ਮੁੰਬਈ ਵਿਖੇ ਅੱਜ ਸੰਗ਼ੀਤਕ ਧਮਾਲ ਮਚਾਏਗਾ ਇਹ ਮਸ਼ਹੂਰ ਪੌਪ ਸਟਾਰ ਕਿੰਗ, ਗ੍ਰੈਂਡ ਸ਼ੋਅ ਦਾ ਬਣੇਗਾ ਹਿੱਸਾ

ਮੁੰਬਈ ਵਿਖੇ ਅੱਜ ਕ੍ਰਿਸਮਿਸ ਦੇ ਜਸ਼ਨਾਂ ਦੇ ਮੱਦੇਨਜ਼ਰ ਵੱਡੇ ਸ਼ੋਅ ਹੋਣ ਜਾ ਰਹੇ ਹਨ। ਇਨ੍ਹਾਂ ਚੋਂ ਐਨ.ਐਸ.ਸੀ.ਆਈ ਡੋਮ ਵਰਲੀ ਵਿਖੇ ਆਯੋਜਿਤ ਹੋ ਰਹੇ ਮੇਘਾ ਸ਼ੋਅ ਵਿੱਚ ਮਸ਼ਹੂਰ ਪੌਪ ਸਟਾਰ ਕਿੰਗ ਵੀ ਇਸ ਗ੍ਰੈਂਡ ਕਾਨਸਰਟ ਦਾ ਹਿੱਸਾ ਬਣੇਗਾ।

ਹੈਦਰਾਬਾਦ ਡੈਸਕ:ਦੁਨੀਆ-ਭਰ 'ਚ ਅਪਣੀ ਨਾਯਾਬ ਗਾਇਕੀ ਦਾ ਲੋਹਾ ਮੰਨਵਾ ਰਿਹਾ ਭਾਰਤੀ ਪੌਪ ਸਟਾਰ ਕਿੰਗ ਅੱਜ ਮੁੰਬਈ ਨਗਰੀ 'ਚ ਸੰਗੀਤਕ ਧਮਾਲਾਂ ਪਾਉਣ ਜਾ ਰਿਹਾ ਹੈ, ਜੋ ਇਥੋ ਦੇ ਐਨ.ਐਸ.ਸੀ.ਆਈ ਡੋਮ ਵਰਲੀ ਵਿਖੇ ਆਯੋਜਿਤ ਹੋ ਰਹੇ ਮੇਘਾ ਸ਼ੋਅ ਦਾ ਸ਼ਾਨਦਾਰ ਹਿੱਸਾ ਬਣੇਗਾ। "ਕਿੰਗ ਨਿਊ ਲਾਈਫ ਇੰਡੀਆ ਟੂਰ 2023 ਦੇ ਮੱਦੇਨਜ਼ਰ ਅਤੇ 'ਟੁਬੋਰਗ ਜ਼ੀਰੋ ਪੈਕੇਜਡ ਡ੍ਰਿੰਕਿੰਗ ਵਾਟਰ' ਦੀ ਲੜੀ ਵਜੋਂ ਸਾਹਮਣੇ ਆ ਰਿਹਾ ਹੈ ਇਹ ਗ੍ਰੈਂਡ ਈਵੇਂਟ , ਜਿਸ ਦੌਰਾਨ ਇਹ ਚਰਚਿਤ ਗਾਇਕ ਅਪਣੇ ਬਲਾਕ-ਬਸਟਰ ਹਿੱਟ ਗੀਤਾਂ ਦੁਆਰਾ ਦਰਸ਼ਕਾਂ ਨੂੰ ਅਨੌਖੇ ਸੰਗ਼ੀਤਕ ਰੰਗਾਂ ਵਿਚ ਰੰਗੇਗਾ।

ਗਲੈਮਰ ਦੀ ਦੁਨੀਆਂ ਮੁੰਬਈ ਵਿਚ ਖਿੱਚ ਅਤੇ ਬਹੁ ਆਕਰਸ਼ਣ ਦਾ ਕੇਂਦਰ-ਬਿੰਦੂ ਬਣੇ ਉਕਤ ਸ਼ੋਅ ਵਿਚ ਹਜ਼ਾਰਾਂ ਪ੍ਰਸ਼ੰਸਕਾਂ ਦੇ ਮੌਜੂਦ ਰਹਿਣ ਦੀ ਸੰਭਾਵਨਾਂ ਹੈ , ਜੋ ਪਹਿਲੀ ਵਾਰ ਏਨੇ ਵੱਡੇ ਪੱਧਰ ਉੱਪਰ ਇਸ ਸ਼ਾਨਦਾਰ ਗਾਇਕ ਦੀ ਬੇਹਤਰੀਣ ਗਾਇਕੀ ਦਾ ਆਨੰਦ ਮਾਣਨਗੇ। ਇਸ ਮਹਾਂਨਗਰ ਵਿਚ ਕ੍ਰਿਸਮਸ ਦੇ ਹੋ ਰਹੇ ਜਸ਼ਨਾਂ ਦੌਰਾਨ ਹੀ ਆਯੋਜਿਤ ਹੋ ਰਹੇ ਉਕਤ ਲਾਈਵ ਕਾਨਸਰਟ ਨੂੰ ਲੈ ਕੇ ਖਾਸੇ ਜੋਸ਼ ਵਿਚ ਹੈ ਇਹ ਬਾਕਮਾਲ ਗਾਇਕ ਪੌਪ ਸਿੰਗਰ ਕਿੰਗ ਨੇ ਆਪਣੇ ਉਤਸ਼ਾਹ ਨੂੰ ਸਾਂਝਾ ਕਰਦੇ ਹੋਏ ਕਿਹਾ, “ਮੁੰਬਈ ਸ਼ਹਿਰ ਨੂੰ ਹਮੇਸ਼ਾ ਘਰ ਵਰਗਾ ਮਹਿਸੂਸ ਕਰਦਾ ਹਾਂ ,ਜੋ ਅੱਜ ਸੰਗੀਤ ਜਗਤ ਵਿੱਚ ਕੁਝ ਨਿਵੇਕਲਾ ਕਰ ਗੁਜਰਣ ਦੇ ਦੇਖੇ ਮੇਰੇ ਸੁਫਨਿਆਂ ਨੂੰ ਤਾਬੀਰ ਦੇਣ ਵਿਚ ਅਹਿਮ ਭੂਮਿਕਾ ਨਿਭਾ ਰਿਹਾ ਹੈ।"

ਉਨਾਂ ਅਪਣੀਆਂ ਮਨ ਦੀਆਂ ਭਾਵਨਾਵਾਂ ਸਾਝੀਆਂ ਕਰਦਿਆਂ ਅੱਗੇ ਕਿਹਾ ਕਿ ਕ੍ਰਿਸਮਸ ਦੇ ਬਿਲਕੁਲ ਨੇੜੇ ਮੇਰੇ ਪ੍ਰਸ਼ੰਸਕਾਂ ਦੇ ਨਾਲ ਜਸ਼ਨ ਮਨਾਉਣ ਦਾ ਇਸ ਤੋਂ ਵਧੀਆ ਤਰੀਕਾ ਹੋਰ ਕੀ ਹੋ ਸਕਦਾ ਹੈ, ਜੋ ਮੇਰੇ ਲਈ ਇੱਕ ਵਿਸਤ੍ਰਿਤ ਪਰਿਵਾਰ ਵਾਂਗ ਹਨ। ਹਾਲ ਹੀ ਦੇ ਦਿਨਾਂ 'ਚ ਬੈਂਗਲੁਰੂ, ਜੈਪੁਰ, ਕੋਲਕਾਤਾ, ਦਿੱਲੀ, ਲਖਨਊ, ਹੈਦਰਾਬਾਦ ਅਤੇ ਅਹਿਮਦਾਬਾਦ ਵਿੱਚ ਵੀ ਅਪਣੀ ਵਿਲੱਖਣਤਾਂ ਭਰੀ ਗਾਇਕੀ ਦਾ ਇਜ਼ਹਾਰ ਕਰਵਾਉਣ ਵਾਲੇ ਇਸ ਅਜ਼ੀਮ ਗਾਇਕ ਅਨੁਸਾਰ ਉਸ ਦੀ ਖੁਸ਼ਕਿਸਮਤੀ ਹੈ ਕਿ ਬੀਤੇ ਦਿਨੀਂ ਰਿਲੀਜ਼ ਹੋਏ ਉਸ ਦੇ 'ਹਾਈ ਹੁੱਕੂ' ਦੇ ਅਧਿਕਾਰਤ ਵੀਡੀਓ ਨੂੰ ਦੇਸ਼ ਵਿਦੇਸ਼ ਸਬੰਧਤ ਦਰਸ਼ਕਾਂ ਦੁਆਰਾ ਬੇਪਨਾਹ ਕਾਮਯਾਬੀ ਨਾਲ ਨਵਾਜ਼ਿਆ ਗਿਆ ਹੈ।

ਬੀਤੇ ਸਾਲ ਨੂੰ ਅਲਵਿਦਾ ਅਤੇ ਨਵ ਵਰ੍ਹੇ ਨੂੰ ਖੁਸ਼ਾਮਦੀਦ ਕਹਿਣ ਜਾ ਰਹੇ ਉਕਤ ਸ਼ੋਅ ਦੇ ਪ੍ਰਬੰਧਕਾਂ ਅਨੁਸਾਰ ਸਾਲ ਦੇ ਅੰਤਲੇ ਸਭ ਤੋਂ ਵੱਡੇ ਈਵੇਂਟ ਵਜੋ ਅਪਣੀ ਮੌਜੂਦਗੀ ਦਰਜ ਕਰਵਾਉਣ ਜਾ ਰਿਹਾ ਹੈ। ਇਹ ਸੰਗ਼ੀਤਕ ਪ੍ਰੋਗਰਾਮ, ਜਿਸ ਸਬੰਧੀ ਬਹੁਤ ਹੀ ਉਚ ਪੱਧਰੀ ਤਿਆਰੀਆਂ ਨੂੰ ਅੰਜਾਮ ਦਿੱਤਾ ਗਿਆ ਹੈ, ਕਿਉਂਕਿ ਇਸ ਵਿੱਚ ਬਾਲੀਵੁੱਡ ਨਾਲ ਜੁੜੀਆਂ ਸ਼ਖਸੀਅਤਾਂ ਵੀ ਦਰਸ਼ਕਾਂ ਦੇ ਤੌਰ ਉੱਤੇ ਅਪਣੀ ਸ਼ਾਨਦਾਰ ਸਮੂਲੀਅਤ ਦਰਜ ਕਰਵਾਉਣਗੀਆਂ।