ਲੋਕਾਂ ਦਾ ਪੈਸਿਆਂ ਪ੍ਰਤੀ ਲਾਲਚ ਨੂੰ ਵਿਖਾਉਂਦਾ ਹੈ ਫ਼ਿਲਮ ਕਿਟੀ ਪਾਰਟੀ ਦਾ ਟ੍ਰੇਲਰ

ਨਵ ਬਾਜਵਾ ਵੱਲੋਂ ਨਿਰਦੇਸ਼ਿਤ ਫ਼ਿਲਮ ਕਿਟੀ ਪਾਰਟੀ ਦਾ ਟ੍ਰੇਲਰ ਰੀਲੀਜ਼ ਹੋ ਚੁੱਕਾ ਹੈ। ਇਸ ਟ੍ਰੇਲਰ ਦੇ ਵਿੱਚ ਜਸਵਿੰਦਰ ਭਲਾ, ਗੁਰਪ੍ਰੀਤ ਘੁੱਗੀ, ਹਾਰਬੀ ਸੰਘਾ, ਕਾਇਨਾਤ ਅਰੋੜਾ ਵਰਗੇ ਕਲਾਕਾਰ ਨਜ਼ਰ ਆ ਰਹੇ ਹਨ।

ਚੰਡੀਗੜ੍ਹ: 13 ਦਸੰਬਰ ਨੂੰ ਸਿਨੇਮਾ ਘਰਾਂ ਦੇ ਵਿੱਚ ਰਿਲੀਜ਼ ਹੋਣ ਵਾਲੀ ਫ਼ਿਲਮ ਕਿਟੀ ਪਾਰਟੀ ਦਾ ਟ੍ਰੇਲਰ ਰੀਲੀਜ਼ ਹੋ ਚੁੱਕਾ ਹੈ। ਨਵ ਬਾਜਵਾ ਵੱਲੋਂ ਲਿਖਿਤ ਅਤੇ ਨਿਰਦੇਸ਼ਿਤ ਇਸ ਫ਼ਿਲਮ ਦੇ ਵਿੱਚ ਨਵ ਬਾਜਵਾ, ਕਾਇਨਾਤ ਅਰੋੜਾ, ਗੁਰਪ੍ਰੀਤ ਘੁੱਗੀ, ਜਸਵਿੰਦਰ ਭਲਾ, ਹਾਰਬੀ ਸੰਘਾ, ਉਪਾਸਨਾ ਸਿੰਘ, ਰਾਣਾ ਰਣਬੀਰ, ਨੀਲੂ ਕੋਹਲੀ, ਮਨੀ ਬੋਪਾਰਾਏ, ਅਨੀਤਾ ਦੇਵਗਨ,ਸਤਵੰਤ ਕੌਰ ਵਰਗੇ ਕਲਾਕਾਰ ਨਜ਼ਰ ਆਉਣਗੇ।

ਪੈਸੇ ਵੱਧ ਕਮਾਉਣ ਦੇ ਲਾਲਚ 'ਚ ਲੋਕ ਕੀ ਕੁਝ ਕਰਦੇ ਨੇ ਇਹ ਟ੍ਰਲੇਰ ਦੇ ਵਿੱਚ ਵੇਖਣ ਨੂੰ ਮਿਲਿਆ ਹੈ। ਕਾਇਨਾਤ ਅਰੋੜਾ ਔਰਤਾਂ ਨੂੰ ਲਾਲਚ ਦਿੰਦੀ ਹੈ ਕਿ ਉਹ ਦਿਨ੍ਹਾਂ 'ਚ ਪੈਸੇ ਡਬਲ ਕਰ ਦੇਵੇਗੀ। ਉਸ ਦੇ ਝਾਂਸੇ 'ਚ ਆ ਕੇ ਔਰਤਾਂ ਇਹ ਕਦਮ ਵੀ ਚੁੱਕ ਲੈਂਦੀਆਂ ਹਨ ਪਰ ਬਾਅਦ ਵਿੱਚ ਕਾਇਨਾਤ ਪੈਸੇ ਲੈਕੇ ਦੋੜ ਜਾਂਦੀ ਹੈ। ਔਰਤਾਂ ਦੇ ਡੂਬੇ ਪੈਸੇ ਵਾਪਿਸ ਆਉਂਦੇ ਹਨ ਕਿ ਨਹੀਂ ਇਸ 'ਤੇ ਹੀ ਫ਼ਿਲਮ ਆਧਾਰਿਤ ਹੈ।

ਜ਼ਿਕਰਯੋਗ ਹੈ ਕਿ ਇਸ ਫ਼ਿਲਮ ਤੋਂ ਇਲਾਵਾ ਨਵ ਬਾਜਵਾ ਦਾ ਨਵਾਂ ਗੀਤ ਬਦਮਾਸ਼ੀ ਵੀ ਦਰਸ਼ਕਾਂ ਦੇ ਛੇਤੀ ਹੀ ਰੂਬਰੂ ਹੋਵੇਗਾ। ਇਸ ਗੀਤ ਦਾ ਪੋਸਟਰ ਨਵ ਬਾਜਵਾ ਨੇ ਆਪਣੇ ਇੰਸਟਾਗ੍ਰਾਮ 'ਤੇ ਸਾਂਝਾ ਕੀਤਾ ਹੈ।