ਮੁੰਬਈ: ਸ਼ਾਹਿਦ ਕਪੂਰ ਦੀ ਹਿੱਟ ਫ਼ਿਲਮ 'ਕਬੀਰ ਸਿੰਘ' ਦੀ ਕਹਾਣੀ ਇੱਕ ਵਾਰ ਫਿਰ ਪਰਦੇ 'ਤੇ ਦਿਖਾਈ ਦੇਣ ਜਾ ਰਹੀ ਹੈ। ਤੇਲਗੂ ਫ਼ਿਲਮ ਅਰਜੁਨ ਰੈੱਡੀ ਦਾ ਅਧਿਕਾਰਤ ਰੀਮੇਕ 'ਕਬੀਰ ਸਿੰਘ' ਤੋਂ ਬਾਅਦ ਇਸ ਫ਼ਿਲਮ ਦਾ ਇੱਕ ਹੋਰ ਰੀਮੇਕ ਆਉਣ ਵਾਲਾ ਹੈ। ਇਸ ਵਾਰ ਇਹ ਫ਼ਿਲਮ 'ਆਦਿਤਿਆ ਵਰਮਾ' ਦੇ ਨਾਂਅ ਤੋਂ ਤਾਮਿਲ ਭਾਸ਼ਾ 'ਚ ਰਿਲੀਜ਼ ਹੋਵੇਗੀ।
ਇਸ ਫ਼ਿਲਮ ਦਾ ਟ੍ਰੇਲਰ ਵੀ ਰਿਲੀਜ਼ ਹੋ ਗਿਆ ਹੈ। ਟ੍ਰੇਲਰ ਵਿੱਚ ਕਈ ਦ੍ਰਿਸ਼ ਅਜਿਹੇ ਵੀ ਹਨ ਜਿਨ੍ਹਾਂ ਦੀ ਬਿਲਕੁਲ ਨਕਲ ਕੀਤੀ ਗਈ ਹੈ। ਇਹ ਤਾਮਿਲ ਫ਼ਿਲਮ ਮੁਕੇਸ਼ ਮਹਿਤਾ ਦੁਆਰਾ ਬਣਾਈ ਗਈ ਹੈ। ਇਸ ਦੇ ਨਾਲ ਹੀ ਫ਼ਿਲਮ ਦਾ ਨਿਰਦੇਸ਼ਨ Gireesaaya ਨੇ ਕੀਤਾ ਹੈ। 'ਅਰਜੁਨ ਰੈੱਡੀ' ਦੇ ਇਸ ਤਾਮਿਲ ਰੀਮੇਕ 'ਚ ਅਰਜੁਨ ਦੇ ਕਿਰਦਾਰ ਦਾ ਨਾਂਅ ਡਾ. ਆਦਿਤਿਆ ਵਰਮਾ ਰੱਖਿਆ ਗਿਆ ਹੈ। ਇਸ ਫ਼ਿਲਮ ਵਿੱਚ ਧਰੁਵ ਮੁੱਖ ਕਿਰਦਾਰ 'ਚ ਨਜ਼ਰ ਆਉਣਗੇ।
ਹੋਰ ਪੜ੍ਹੋ: ਆਲਿਆ ਤੇ ਰਣਬੀਰ ਕਰਨ ਜਾ ਰਹੇ ਨੇ ਵਿਆਹ !
ਇਹ ਧਰੁਵ ਦੀ ਪਹਿਲੀ ਫ਼ਿਲਮ ਹੈ। ਇਸ ਦੇ ਨਾਲ ਹੀ ਬਨੀਤਾ ਸੰਧੂ ਇਸ ਫਿਲਮ 'ਚ ਧਰੁਵ ਦੇ ਨਾਲ ਮੁੱਖ ਕਿਰਦਾਰ 'ਚ ਨਜ਼ਰ ਆਵੇਗੀ। ਬਨੀਤਾ ਇਸ ਤੋਂ ਪਹਿਲਾਂ ਕਈ ਟੀਵੀ ਇਸ਼ਤਿਹਾਰਾਂ ਵਿੱਚ ਨਜ਼ਰ ਆ ਚੁੱਕੀ ਹੈ। ਬਨੀਤਾ ਇੱਕ ਬ੍ਰਿਟਿਸ਼ ਮਾਡਲ ਹੈ। ਇਸ ਤੋਂ ਬਾਅਦ ਉਹ ਸ਼ੂਜੀਤ ਸਰਕਾਰ ਦੀ ਫ਼ਿਲਮ ਤੋਂ ਬਾਲੀਵੁੱਡ ਵਿੱਚ ਐਂਟਰੀ ਕਰਨ ਜਾ ਰਹੀ ਹੈ, ਜਿਸ ਵਿੱਚ ਵਰੁਣ ਧਵਨ ਉਨ੍ਹਾਂ ਦੇ ਕੋ-ਸਟਾਰ ਹੋਣਗੇ।
ਬਨੀਤਾ ਤੋਂ ਇਲਾਵਾ ਫ਼ਿਲਮ 'ਚ ਪ੍ਰਿਆ ਆਨੰਦ ਵੀ ਨਜ਼ਰ ਆਵੇਗੀ। ਪ੍ਰਿਆ ਇਸ ਤੋਂ ਪਹਿਲਾਂ ਹਿੰਦੀ ਫ਼ਿਲਮਾਂ 'FUKRE RETURNS' ਅਤੇ 'ENGLISH VINGLISH' ਵਿੱਚ ਕੰਮ ਕਰ ਚੁੱਕੀ ਹੈ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ ਕਈ ਤਾਮਿਲ ਫ਼ਿਲਮਾਂ ਵਿੱਚ ਕੰਮ ਕੀਤਾ ਹੈ। ਦੱਸ ਦਈਏ ਕਿ 'ਅਰਜੁਨ ਰੈੱਡੀ' ਤੇਲਗੂ ਇੰਡਸਟਰੀ ਦੀ ਸਭ ਤੋਂ ਵੱਡੀ ਹਿੱਟ ਫ਼ਿਲਮ ਸੀ ਜਿਸ ਤੋਂ ਬਾਅਦ ਇਸ ਫ਼ਿਲਮ ਦਾ ਹਿੰਦੀ ਵਿੱਚ ਰੀਮੇਕ ਬਣਿਆ। ਇਸ ਫ਼ਿਲਮ ਵਿੱਚ ਸ਼ਾਹਿਦ ਅਤੇ ਕਿਆਰਾ ਮੁੱਖ ਭੂਮਿਕਾ ਵਿੱਚ ਨਜ਼ਰ ਆਏ ਸਨ।
