ਲੀਡਸ: ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (ਬੀਸੀਸੀਆਈ) ਨੇ ਹੁਣ ਇਸ ਮਾਮਲੇ ਨੂੰ ਗੰਭੀਰਤਾ ਨਾਲ ਲੈਂਦੇ ਹੋਏ ਅੰਤਰਰਾਸ਼ਟਰੀ ਕ੍ਰਿਕੇਟ ਪਰਿਸ਼ਦ (ਆਈਸੀਸੀ) ਨੂੰ ਇੱਕ ਪੱਤਰ ਲਿਖਿਆ ਹੈ ਜਿਸ ਵਿੱਚ ਉਨ੍ਹਾਂ ਨੇ ਭਾਰਤੀ ਖਿਡਾਰੀਆਂ ਅਤੇ ਫੈਂਸ ਦੀ ਸੁਰੱਖਿਆ ਨੂੰ ਲੈ ਕੇ ਭਰੋਸੇ ਦੀ ਮੰਗ ਕੀਤੀ ਹੈ।
ਬੀਸੀਸੀਆਈ ਨੇ ਆਪਣੇ ਪੱਤਰ ਵਿੱਚ ਆਈਸੀਸੀ ਨੂੰ ਕਿਹਾ ਕਿ ਇਹ ਹੈਰਾਨੀ ਵਾਲੀ ਗੱਲ ਹੈ ਕਿ ਹੈਡਿੰਗਲੇ ਵਿੱਚ ਮੈਚ ਦੌਰਾਨ ਕਿਵੇਂ ਤਿੰਨ ਜਹਾਜ਼ ਰਾਜਨੀਤਕ ਨਾਅਰਿਆਂ ਨਾਲ ਵੱਖ-ਵੱਖ ਸਮੇਂ 'ਤੇ ਸਟੇਡਿਅਮ ਦੇ ਉੱਤੇ ਲੰਘ ਗਏ।
ਦੱਸ ਦਈਏ ਕਿ ਭਾਰਤ-ਸ੍ਰੀਲੰਕਾ ਮੈਚ ਦੌਰਾਨ ਸਟੇਡਿਅਮ ਉਪਰੋਂ ਲਗਾਤਾਰ ਤਿੰਨ ਹਵਾਈ ਜਹਾਜ਼ ਨਿਕਲੇ ਸਨ, ਜਿਨ੍ਹਾਂ ਉੱਤੇ ਰਾਜਨੀਤਕ ਸੁਨੇਹਾ ਲਿਖੇ ਹੋਏ ਸਨ। ਪਹਿਲਾ ਹਵਾਈ ਜਹਾਜ਼ ਨਿਕਲਿਆ ਜਿਸ 'ਤੇ ਲਟਕੇ ਇੱਕ ਬੈਨਰ ਉੱਤੇ ਲਿਖਿਆ ਹੋਇਆ ਸੀ - 'ਕਸ਼ਮੀਰ ਲਈ ਨਿਆਂ'। ਦੂਜੇ ਹਵਾਈ ਜਹਾਜ਼ 'ਤੇ ਲੱਗੇ ਬੈੱਨਰ ਉੱਤੇ ਲਿਖਿਆ ਸੀ ਕਿ 'ਭਾਰਤ ਨਸਲਕੁਸ਼ੀ ਬੰਦ ਕਰੋ ਅਤੇ ਕਸ਼ਮੀਰ ਨੂੰ ਮੁਕਤ ਕਰੋ'। ਇਸ ਦੇ ਨਾਲ ਹੀ ਉੱਥੋ ਨਿਕਲੇ ਤੀਜੇ ਹਵਾਈ ਜਹਾਜ਼ 'ਤੇ ਲਿਖਿਆ ਸੀ ਕਿ 'ਭਾਰਤ ਵਿੱਚ ਹਜੂਮੀ ਹੱਤਿਆ (ਮੌਬ ਲਿਚਿੰਗ) ਬੰਦ ਕਰੋ।'
ਇਸ ਨੂੰ ਲੈ ਕੇ ਆਈਸੀਸੀ ਨਰਾਜ਼ ਵੇਖੀ ਗਈ ਅਤੇ ਉਨ੍ਹਾਂ ਨੇ ਮੈਨਚੇਸਟਰ ਅਤੇ ਬਰਮਿੰਘਮ ਦੀ ਪੁਲਿਸ ਨਾਲ ਗੱਲ ਕੀਤੀ। ਪੁਲਿਸ ਨੇ ਆਈਸੀਸੀ ਨੂੰ ਯਕੀਨੀ ਬਣਾਇਆ ਕਿ ਉਹ ਇਨ੍ਹਾਂ ਦੋ ਸ਼ਹਿਰਾਂ ਵਿੱਚਲੇ ਸਟੇਡਿਅਮਾਂ ਦੇ ਆਲੇ-ਦੁਆਲੇ ਦੇ ਇਲਾਕੇ ਨੂੰ ਨੋ- ਫ਼ਲਾਇੰਗ ਜ਼ੋਨ ਐਲਾਨ ਕਰ ਦੇਵੇਗੀ।