'ਇਸ਼ਕ ਤੇਰਾ' ਨਾਲ ਲੋਕਾਂ ਦੇ ਦਿਲ ਜਿੱਤਣਗੇ ਗੁਰੂ ਰੰਧਾਵਾ

ਗੁਰੂ ਰੰਧਾਵਾ ਇਸ ਮੀਂਹ ਦੇ ਮੌਸਮ ਵਿੱਚ ਇੱਕ ਰੋਮੈਂਟਿਕ ਗਾਣਾ ਲੈ ਕੇ ਆ ਰਹੇ ਹਨ ਜਿਸ ਦਾ ਟੀਜ਼ਰ ਹਾਲ ਹੀ ਵਿੱਚ ਰਿਲੀਜ਼ ਹੋ ਚੁੱਕਾ ਹੈ। ਇਸ ਗਾਣੇ ਵਿੱਚ ਬਾਲੀਵੁੱਡ ਅਦਾਕਾਰਾ ਨੁਸ਼ਰਤ ਭਰੂਚਾ ਨਜ਼ਰ ਆਵੇਗੀ।

ਚੰਡੀਗੜ੍ਹ: ਮਸ਼ਹੂਰ ਗਾਇਕ ਗੁਰੂ ਰੰਧਾਵਾ ਆਪਣੇ ਗਾਣਿਆਂ ਕਰਕੇ ਕਾਫ਼ੀ ਸੁਰਖ਼ੀਆਂ 'ਚ ਰਹਿੰਦੇ ਹਨ। ਇਸ ਤੋਂ ਇਲਾਵਾ ਉਨ੍ਹਾਂ ਨੂੰ ਸੋਸ਼ਲ ਮੀਡੀਆ 'ਤੇ ਵੀ ਕਾਫ਼ੀ ਐਕਟੀਵ ਦੇਖਿਆ ਜਾਂਦਾ ਹੈ।

ਗੁਰੂ ਰੰਧਾਵਾ ਆਪਣੇ ਗਾਉਣ ਦੇ ਅੰਦਾਜ਼ ਤੇ ਲਿਖਤ ਕਰਕੇ ਦਰਸ਼ਕਾਂ ਦਾ ਦਿਲ ਜਿੱਤਣ ਵਿੱਚ ਹਮੇਸ਼ਾ ਕਾਮਯਾਬ ਹੋਏ ਹਨ। ਹਾਲ ਹੀ ਵਿੱਚ ਗੁਰੂ ਦੇ ਨਵੇਂ ਗਾਣੇ ਦਾ ਟੀਜ਼ਰ ਰਿਲੀਜ਼ ਹੋਇਆ ਹੈ ਜਿਸ ਦਾ ਨਾਂਅ 'ਇਸ਼ਕ ਤੇਰਾ' ਹੈ। ਗਾਣੇ ਦੇ ਨਾਂਅ ਤੋਂ ਸਾਫ਼ ਜ਼ਾਹਿਰ ਹੁੰਦਾ ਹੈ ਕਿ ਗਾਣਾ ਕਾਫ਼ੀ ਰੋਮੈਂਟਿਕ ਹੋਵੇਗਾ। ਇਹ ਗਾਣਾ, ਇਸ ਪਿਆਰ ਭਰੇ ਮੌਸਮ ਵਿੱਚ ਦੋ ਪਿਆਰ ਕਰਨ ਵਾਲਿਆਂ ਨੂੰ ਆਪਸ 'ਚ ਇੱਕ ਵਾਰ ਫਿਰ ਤੋਂ ਇਕੱਠਾ ਜ਼ਰੂਰ ਕਰ ਦੇਵੇਗਾ। ਇਹ ਗਾਣਾ 4 ਸਤੰਬਰ ਨੂੰ ਰਿਲੀਜ਼ ਹੋਵੇਗਾ।

ਇਸ ਗਾਣੇ ਵਿੱਚ ਗੁਰੂ ਨਾਲ ਬਾਲੀਵੁੱਡ ਅਦਾਕਾਰਾ ਨੁਸ਼ਰਤ ਭਰੂਚਾ ਨਜ਼ਰ ਆਵੇਗੀ। ਨੁਸ਼ਰਤ ਨੇ ਆਪਣੇ ਫ਼ਿਲਮੀ ਕਰੀਅਰ ਦੀ ਸ਼ੁਰੂਆਤ 'ਜੈ ਸੰਤੋਸ਼ੀ ਮਾਂ' ਤੋਂ ਕੀਤੀ ਸੀ।
ਜੇ ਗੱਲ ਕੀਤੀ ਜਾਵੇ ਗੁਰੂ ਰੰਧਾਵਾ ਦੀ ਤਾਂ ਉਨ੍ਹਾਂ ਨੇ ਪਾਲੀਵੁੱਡ ਤੋਂ ਇਲਾਵਾ ਬਾਲੀਵੁੱਡ ਵਿੱਚ ਵੀ ਕਈ ਹਿੱਟ ਗਾਣੇ ਦਿੱਤੇ ਹਨ। ਦੇਖਣਯੋਗ ਹੋਵੇਗਾ ਕਿ ਇਹ ਗਾਣਾ ਲੋਕਾਂ ਦੇ ਦਿਲਾਂ ਨੂੰ ਕਿੰਨਾ ਛੂਹ ਪਾਉਂਦਾ ਹੈ।