ਨਵੀਂ ਦਿੱਲੀ: ਪਾਕਿਸਤਾਨ ਦੀ ਨਵੀਂ ਸ਼ਾਹਬਾਜ਼ ਸ਼ਰੀਫ ਦੀ ਸਰਕਾਰ 'ਚ 31 ਫੈਡਰਲ ਮੰਤਰੀ ਅਤੇ ਤਿੰਨ ਰਾਜ ਮੰਤਰੀ ਸ਼ਾਮਲ ਕੀਤੇ ਗਏ ਹਨ। ਇਸ ਤੋਂ ਇਲਾਵਾ ਪੀਪੀਪੀ ਦੇ ਇੱਕ ਮੈਂਬਰ ਅਤੇ ਪੀਐਮਐਲ-ਐਨ ਦੇ ਦੋ ਮੈਂਬਰਾਂ ਨੂੰ ਪ੍ਰਧਾਨ ਮੰਤਰੀ ਦਾ ਸਲਾਹਕਾਰ ਨਿਯੁਕਤ ਕੀਤਾ ਗਿਆ ਹੈ। ਮੰਗਲਵਾਰ ਨੂੰ ਇੱਕ ਨਾਟਕੀ ਘਟਨਾਕ੍ਰਮ ਵਿੱਚ, ਨਵੀਂ ਕੈਬਨਿਟ ਦੇ 34 ਮੰਤਰੀਆਂ ਅਤੇ 3 ਸਲਾਹਕਾਰਾਂ ਨੇ ਸਹੁੰ ਚੁੱਕੀ। ਰਾਸ਼ਟਰਪਤੀ ਆਰਿਫ ਅਲਵੀ ਦੀ ਗੈਰ-ਮੌਜੂਦਗੀ ਵਿੱਚ ਸੈਨੇਟ ਦੇ ਪ੍ਰਧਾਨ ਸਾਦਿਕ ਸੰਜਰਾਨੀ ਨੇ ਨਵੇਂ ਮੰਤਰੀਆਂ ਨੂੰ ਸਹੁੰ ਚੁਕਾਈ। ਦੱਸਿਆ ਜਾਂਦਾ ਹੈ ਕਿ ਸੋਮਵਾਰ ਨੂੰ ਹੀ ਸਹੁੰ ਚੁੱਕ ਸਮਾਗਮ ਹੋਣਾ ਸੀ ਪਰ ਰਾਸ਼ਟਰਪਤੀ ਨੇ ਸਹੁੰ ਚੁਕਾਉਣ ਤੋਂ ਇਨਕਾਰ ਕਰ ਦਿੱਤਾ।
ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਸ਼ਾਹਬਾਜ਼ ਸ਼ਰੀਫ਼ ਦੀ ਕੈਬਨਿਟ ਵਿੱਚ ਪੀਐਮਐਲ-ਐਨ ਦੇ 14 ਮੰਤਰੀ ਸ਼ਾਮਲ ਹਨ। ਇਸ ਤੋਂ ਬਾਅਦ ਬਿਲਾਵਲ ਭੁੱਟੋ ਦੀ ਪਾਕਿਸਤਾਨ ਪੀਪਲਜ਼ ਪਾਰਟੀ (ਪੀਪੀਪੀ) ਦੇ 9 ਮੰਤਰੀਆਂ ਨੂੰ ਸ਼ਾਮਲ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ ਜੇਯੂਆਈ ਦੇ 4, ਐਮਕਿਊਐਮ ਦੇ 2 ਅਤੇ ਬੀਏਪੀ ਅਤੇ ਜਮਹੂਰੀ ਵਤਨ ਪਾਰਟੀ (ਜੇਡਬਲਯੂਪੀ) ਦੇ ਇੱਕ-ਇੱਕ ਮੈਂਬਰ ਨੂੰ ਮੰਤਰੀ ਮੰਡਲ ਵਿੱਚ ਥਾਂ ਦਿੱਤੀ ਗਈ ਹੈ।
ਸ਼ਾਹਬਾਜ਼ ਸ਼ਰੀਫ਼ ਦੇ 34 ਮੰਤਰੀਆਂ ਨੇ ਚੁੱਕੀ ਸਹੁੰ ਸ਼ਾਹਬਾਜ਼ ਸ਼ਰੀਫ ਦੀ ਪਾਰਟੀ ਪੀ.ਐੱਮ.ਐੱਲ.-ਐੱਨ ਦੇ ਕੋਟੇ ਤੋਂ ਖਵਾਜਾ ਮੁਹੰਮਦ ਆਸਿਫ, ਮਰੀਅਮ ਔਰੰਗਜ਼ੇਬ, ਖੁਰਰਮ ਦਸਤਗੀਰ ਖਾਨ, ਰਾਣਾ ਤਨਵੀਰ ਹੁਸੈਨ, ਅਹਿਸਾਨ ਇਕਬਾਲ ਚੌਧਰੀ, ਰਾਣਾ ਸਨਾ ਉੱਲਾ ਖਾਨ, ਸਰਦਾਰ ਅਯਾਜ਼ ਸਾਦਿਕ, ਖਵਾਜਾ ਸਾਦ ਰਫੀਕ, ਮੀਆਂ ਜਾਵੇਦ ਲਤੀਫ, ਮੀਆਂ ਰਿਆਜ਼ ਹੁਸੈਨ ਪਰਿਜਾਦਾ। , ਮੁਰਤਜ਼ਾ ਜਾਵੇਦ ਅੱਬਾਸੀ, ਆਜ਼ਮ ਨਜ਼ੀਰ ਤਰਾਰੀ, ਮਿਫਤਾਹ ਇਸਮਾਈਲ ਨੂੰ ਮੰਤਰੀ ਬਣਾਇਆ ਗਿਆ ਹੈ।
ਬਿਲਾਵਲ ਭੁੱਟੋ ਦੀ ਪੀਪੀਪੀ ਦੇ ਸਈਅਦ ਖੁਰਸ਼ੀਦ ਅਹਿਮਦ ਸ਼ਾਹ, ਸਈਅਦ ਨਵੀਦ ਕਮਰ, ਸ਼ੈਰੀ ਰਹਿਮਾਨ ਅਬਦੁਲ ਕਾਦਿਰ ਪਟੇਲ, ਸ਼ਾਜ਼ੀਆ ਮਾਰਿਕ, ਸਈਅਦ ਮੁਰਤਜ਼ਾ ਮਹਿਮੂਦੀ, ਸਾਜਿਦ ਹੁਸੈਨ ਤੁਰਿਕ, ਅਹਿਸਾਨ ਉਰ ਰਹਿਮਾਨ ਮਜ਼ਾਰੀ, ਆਬਿਦ ਹੁਸੈਨ ਭਯੋ ਨੂੰ ਮੰਤਰੀ ਮੰਡਲ ਵਿੱਚ ਸ਼ਾਮਲ ਕੀਤਾ ਗਿਆ ਹੈ। ਰਿਪੋਰਟ ਮੁਤਾਬਕ ਬਿਲਾਵਲ ਭੁੱਟੋ ਨੇ ਆਖਰੀ ਸਮੇਂ ਵਿੱਚ ਮੰਤਰੀ ਬਣਨ ਤੋਂ ਇਨਕਾਰ ਕਰ ਦਿੱਤਾ ਸੀ। ਇਸ ਨਾਲ ਇਹ ਚਰਚਾ ਤੇਜ਼ ਹੋ ਗਈ ਹੈ ਕਿ ਨਵੀਂ ਸਰਕਾਰ ਵਿਚ ਵੀ ਸਭ ਕੁਝ ਠੀਕ ਨਹੀਂ ਹੈ।
ਜਦਕਿ ਮਾਹਿਰਾਂ ਦਾ ਮੰਨਣਾ ਹੈ ਕਿ ਸ਼ਾਹਬਾਜ਼ ਸ਼ਰੀਫ਼ ਦੇ ਮੰਤਰੀ ਮੰਡਲ 'ਚ ਕੰਮ ਕਰਨ ਨਾਲ ਬਿਲਾਵਲ ਭੁੱਟੋ ਦੇ ਕੱਦ 'ਤੇ ਅਸਰ ਪੈ ਸਕਦਾ ਸੀ, ਇਸ ਲਈ ਉਨ੍ਹਾਂ ਨੇ ਮੰਤਰੀ ਦੇ ਅਹੁਦੇ ਤੋਂ ਦੂਰੀ ਬਣਾ ਲਈ। ਦੱਸ ਦਈਏ ਕਿ ਪੀਐਮਐਲ-ਐਨ ਦੇ ਇੱਕ ਨੇਤਾ ਨੇ ਜੀਓ ਨਿਊਜ਼ 'ਤੇ ਬੋਲਦੇ ਹੋਏ ਕਿਹਾ ਸੀ ਕਿ ਬਿਲਾਵਲ ਅਗਲੇ ਵਿਦੇਸ਼ ਮੰਤਰੀ ਹੋਣਗੇ। ਕਦੇ ਪਾਕਿਸਤਾਨ ਦੀ ਵਿਦੇਸ਼ ਮੰਤਰੀ ਰਹਿ ਚੁੱਕੀ ਹਿਨਾ ਰੱਬਾਨੀ ਖਾਰ ਨੂੰ ਰਾਜ ਮੰਤਰੀ ਬਣਾਇਆ ਗਿਆ ਹੈ।
ਇਸ ਤੋਂ ਇਲਾਵਾ ਨਵੀਂ ਕੈਬਨਿਟ ਵਿੱਚ JUI-F ਅਬਦੁਲ ਵਸਾਏ, ਮੁਹੰਮਦ ਤਲਹਾ ਮਹਿਮੂਦ, ਅਸਦ ਮਹਿਮੂਦ ਅਤੇ ਜੇਯੂਆਈ-ਐਫ ਦੇ ਮੁਫਤੀ ਅਬਦੁਲ ਸ਼ਕੂਰ ਸ਼ਾਮਲ ਹਨ। ਸਈਅਦ ਅਮੀਨ-ਉਲ-ਹੱਕ ਅਤੇ ਸਈਦ ਫੈਜ਼ਲ ਅਲੀ ਸਬਜਵਾਰੀ ਨੂੰ ਐਮਕਿਊਐਮ-ਪੀ ਕੋਟੇ ਤੋਂ ਮੰਤਰੀ ਬਣਾਇਆ ਗਿਆ ਹੈ। ਬੀਏਪੀ ਦੇ ਮੁਹੰਮਦ ਇਸਰਾਰ ਤਰੀਨ, ਜੇਡਬਲਯੂਪੀ ਦੇ ਨਵਾਬਜ਼ਾਦਾ ਸ਼ਾਜ਼ੈਨ ਬੁਗਤੀ ਅਤੇ ਪੀਐਮਐਲ-ਕਿਊ ਦੇ ਤਾਰਿਕ ਬਸ਼ੀਰ ਚੀਮਾ ਨੂੰ ਸ਼ਾਹਬਾਜ਼ ਸ਼ਰੀਫ਼ ਦੀ ਸਰਕਾਰ ਵਿੱਚ ਮੰਤਰੀ ਦਾ ਦਰਜਾ ਦਿੱਤਾ ਗਿਆ ਹੈ।
ਇਹ ਵੀ ਪੜ੍ਹੋ:ਤੋਸ਼ਖਾਨੇ ਨੂੰ ਤੋਹਫ਼ੇ ਵੇਚਣ 'ਤੇ ਇਮਰਾਨ ਨੇ ਕਿਹਾ, ਮੇਰੇ ਤੋਹਫ਼ੇ, ਮੇਰੀ ਇੱਛਾ
