ਹੈਦਰਾਬਾਦ: ਪੰਜਾਬ ਦੇ ਮਸ਼ਹੂਰ ਗਾਇਕ ਜਸਬੀਰ ਜੱਸੀ (Jasbir Jassi) ਦਾ ਅੱਜ ਯਾਨੀ 7 ਫ਼ਰਵਰੀ ਨੂੰ ਜਨਮਦਿਨ ਹੈ। ਅੱਜ ਉਹ ਆਪਣਾ 52ਵਾਂ ਜਨਮਦਿਨ ਮਨਾ ਰਹੇ ਹਨ। ਪੰਜਾਬ ਦੇ ਗੁਰਦਾਸਪੁਰ ਵਿੱਚ ਜਨਮੇ ਜਸਬੀਰ ਨੇ ਆਪਣੇ ਕਰੀਅਰ ਵਿੱਚ ਦੋ ਪੰਜਾਬੀ ਫ਼ਿਲਮਾਂ ਵਿੱਚ ਵੀ ਕੰਮ ਕੀਤਾ ਹੈ। ਉਨ੍ਹਾਂ ਦੇ ਜਨਮਦਿਨ ਮੌਕੇ ਜਿੱਥੇ ਅੱਜ ਅਸੀਂ ਉਨ੍ਹਾਂ ਬਾਰੇ ਗੱਲ ਕਰਾਂਗੇ, ਉੱਥੇ ਹੀ ਗੱਲ ਕਰਾਂਗੇ ਜੱਸੀ ਦੇ ਬੱਚਿਆਂ ਬਾਰੇ।
ਜੱਸੀ ਨੇ ਆਪਣੇ ਦੋਵੇਂ ਪੁੱਤਰ ਰੱਖੇ ਮੀਡੀਆ ਤੋਂ ਦੂਰ
ਵੈਸੇ ਤਾਂ, ਮਸ਼ਹੂਰ ਹਸਤੀਆਂ ਲਈ ਆਪਣੇ ਬੱਚਿਆਂ ਨੂੰ ਮੀਡੀਆ ਦੀ ਚਮਕ ਤੋਂ ਦੂਰ ਰੱਖਣਾ ਆਮ ਗੱਲ ਹੋ ਗਈ ਹੈ। ਛੋਟੀ ਉਮਰ ਵਿੱਚ, ਉਨ੍ਹਾਂ ਨੂੰ ਮੀਡੀਆ ਅਤੇ ਸੋਸ਼ਲ ਮੀਡੀਆ, ਪੈਪਰਾਜ਼ੀ ਤੋਂ ਦੂਰ ਰੱਖਿਆ ਜਾਂਦਾ ਹੈ ਅਤੇ ਜਦੋਂ ਇਹ ਬੱਚੇ ਵੱਡੇ ਹੁੰਦੇ ਹਨ, ਉਹ ਸਮਾਗਮਾਂ, ਚੈਟ ਸ਼ੋਅ, ਪਾਰਟੀਆਂ ਵਿੱਚ ਦਿਖਾਈ ਦੇਣ ਲੱਗਦੇ ਹਨ। ਹਾਲਾਂਕਿ, ਗਾਇਕ ਜਸਬੀਰ ਜੱਸੀ ਨੇ ਸ਼ੁਰੂ ਤੋਂ ਲੈ ਕੇ ਹੁਣ ਤੱਕ ਆਪਣੇ 2 ਪੁੱਤਰਾਂ ਸਾਕਾਰ ਜੋ ਕਿ 26 ਸਾਲ ਦਾ ਹੈ ਅਤੇ ਜੇਰੀ ਸਿੰਘ ਜੋ ਕਿ 25 ਸਾਲ ਹੈ, ਇਨ੍ਹਾਂ ਨੂੰ ਕੈਮਰੇ ਤੋਂ ਦੂਰ ਰੱਖਿਆ ਹੈ। ਇੰਟਰਨੈਟ ਉੱਤੇ ਵੀ ਇਨ੍ਹਾਂ ਦੇ ਪੁੱਤਰਾਂ ਬਾਰੇ ਕੁਝ ਲੱਭਿਆ ਜਾਵੇ ਤਾਂ ਕੋਈ ਖ਼ਾਸ ਜਾਣਕਾਰੀ ਨਹੀਂ ਮਿਲ ਪਾਉਂਦੀ।
ਨਿੱਜੀ ਜਿੰਦਗੀ ਨੂੰ ਰੱਖਿਆ ਕੈਮਰੇ ਤੋਂ ਦੂਰ
ਜੱਸੀ ਆਪਣੀ ਨਿੱਜੀ ਜ਼ਿੰਦਗੀ ਨੂੰ ਮੀਡੀਆ ਦੀਆਂ ਨਜ਼ਰਾਂ ਤੋਂ ਦੂਰ ਰੱਖਣ ਵਿੱਚ ਕਾਮਯਾਬ ਹੋ ਗਏ ਹਨ, ਇਕ ਨਿੱਜੀ ਚੈਨਲ ਨੂੰ ਇੰਟਰਵਿਊ ਦਿੰਦਿਆ ਇਸ ਪਿੱਛੇ ਕਾਰਨ ਦੱਸਦਿਆਂ ਉਨ੍ਹਾਂ ਕਿਹਾ ਕਿ, “ਮੈਂ ਕਦੇ ਨਹੀਂ ਚਾਹੁੰਦਾ ਸੀ ਕਿ ਮੇਰਾ ਬੇਟਾ ਆਪਣੇ ਆਪ ਨੂੰ ਇੱਕ ਸੈਲੀਬ੍ਰਿਟੀ ਸਮਝੇ। ਇਹ ਉਨ੍ਹਾਂ ਨੂੰ ਫੁਕਰਾ (ਸ਼ੋਅ ਆਫ਼) ਬਣਾ ਸਕਦਾ ਸੀ।"