ਮੁੰਬਈ: ਮਸ਼ਹੂਰ ਕਾਮੇਡੀ ਅਦਾਕਾਰ ਸਤਿੰਦਰ ਕੁਮਾਰ ਖੋਸਲਾ ਦਾ ਦਿਹਾਂਤ ਹੋ ਗਿਆ ਹੈ, ਜਿਹਨਾਂ ਨੇ ਮੰਗਲਵਾਰ ਨੂੰ 84 ਸਾਲ ਦੀ ਉਮਰ 'ਚ ਮੁੰਬਈ 'ਚ ਆਖਰੀ ਸਾਹ ਲਿਆ। ਮੀਡੀਆ ਰਿਪੋਰਟਾਂ ਮੁਤਾਬਕ ਕਾਮੇਡੀ ਅਦਾਕਾਰ ਦੀ ਕੱਲ੍ਹ ਸ਼ਾਮ ਕਰੀਬ 7.30 ਵਜੇ ਮੌਤ ਹੋ ਗਈ। ਉਸਦੀ ਮੌਤ ਦੀ ਪੁਸ਼ਟੀ ਉਸਦੇ ਦੋਸਤ ਅਤੇ ਸਾਥੀ ਜੁਗਨੂੰ ਨੇ ਕੀਤੀ ਸੀ।
ਸਿਰ ਦੀ ਸੱਟ ਨੇ ਲਈ ਜਾਨ: ਮੀਡੀਆ ਰਿਪੋਰਟਾਂ ਮੁਤਾਬਕ ਬੀਰਬਲ ਉਰਫ ਸਤਿੰਦਰ ਕੁਮਾਰ ਖੋਸਲਾ ਦੇ ਸਿਰ 'ਤੇ ਛੱਤ ਦਾ ਟੁਕੜਾ ਡਿੱਗ ਗਿਆ, ਜਿਸ ਕਾਰਨ ਉਹ ਜ਼ਖਮੀ ਹੋ ਗਏ। ਦੱਸਿਆ ਜਾ ਰਿਹਾ ਹੈ ਕਿ ਜਿਸ ਜਗ੍ਹਾ 'ਤੇ ਅਦਾਕਾਰ ਦੇ ਸੱਟ ਵੱਜੀ ਸੀ, ਉਥੇ ਪਹਿਲਾਂ ਵੀ ਦੋ ਵਾਰ ਸੱਟ ਵੱਜ ਚੁੱਕੀ ਸੀ, ਜਿਸ ਕਾਰਨ ਸੱਟ ਕਾਫੀ ਡੂੰਘੀ ਲੱਗੀ ਸੀ। ਚੈਕਅੱਪ ਤੋਂ ਬਾਅਦ ਡਾਕਟਰ ਨੇ ਆਪਰੇਸ਼ਨ ਦੀ ਸਲਾਹ ਦਿੱਤੀ ਸੀ। ਬੀਰਬਲ ਨੇ ਦੋ ਮਹੀਨੇ ਪਹਿਲਾਂ ਇਸ ਸੱਟ ਦਾ ਆਪਰੇਸ਼ਨ ਕਰਵਾਇਆ ਸੀ ਤੇ ਉਹ ਫਿਰ ਵੀ ਠੀਕ ਨਹੀਂ ਹੋ ਸਕੇ।
ਗੁਰਦਾਸਪੁਰ ਵਿੱਚ ਹੋਇਆ ਸੀ ਜਨਮ: ਬੀਰਬਲ ਉਰਫ ਸਤਿੰਦਰ ਕੁਮਾਰ ਖੋਸਲਾ ਦਾ ਜਨਮ 28 ਅਕਤੂਬਰ 1938 ਨੂੰ ਪੰਜਾਬ ਦੇ ਜ਼ਿਲ੍ਹਾ ਗੁਰਦਾਸਪੁਰ ਵਿੱਚ ਹੋਇਆ ਸੀ, ਜਿਹਨਾਂ ਨੇ 1967 ਵਿੱਚ ਮਨੋਜ ਕੁਮਾਰ ਦੀ ਫਿਲਮ 'ਉਪਕਾਰ' ਰਾਹੀਂ ਆਪਣੇ ਕਰੀਅਰ ਦੀ ਸ਼ੁਰੂਆਤ ਕੀਤੀ ਸੀ। ਸਤਿੰਦਰ ਕੁਮਾਰ ਖੋਸਲਾ ਦੀ ਕਾਲਜ ਤੋਂ ਹੀ ਕਲਾਤਮਕ ਜੀਵਨ ਵਿੱਚ ਆਪਣਾ ਕਰੀਅਰ ਬਣਾਉਣ ਦੀ ਇੱਛਾ ਸੀ। ਆਪਣੇ ਕਾਲਜ ਦੇ ਦਿਨਾਂ ਦੌਰਾਨ, ਉਹਨਾਂ ਨੇ ਬੰਗਾਲੀ ਪ੍ਰੋਗਰਾਮ ਅਤੇ ਨਾਟਕ ਵੇਖੇ।
ਸਤਿੰਦਰ ਕੁਮਾਰ ਖੋਸਲਾ ਦੇ ਪਿਤਾ ਇੱਕ ਪ੍ਰਿੰਟਿੰਗ ਪ੍ਰੈਸ ਦਾ ਕਾਰੋਬਾਰ ਚਲਾਉਂਦੇ ਸਨ, ਜਿਹਨਾਂ ਨੇ ਖੋਸਲਾ ਨੂੰ ਇਸਨੂੰ ਜਾਰੀ ਰੱਖਣ ਦੀ ਸਲਾਹ ਦਿੱਤੀ, ਪਰ ਖੋਸਲਾ ਨੇ ਫਿਲਮੀ ਕਰੀਅਰ ਚੁਣਿਆ। ਕੁਝ ਫ਼ਿਲਮਾਂ ਜਿਹਨਾਂ ਵਿੱਚ ਉਹਨਾਂ ਨੇ ਕੰਮ ਕੀਤਾ ਉਹਨਾਂ ਵਿੱਚ ਰਾਜ ਖੋਸਲਾ ਦੀ ਦੋ ਬਦਨ (1966), ਅਤੇ ਵੀ ਸ਼ਾਂਤਾਰਾਮ ਦੀ ਬੂੰਦ ਜੋ ਬਨ ਗਈ ਮੋਤੀ (1967) ਸ਼ਾਮਲ ਸਨ।
ਮਨੋਜ ਕੁਮਾਰ ਦੀ ਆਈਕੋਨਿਕ ਫਿਲਮ 'ਉਪਕਾਰ' ਨਾਲ ਕੀਤੀ ਸ਼ੁਰੂਆਤ:ਸੀਰੀਅਲ 'ਚ ਬੀਰਬਲ ਦਾ ਉਨ੍ਹਾਂ ਦਾ ਮਜ਼ਾਕੀਆ ਰੋਲ ਕਾਫੀ ਮਸ਼ਹੂਰ ਹੈ। 1967 ਵਿੱਚ, ਉਹਨਾਂ ਨੇ ਮਨੋਜ ਕੁਮਾਰ ਦੀ ਆਈਕੋਨਿਕ ਫਿਲਮ 'ਉਪਕਾਰ' ਨਾਲ ਮਨੋਰੰਜਨ ਜਗਤ ਵਿੱਚ ਆਪਣੇ ਕਰੀਅਰ ਦੀ ਸ਼ੁਰੂਆਤ ਕੀਤੀ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਕਰੀਬ 500 ਫਿਲਮਾਂ 'ਚ ਦਰਸ਼ਕਾਂ ਨੂੰ ਹਸਾਇਆ। ਇਸ ਵਿੱਚ ਮਰਾਠੀ, ਹਿੰਦੀ, ਪੰਜਾਬੀ ਅਤੇ ਭੋਜਪੁਰੀ ਫਿਲਮਾਂ ਸ਼ਾਮਲ ਹਨ।
ਮਨੋਜ ਕੁਮਾਰ ਨੇ ਦਿੱਤਾ ਨਵਾਂ ਨਾਂ:ਮਨੋਜ ਕੁਮਾਰ ਅਤੇ ਨਿਰਦੇਸ਼ਕ ਰਾਜ ਖੋਸਲਾ ਨੇ ਸਤਿੰਦਰ ਨੂੰ ਨਵਾਂ ਨਾਂ ਦਿੱਤਾ ਹੈ। ਉਹਨਾਂ ਇੱਕ ਕਾਮੇਡੀ ਅਦਾਕਾਰ ਵਜੋਂ ਆਪਣਾ ਨਾਂ ਬਦਲ ਕੇ ਬੀਰਬਲ ਰੱਖ ਲਿਆ ਸੀ। ਮਨੋਜ ਕੁਮਾਰ ਦੀਆਂ ਫਿਲਮਾਂ ਰੋਟੀ ਕਪੜਾ ਔਰ ਮਕਾਨ (1974) ਅਤੇ ਕ੍ਰਾਂਤੀ (1981) ਵਿੱਚ ਉਸਦੀਆਂ ਭੂਮਿਕਾਵਾਂ ਜ਼ਿਕਰਯੋਗ ਸਨ। ਸਤਿੰਦਰ ਕੁਮਾਰ ਖੋਸਲਾ ਨੇ ਸ਼ੋਲੇ (1975), ਸੂਰਜ (1977) ਵਿੱਚ ਅੱਧੀ ਮੁੱਛ ਵਾਲੇ ਕੈਦੀਆਂ ਦੀ ਭੂਮਿਕਾ ਨਿਭਾਈ। ਦੇਵ ਆਨੰਦ ਦੀ ਫਿਲਮ ਅਮੀਰ ਗਰੀਬ (1974) ਵਿੱਚ ਉਸਦੀ ਭੂਮਿਕਾ ਦੀ ਬਹੁਤ ਪ੍ਰਸ਼ੰਸਾ ਕੀਤੀ ਗਈ ਸੀ।
