ਏਥਜ਼: ਸ਼ੁੱਕਰਵਾਰ ਦੇਰ ਰਾਤ ਏਜੀਅਨ ਸਾਗਰ (Aegean Sea ) ਵਿੱਚ ਇੱਕ ਸ਼ਰਨਾਰਥੀ ਕਿਸ਼ਤੀ ਦੇ ਪਲਟਣ ਨਾਲ ਘੱਟੋ-ਘੱਟ 13 ਲੋਕਾਂ ਦੀ ਮੌਤ ਹੋ ਗਈ ਅਤੇ ਇਸਦੇ ਨਾਲ ਯੂਨਾਨੀ ਜਲ ਖੇਤਰ ’ਚ ਪਾਣੀਆਂ ਵਿੱਚ ਸ਼ਰਨਾਰਥੀਆਂ ਨੂੰ ਲੈ ਕੇ ਜਾ ਰਹੀਆਂ ਕਿਸ਼ਤੀਆਂ ਨਾਲ ਵਾਪਰੇ ਤਿੰਨ ਹਾਦਸਿਆਂ ਵਿੱਚ ਘੱਟੋ-ਘੱਟ 27 ਲੋਕਾਂ ਦੀ ਮੌਤ ਹੋ ਗਈ। ਗ੍ਰੀਸ ਦੇ ਪੂਰਬੀ ਏਜੀਅਨ ਟਾਪੂਆਂ 'ਤੇ ਭਾਰੀ ਗਸ਼ਤ ਹੈ, ਕਿਉਂਕਿ ਇਹ ਟਾਪੂ ਸਾਲਾਂ ਤੋਂ ਸ਼ਰਨਾਰਥੀ ਸੰਕਟ ਨਾਲ ਜੂਝ ਰਿਹਾ ਹੈ। ਅਜਿਹੇ 'ਚ ਤਸਕਰ ਇਸ ਦੀ ਬਜਾਏ ਤੁਰਕੀ ਤੋਂ ਇਟਲੀ ਦਾ ਰਸਤਾ ਚੁਣ ਰਹੇ ਹਨ, ਜੋ ਕਿ ਬਹੁਤ ਖਤਰਨਾਕ ਹੈ ਅਤੇ ਇਸੇ ਕਾਰਨ ਹਾਲ ਹੀ 'ਚ ਇਹ ਹਾਦਸੇ ਵਾਪਰੇ ਹਨ।
ਕੋਸਟ ਗਾਰਡ ਨੇ ਕਿਹਾ ਕਿ ਮੱਧ ਏਜੀਅਨ ਦੇ ਪਾਰੋਸ ਟਾਪੂ ਤੋਂ ਲਗਭਗ ਅੱਠ ਕਿਲੋਮੀਟਰ ਦੂਰ ਸ਼ੁੱਕਰਵਾਰ ਦੇਰ ਰਾਤ ਕਿਸ਼ਤੀ ਪਲਟਣ ਤੋਂ ਬਾਅਦ 62 ਲੋਕਾਂ ਨੂੰ ਬਚਾ ਲਿਆ ਗਿਆ। ਹਾਦਸੇ 'ਚ ਬਚੇ ਲੋਕਾਂ ਨੇ ਕੋਸਟ ਗਾਰਡ ਨੂੰ ਦੱਸਿਆ ਕਿ ਜਹਾਜ਼ 'ਚ ਕਰੀਬ 80 ਲੋਕ ਸਵਾਰ ਸਨ। ਅਧਿਕਾਰੀਆਂ ਨੇ ਦੱਸਿਆ ਕਿ ਤੱਟ ਰੱਖਿਅਕਾਂ ਦੀਆਂ ਪੰਜ ਕਿਸ਼ਤੀਆਂ, ਨੌਂ ਨਿੱਜੀ ਜਹਾਜ਼ਾਂ, ਇਕ ਹੈਲੀਕਾਪਟਰ, ਇਕ ਫੌਜੀ ਜਹਾਜ਼ ਅਤੇ ਕੋਸਟ ਗਾਰਡ ਦੇ ਗੋਤਾਖੋਰਾਂ ਨੇ ਰਾਤ ਭਰ ਬਚਾਅ ਕਾਰਜ ਵਿਚ ਹਿੱਸਾ ਲਿਆ।