮੈਚ 'ਚ ਟੀਮ ਇੰਡੀਆ 'ਚ ਸ਼ੁਭਮਨ ਗਿੱਲ ਦੀ ਵਾਪਸੀ ਨਾਲ ਇਹ ਤੈਅ ਹੈ ਕਿ ਇਸ਼ਾਨ ਕਿਸ਼ਨ ਅਤੇ ਸ਼੍ਰੇਅਸ ਅਈਅਰ 'ਚੋਂ ਇਕ ਨੂੰ ਪਲੇਇੰਗ-11 'ਚੋਂ ਬਾਹਰ ਕੀਤਾ ਜਾਵੇਗਾ। ਗਿੱਲ ਦੀ ਗੈਰ-ਮੌਜੂਦਗੀ ਵਿੱਚ ਇਸ਼ਾਨ ਕਿਸ਼ਨ ਨੇ ਪਿਛਲੇ ਦੋ ਮੈਚਾਂ ਵਿੱਚ ਕਪਤਾਨ ਰੋਹਿਤ ਸ਼ਰਮਾ ਨਾਲ ਓਪਨਿੰਗ ਕੀਤੀ ਸੀ। ਉਹ ਆਸਟ੍ਰੇਲੀਆ ਦੇ ਖਿਲਾਫ ਮੈਚ 'ਚ ਜ਼ੀਰੋ 'ਤੇ ਆਊਟ ਹੋ ਗਏ ਸੀ ਅਤੇ ਅਫਗਾਨਿਸਤਾਨ ਖਿਲਾਫ 47 ਦੌੜਾਂ ਦੀ ਪਾਰੀ ਖੇਡੀ ਸੀ। ਇਸ ਦੇ ਨਾਲ ਹੀ ਪਿਛਲੇ ਦੋ ਮੈਚਾਂ ਵਿੱਚ ਸ਼੍ਰੇਅਸ ਅਈਅਰ ਦਾ ਸਕੋਰ ਜ਼ੀਰੋ ਅਤੇ 25 ਦੌੜਾਂ ਅਜੇਤੂ ਰਿਹਾ ਹੈ। ਅਜਿਹੇ 'ਚ ਇਹ ਦੇਖਣਾ ਦਿਲਚਸਪ ਹੋਵੇਗਾ ਕਿ ਦੋਵਾਂ 'ਚੋਂ ਕਿਸ ਨੂੰ ਪਲੇਇੰਗ-11 'ਚ ਜਗ੍ਹਾ ਮਿਲਦੀ ਹੈ। ਕੇਐੱਲ ਰਾਹੁਲ ਸਿਰਫ ਵਿਕਟਕੀਪਰ ਬੱਲੇਬਾਜ਼ ਦੀ ਭੂਮਿਕਾ 'ਚ ਨਜ਼ਰ ਆਉਣਗੇ।