ਨਵੀਂ ਦਿੱਲੀ: ਵਿਸ਼ਵ ਕੱਪ 'ਚ ਮੰਗਲਵਾਰ ਨੂੰ ਖੇਡੇ ਗਏ ਮੈਚ ਵਿੱਚ ਭਾਰਤ ਨੇ ਬੰਗਲਾਦੇਸ਼ ਨੂੰ 28 ਦੌੜਾਂ ਨਾਲ ਹਰਾ ਕੇ ਸੈਮੀਫਾਈਨਲ ਵਿੱਚ ਆਪਣੀ ਥਾਂ ਪੱਕੀ ਕਰ ਲਈ ਹੈ। ਇਹ ਮੈਚ ਕੁਝ ਖ਼ਾਸ ਕਾਰਨ ਕਰਕੇ ਸੋਸ਼ਲ ਮੀਡੀਆ 'ਤੇ ਛਾਇਆ ਹੋਇਆ ਹੈ। ਇਸ ਮੈਚ 'ਚ ਭਾਰਤ ਦੀ ਇੱਕ 87 ਸਾਲ ਦੀ ਬਜ਼ੁਰਗ ਕ੍ਰਿਕਟ ਫੈਨ ਮੈਚ ਵੇਖਣ ਪੁੱਜੀ। ਬਜ਼ੁਰਗ ਔਰਤ ਭਾਰਤ ਦੇ ਕ੍ਰਿਕਟਰਜ਼ ਨੂੰ ਸਮਰਥਣ ਦੇਣ ਪੁੱਜੀ ਸੀ। ਉਨ੍ਹਾਂ ਦੇ ਇਸ ਜਜ਼ਬੇ ਨੂੰ ਹਰ ਕੋਈ ਸਲਾਮ ਕਰ ਰਿਹਾ ਹੈ। ਬਜ਼ੁਰਗ ਔਰਤ ਦਾ ਨਾਂਅ ਚਾਰੂਲਤਾ ਪਟੇਲ ਹੈ।
87 ਸਾਲ ਦੀ ਬਜ਼ੁਰਗ ਕ੍ਰਿਕਟ ਫੈਨ ਦੀ ਕ੍ਰਿਕੇਟ ਲਈ ਦੀਵਾਨਗੀ ਵੇਖਦਿਆਂ ਉਨ੍ਹਾਂ ਨੂੰ ਭਾਰਤੀ ਟੀਮ ਦੇ ਕਪਤਾਨ ਵਿਰਾਟ ਕੋਹਲੀ ਤੇ ਉਪ ਕਪਤਾਨ ਰੋਹਿਤ ਸ਼ਰਮਾ ਖ਼ੁਦ ਮਿਲਣ ਪੁੱਜੇ। ਇਸ ਮੌਕੇ ਦੋਹਾਂ ਕ੍ਰਿਕਟਰਜ਼ ਨੇ ਬਜ਼ੁਰਗ ਔਰਤ ਦੇ ਪੈਰ ਛੂਹ ਕੇ ਉਨ੍ਹਾਂ ਕੋਲੋਂ ਆਸ਼ੀਰਵਾਦ ਲਿਆ ਤੇ ਵਿਸ਼ਵ ਕੱਪ ਜਿੱਤਣ ਦੀਆਂ ਦੁਆਵਾਂ ਮੰਗੀਆਂ।